En otieno mogik kendo Yesu pod nigi jootene. Oa lwoko tiende jootene mondo opuonjgigo kido mar bolruok. Mano en tich mineno ni ni piny ahinya. Ang’o momiyo puonjogi kotiyo gi yorno en gima owinjore? En nikech nitie nyawo moro ma gisebedogo. Kata obedo ni gisechiwore tiyo ne Nyasaye, pod gin gi ywaruok ni en ng’ano maduong’ e kindgi. (Mariko 9:33, 34; 10:35-37) Ywaruogno chako tuch kendo e odhiamboni.

‘Mbaka matek muoch e kind [joote] ni en ng’a kuomgi mikwano ni duong’ moloyo.’ (Luka 22:24) Mano kaka nyaka bed ni Yesu ok mor konenogi ka giyware kuom wachno kendo! Yesu kawo okang’ mane?

Kata obedo ni jootego yware kamano, Yesu ok dhawnegi. Kar mano, omiyogi puonj kotiyo gi yo ma yawo pachgi. Owachonegi kama: “Ruodhi mag ogendni timore joloch e wi ji, kendo joma nigi teko e wi ji iluongo ni Jochiw-Kony. Kata kamano, un ok onego ubed kamano . . . Nimar en ng’a ma duong’ie moloyo? Be en jalo mobet ka chiemo, koso en jal ma tiyone?” Kae to oparonegi ranyisi mosebedo koketonegi en owuon. Owacho kama: “To an e dieru kaka jal ma tiyonu.”​—Luka 22:25-27.

Kata obedo ni gin gi nyawo moko, joote osesiko komakore gi Yesu e bwo tembe duto matek. Kuom mano, owachonegi niya: “Atimo kodu singruok mana kaka Wuora osetimo koda singruok ne pinyruoth.” (Luka 22:29) Jootenego osebedo jolupne ma jo sinani. Omiyo, onyisogi ni kokalo kuom singruok mosetimo kodgi, gibiro bedo e Pinyruoth mi giloch kode.

Kata obedo ni joote nigi geno ma jaberno, pod gin e ringruok kendo gin gi nyawo mag ringruok. Yesu wachonegi kama: “Satan osekwayo mondo opiedhu uduto mana ka ngano” ma kerega sama ipiedhogi. (Luka 22:31) Onyisogi bende chon-chon niya: “E otienoni, uduto ubiro chwanyoru nikech an, nimar ondik kama: ‘Abiro goyo jakwath kendo rombe mag kueth biro ke.’”​—Mathayo 26:31; Zekaria 13:7.

Petro kwer gi chir niya: “Kata ka jomamokogo duto ochwanyore nikech in, an to ok abi chwanyora ngang’!” (Mathayo 26:33) Yesu wacho ne Petro ni ka thuon gweno pok okok nyadiriyo e otienono, Petro biro kwer ni ok ong’eyo Yesu. Kata kamano, Yesu medo wacho kama: “Asesayonu mondo yieu kik tho; to in, bang’ kiseduogo, iteg oweteni.” (Luka 22:32) To e ma pod Petro ramo gi chir niya: “Kata kochuno ni atho kodi, ok abi kwer ngang’ ni ok ang’eyi.” (Mathayo 26:35) Joote mamokogo bende wacho mana kamano.

Yesu wacho ne jopuonjrene niya: “Pod an kodu mana kuom kinde matin. Ubiro manya; to mana kaka nawacho ne Jo-Yahudi ni, ‘Kama adhiyoe ok unyal biroe,’ koro awachonu un bende.” Kae to omedo kama: “Amiyou chik manyien, ni ubed gi hera e kindu; mana kaka aseherou, un bende herreuru e kindu. Ma e ma nomi ji duto ong’e ni un jopuonjrena​—ka un gi hera e kindu uwegi.”​—Johana 13:33-35.

Bang’ winjo ka Yesu wacho ni odong’ mana gi kinde matin modhi bedogo kodgi, Petro penje niya: “Ruoth, idwaro dhi kanye?” Yesu dwoko ni: “Kama adhiyoe ok unyal luwae sani, to ubiro luwa bang’e.” Petro wuoro kowacho niya: “Ruoth, ang’o momiyo ok anyal luwi sani? Abiro chiwo ngimana nikech in.”​—Johana 13:36, 37.

Yesu koro wuoyo e wi kinde moro ma ne ooroe jootene mondo gidhi giyal e alwora mar Galili ka ok giting’o pesa kata ofuke mag chiemo. (Mathayo 10:5, 9, 10) Openjogi niya: “Be nuchando gimoro amora?” Gidwoke ni: “Ooyo!” To koro  ang’o monego gitim e ndalo ma biro? Yesu chikogi niya: “Ng’at ma nigi ofuk pesa mondo oting’e, bende otim kamano gi ofuk chiemo, kendo ng’at ma onge gi ligangla ous nangane ma oko mondo ong’iewgo ligangla. Nikech awachonu ni, wachni nyaka timre ma ne ondik kuoma niya, ‘Ne okwane gi joma ketho chik.’ Nimar gigo chopo kuoma.”​—Luka 22:35-37.

Gima Yesu wuoyoe en kinde ma ibiro gure e yath kanyachiel gi joricho kata joketh-chik. Bang’ mano, jolupne biro yudo sand mager. Nikech gineno ni giseikore, giwacho ne Yesu kama: “Ruoth, ne! ligengni ariyo ni ka.” Yesu dwokogi niya: “Oromo.” (Luka 22:38) Bedo ni gin gi ligengni ariyogo biro miyo Yesu thuolo mar chiwonegi puonj machielo ma bende dwarore ahinya.