Ngke e bon tiku Iesu ma ana abotoro n te ruu are i eta imwin te katairiki are a karaoa iai te kauring, e a kaungaia ni kangai: “Tai karawawatai nanomi. Onimakina te Atua ao onimakinai naba.”​—Ioane 13:36; 14:1.

E tuangia abotoro aika kakaonimaki Iesu bukina ae a na aki karawawatai nanoia ngkai e nangi nako ngke e kangai: “A mwaiti taabo ni maeka n ana auti Tamau. . . . Ao ngkana I nako ni katauraoa te tabo ibukimi, ao N na manga roko ni butimwaeingkami, bwa ike I mena iai ao kam na mena naba iai.” Ma a aki mataata abotoro ngke e taekina Iesu te nako karawa. E titiraki Toma ni kangai: “Te Uea, ti aki ataa ike ko na nako iai. Ti na kangaa n ataa te kawai?”​—Ioane 14:2-5.

E kaeka Iesu ni kangai: “Boni ngai te kawai ao te koaua ao te maiu.” Tii mani butimwaeana ao ana angareirei ao ni kakairi n aroaroni maiuna ae kona temanna n rin n ana auti Tamana i karawa. E taku Iesu: Akea ae e na nakon te Tama ma tii ane e rirou.”​—Ioane 14:6.

E kakauongo raoi Biribo ao e a bubutii ni kangai: “Te Uea, kaota te Tama nakoira ao e a tau naba ibukira.” E taraa n ae e tangiria Biribo bwa e na kaotaki te Atua, n aron are e noraki ngkoa irouia Mote, Eria, ao Itaia, n taiani miitara. Ma a anganaki abotoro te miitara ae tamaroa riki nakoni miitara akanne. Ma e katerea kakawakin anne Iesu ngke e kangai: “Biribo, ko tuai man ataai e ngae ngke I a rangi ni maan i rarikimi? Ane e a tia n norai ao e a tia naba n nora te Tama.” E katotonga raoi aroaron Tamana Iesu ngaia are te maeka ma ngaia ao tataraakina, ai aron ae ko a nora raoi iai te Tama. E boni katerea Iesu bwa e kakannato riki te Tama nakon te Nati ngke e kangai: “Baike I atongi nakoimi, I aki taekin i bon irou.” (Ioane 14:8-10) A kona n noria abotoro bwa Iesu e angangan Tamana kamoamoaana n ana angareirei.

A a tia abotoro n nora Iesu ni karaoi mwakuri aika kamimi ao n ongora irouna ngke e tataekina te rongorongo ae raoiroi ibukin ana Tautaeka n Uea te Atua. E a tuangia ngkai ni kangai: “Ane e onimakinai ao e na karaoi naba mwakuri ake I karaoi, ao e na karaoi mwakuri aika kakannato riki nakon aikai.” (Ioane 14:12) E aki taekinna Iesu bwa a na karaoi kakai aika kakannato riki nakon ake e karaoi. Ma a na karaoa aia mwakuri ni minita n te tai ae maan riki, n taabo aika bubura riki, ao nakoia aomata aika bati riki.

E na aki kakeai taekaia taan rimwina Iesu imwin nakona bwa e berita ni kangai: “Ngkana kam bubutii te bwai teuana n arau, ao N na karaoia.” E taku riki: “N na butiia te Tama ao e na anganingkami riki te tia ibuobuoki ae e na memena iroumi n aki toki, are te taamnei ae raoiroi ae kaota te koaua.” (Ioane 14:14, 16, 17) E kakoauaa nakoia bwa a na anganaki te taamnei ae raoiroi ae te tia ibuobuoki naba. E riki anne ni Bentekota.

E taku Iesu: “Ai tii teutana riki ao a aikoa naba manga norai kaain te aonnaba, ma kam na norai ibukina bwa I maiu ao kam na maiu naba ngkami.” (Ioane 14:19) E na aki tii kaoti Iesu nakoia n rabwatana n aomata imwini mangautina, ma e na kautiia imwina riki bwa a na mena ma ngaia i karawa n rabwataia n taamnei.

E a taekina ngkai Iesu te koaua ae bebete ni kangai: “Ane e butimwaei au tua ma ni kakairi iai, ao e tangirai te aomata anne. Ao ane e tangirai e na tangiraki naba iroun Tamau, ao N na tangiria ao N na kaotai raoi nakoina.” E titiraki te abotoro Iuta ae aranaki naba bwa Tataio ni kangai: “Te Uea, tera ae riki ngkai ko nang kaotiko raoi nakoira ao tiaki nakoia kaain te aonnaba?” E kaeka Iesu ni kangai: “Ngkana iai ae e tangirai, ao e na kakairi n au taeka, ao e na tangiria Tamau . . . Ane e aki tangirai ao e aki kakairi n au taeka.” (Ioane 14:21-24) A aki katotongia taan rimwina kaain te aonnaba, bwa a aki kinaa Iesu ae boni ngaia te kawai, te koaua, ao te maiu.

A na kangaa taan rimwina n uringi ni kabane baike e a tia n reireinia Iesu ngkana e a nako? E kabwarabwaraa ni kangai: “E na reireiningkami bwaai ni kabane te tia ibuobuoki are te taamnei ae raoiroi are e na kanakomaia te Tama n arau, ma ni kauringingkami bwaai ni kabane ake I a tia n tuangingkami.” A a tia abotoro n nora aroni korakorani mwaakan te taamnei ae raoiroi ngaia are e boni karaunano te kaungaunga aei. E taku riki Iesu: “I katuka te rau iroumi, I anganingkami au rau. . . . Tai kariaia nanomi bwa a na rawawata ke ni maaku.” (Ioane 14:26, 27) Ngaia are bon iai bukina ngkai a na aki tabeaianga taan rimwina, bwa a na karekea te kaetieti ao te kamanomano mairoun Taman Iesu.

E na waekoa n noraki koauan ana kamanomano te Atua. E taku Iesu: “E a nakomai te tia tautaekania kaain te aonnaba, ao akea mwaakana i aou.” (Ioane 14:30) E reke rinin te Riaboro i nanon Iuta ao n taua arona. Ma bon akea mamaaran Iesu are e kona Tatan ni kabongana ni katannakoa iai mairoun te Atua, ke e aki kona naba te Riaboro n tuka maten Iesu. Bukin tera? E taku Iesu: “I karaoa nanon te tua are e anganai te Tama.” E kakoauaa raoi Iesu bwa e na kautia Tamana.​—Ioane 14:31.