Angatre pala kö e koho hnahag, nge Iesu a hamë ithuecatre koi angatr thupene la hna acile la drai ne amekunën. Öni nyidrë: “The nue kö troa angazone la itre hni nyipunie. Ngo amamane jë pe la lapaune i nyipunie koi Akötresie; nge lapaune jë fe koi ni.”—Ioane 13:36; 14:1.

Iesu a qaja jë koi itre aposetolo la kepin matre tha tro kö angatr a hace fë la nyidrëti a tro. Öni Iesu: “Nyimutre la itre göhnë hnine la hnalapa i Kaka. . . . Eni hë la a tro troa hnëkë göhnë thatraqai nyipunie. Nge e ase jë ni hnëkëne la göhnë i nyipunie, tro ni a bëeke hmaca, me sipu kepe nyipunie ngöne la hnalapang, matre ame la götrane hnenge hna troa lapa ngön, ketre tro fe hi nyipunie a hane lapan.” Ngo tha trotrohnine kö itre aposetolo laka, nyidrëti a qeje hnengödrai. Matre öni Toma: “Joxu, thatre kö huni la hnei nyipëti hna tro kow, matre tro huni a atre tune kaa la gojeny?”—Ioane 14:2-5.

Sa jë hi Iesu ka hape: “Eni hi la gojeny, me nyipici me mel.” Tro hmekuje hi la itre ka kapa la itre ini i Iesu, me nyitipu nyidrë a lö hnine la hnalapa ne la Keme i nyidrë e hnengödrai. Öni Iesu: “Pëkö atr ka atreine troa tro koi Kaka e tha hna jëne ni.”—Ioane 14:6.

Filipo a drenge hnyawa, matre öni angeice jë hi: “Joxu, ca ewekë hi matre lapa loi pi la itre hni hun, amamai huni pi la Kem.” Ma Filipo jë a pi goeëne la Akötresie a iamamany, tune lo hna kuca koi Mose, me Elia, me Isaia. Ngo sisitria kö la hna goeën hnei itre aposetolo. Iesu a qejepengöne me hape: “Filipo, ekö hë ni ce me nyipunie, ngo thatre ni pala kö hnei eö? Ame la atre öhnyi ni, ketre öhne fe hë angeic la Kem.” Iesu hnyawa hi la hnaiji Kem, matre ame la angatr a ce mel me goeë Iesu, kösë angatre hi lai a goeë Kem. Ngo eje hi laka, draië kö la Kem hui Nekön, ke öni Iesu: “Ame la itre ewekë hnenge hna qaja koi eö, tre tha itre sipu mekunange kö.” (Ioane 14:8-10) Öhne hi itre aposetolo ka hape, Iesu a upe koi Kem la itre ini ka lolo hnei nyidrëti hna hamën.

Hnei itre aposetolo i Iesu hna öhnyi nyidrë e kuca la itre huliwa ka tru, me drei nyidrë e cainöjëne la maca ka loi ne la Baselaia i Akötresie. Enehila, öni nyidrëti koi angatr: “Ame la atre lapaune koi ni, tro fe angeic a hane kuca la itre huliwa  hnenge hna kuca, ngo tro kö a tru catre la itre huliwa i angeic.” (Ioane 14:12) Tha Iesu kö a qaja ka hape, troa sisitria la itre iamamanyikeu i angatr hui nyidrë. Ngo tro pe angatr a cainöj aqeany, me cainöj ngöne la itre xa nöje hmaca kö, me kowe la itre xa atre hmaca kö.

Tha Iesu kö a nuaxöji angatr, ke nyidrëti a sisinyi ka hape: “Maine tro nyipunieti a sipone la ketre ewekë ngöne la ëjeng, tro ni lai a eatrën.” Nge öni nyidrë: “Tro ni a xëwe sai nyipunie koi Kaka, nge tro nyidrëti a hamëne la ixatua koi nyipunie, matre tro ej a ce me nyipunie epine palua, ene la ua ne nyipici.” (Ioane 14:14, 16, 17) Iesu a anyipicine laka, tro angatr a kapa la uati hmitrötr, lo ixatua hna sisiny. Hna traqa la ixatua cili ngöne la kola feetëne la Penetekos.

Öni Iesu: “Easenyi hë matre, tha tro hmaca kö a öhnyi ni hnene la fen, ngo tro pala hi nyipunie a öhnyi ni, ke ka mele ni nge tro fe nyipunie a hane mel.” (Ioane 14:19) Tha Iesu hmekuje kö a qaja ka hape, tro angatr a öhnyi nyidrë thupene la troa amele nyidrëti hmaca, ngo tro fe a traqa la ijine troa amelene hmaca la itretre dreng, ngöne la ngönetrei ne hnengödrai.

Thupene lai, Iesu a qaja jë la ketre nyipici, öni nyidrë: “Ame la atre kapa la hnenge hna amekötin, me trongën ej, angeice hi la atre hnimi ni. Nge ame la atre hnimi ni, tre hna hnimi angeice fe hnei Kaka, nge tro ni a hnimi angeic, me amamane hnyawa la pengöng koi angeic.” Ame hnei Iudra aposetolo, lo hna hëne ka hape, Thadaio hna hnyinge ka hape: “Joxu, hnauëne la nyipëti a pi amamane la pengö i nyipë koi hun, ngo tha koi fene kö?” Sa jë hi Iesu ka hape: “Maine tro la ketre atr a hnimi ni, tro angeic a trongëne la itre hnenge hna amekötin, nge tro hë la Kemeng a hnimi angeic . . . Ngo ame la atre tha hnimi ni kö, tre tha trongëne kö angeic la itre hnenge hna amekötin.” (Ioane 14:21-24) Tha tro kö la fen a nyitipune la itretre drei Iesu, ke xele kö angatr ma kapa ka hape, Iesu hi la gojeny, me nyipici, me mel.

Iesu hë la a tro, matre tro itretre dreng a xolouthe tune kaa la nöjei ini hnei nyidrëti hna hamën? Öni Iesu: “Ame la ixatua, ene la uati hmitrötr hna upe hnei Kaka ngöne la ëjeng, tro ej a ini nyipunie la nöjei ewekë asë, me amekunë nyipunie la nöjei ewekë hnenge hna qaja koi nyipunie.” Itre trengewekë i Iesu a akeukawanyi itre aposetolo, ke öhne hë angatre la mene la uati hmitrötr. Matre öni Iesu hmaca jë: “Eni a nue la tingetinge koi nyipunie, nge thei nyipunieti hë la tingetingeng. Matre the nue pi kö troa angazone me axouene la itre hni nyipunie.” (Ioane 14:26, 27) Haawe, the tro kö itretre dreng a xou, ke tro kö la Keme i Iesu a köja gojenyi angatr, me thupë angatr.

Easenyi hë tro angatr a melëne la aqane ithupë i Akötresie. Öni Iesu: “Calemi hë la atre musinëne la fen, ngo pëkö mene i angeice theng.” (Ioane 14:30) Hnei Diabolo hna löthi Iudra me musinë angeic. Ngo thatreine kö angeic kuca tun koi Iesu. Eje hi, pëkö ngazo i Iesu nyine tro Satana a xome matre akötrë Akötresie. Nge ketre, thatreine kö Diabolo cipa Iesu ngöne la mec. Pine nemen? Öni Iesu: “Eni hë a kuca la hnei Kakati hna amekötine koi ni.” Pine lai, xecie hnyawa koi Iesu ka hape, tro la Keme i nyidrëti a amele nyidrëti hmaca.—Ioane 14:31.