Yésus a nga’ane étune nda ya yôp éyoñ be maneya bo mesimesa’ane; nde a ve minlômane mié ngule nyul a jô’ô na: “Nlem ô bo’o te kumetane mia; buna’ane Zambe, bunane fe ma.”​—Jean 13:36; 14:1, Mfefé Nkôñelan.

Yésus a ve minlômane mié beamu ba bo na, be bo teke dañe tyelé minlem miap e yôp a nkeane wé a jô’ô na: “Nda Ésa wom é ne bito abui. . . . Nge me ake kôme mia vôm, mamien me aye beta zu nyoñe mia; vôm me to, vôm ate fe mi aye tabe.” Ve minlômane mi nji kôme wô’ô na a kobô be ajô ya ke nyiñe yôp. Ajô te Thomas a sili nye na: “A Tat, bi te yem mfa’a wo ake; bi aye yeme zen aya?”​—Jean 14:2-5.

Yésus a yalan a jô’ô na: “Ma me ne zen, me ne fe benya mejôô, a ényiñ.” Fo’o ve nge môt a kañese Yésus émien a miñye’elan mié, a tôñe fe abo dulu dé nde môt ate a ne ngule ya nyiñe nda be Ésa wé e yôb été. Yésus a beta jô na: “Teke môt a zu be Tate, [nge teke lôte be ma].”​—Jean 14:6.

Philippe a kôme baa melo, nde a sili na: “A Nti, liti’i bia Ésoo, abime te da yian bia.” A ne v’ane Philippe a kômbô yen asimba e so’o be Zambe, aval ane miñyenane Moïse, Élie ba Ésaïe be nga bi. Ve jame da, minlôman mi bili jame da dañ avale miñyenan ete. Yésus a ngôné de éyoñ a yalan a jô’ô na: “Abim ayab éyoñ me tabeya a mia, a Philippe, ye wô teke me yem? E môt a yeneya ma, a yeneya fe Ésa wom.” Yésus a liti mefulu me Zambe mese avale da yian; nde ñhe, e nyiñ a nye a yen ane a bo mam, a ne fo’o ve ane wo yen Ésa. E n’été na, Ésa a dañe Mon, amu Yésus a liti de a jô’ô na: “Mejô ma kobô mia ma, me nji so e be mamien.” (Jean 14:8-10, Mfefé Nkôñelan) Minlôman mi ne ngule ya yene na, Yésus a ve Ésa ôlu’u ôse ya ñye’elan a ve be.

Minlôman mia te yene Yésus a bo’o beta be mam, a wô’ô ane a kañete foé ya Éjôé Zambe. Éyoñe ji, a jô be na: “Môt a buni ma, mam me  abo, nnye fe a ye bo me; a ye bo fe mam me adañe mam ma.” (Jean 14:12) Yésus a nji jô na ba ye bo beta mesimba a dañe ma a nga bo. Ve jame da, ba ye bo ésaé nkañete jap ayab éyoñ, akekui mesi ma dañ ôyap, a nambe abui bôt.

Nkeane Yésus wo aye ke bo na be bo ane bôte ba te li’i étam, amu a ka’ale na: “Nge mi aye ja’é me jam a jôé dam, me aye bo de.” Nde a beta be jô na: “Me aye ye’elane Tate, nnye a ye ve mia Mvolô minlem mfe, a ye tabe be mia melu mese, nnye a ne Nsisime ya benya mejôô.” (Jean 14:14, 16, 17) A ve be ndi nleme na ba ye bi mbamba nsisim, nnye ate a ye bo be mvolô. Jam ete da boban môse Pentecôte.

Yésus a jô na: “A li’iya ve mon étun si ndôn teke beta yene ma, ve mia ye yene ma, amu me bili ényiñ a mia fe mia ye bi ényiñ.” (Jean 14:19, Mfefé Nkôñelan) Nge bi vaa na Yésus a ye yené be be a nyule môt éyoñ a ye wômô, a ye fe wômôlô be mbamba éyoñ asu ya na ba be nye be tabe yôb été ane minsisim.

Éyoñe ji, Yésus a jô jam é ne totyii: “E môt a bili metiñe mam a ba’ale fe me, e nye a nye’e ma. E nde fe, e môt a nye’e ma, Ésaa wom a ye nye’e nye, ma fe ma ye nye’e nye a ma ye liti nye mamien.” Ane Judas, nlômane ba loone fe na Thaddée wa sili nye na: “A Nti, jé ja bo na bia ô litii womien, ve teke liti si ndôn?” Yésus nye na: “Nge môt a nye’e ma, a ye ba’ale ñye’elane wom, Ésa wom a ye nye’e nye . . . E môt a nji nye’e ma, a ne te ba’ale mejô mam.” (Jean 14:21-24, Mfefé Nkôñelan) Bôte y’émo be nji bo ane beyé’é bé amu, be nji kañese na Yésus nnye a ne zen, benya mejôô, a ényiñ.

Mbôle Yésus a ke, nne beyé’é bé ba ye kui na be simesane mam mese a nga ye’ele be aya? Yésus a ve éyalan a jô’ô na: “Mvolô minlem, [mbamba] nsisim Tate a ye lôme mia a jôé dam, e nye a ye tu’a ye’ele mia mam mese a ba’alane simesane mia e ma mese mamien me nga ye’ele mia.” Minlôman mia te yen a abim ngule avé mbamba nsisim a ne saé, nde, bifia bite bia ve fo’o ngule nyul. Yésus a jô fe na: “Ma li’i mia mvo’é, ma ve mia mvo’é jam. . . . Nlem ô bo’o te kumetane mia, nge ko woñ.” (Jean 14:26, 27, Mfefé Nkôñelan) Beyé’é be bili fo’o beamu ya bo te tyele minleme yôp, ba ye bi melebe be ne tôñ, Ésa Yésus a ye fe kamane be.

Ba ye fe ji’a yemelane na Zambe a ba’ale be. Yésus a jô na: “Njôô ya si nyô a nga zu. Ve a nji bi jam éziñ e be ma.” (Jean 14:30, Mfefé Nkôñelan) Diable a nga kui na a nyiine be Judas a tindi nye na a bo mam a yi. Ve, Yésus a nji bi atañe metyi m’abé éziñ asu ya na Satan a dutu nye na a ke Zambe ngame yat. Diable a vo’o bo bo na Yésus a kate wu. Amu jé a vo’o de bo? Yésus a jô na: “Avale Tate a nga ve ma atiñ, avale te ma bo.” Teke vaa nge beté, Ésa a ye wômôlô nye.​—Jean 14:31, Mfefé Nkôñelan.