To núdùdù oflin tọn godo, dile e gbẹ́ pò to abò aga tọn lọ mẹ po apọsteli lẹ po, Jesu na tuli yé dọmọ: “Mì dike ahun mìtọn biọ bẹwlu mẹ blo. Mì do yise hia to Jiwheyẹwhe mẹ, mì do yise hia to yẹnlọsu mẹ ga.”—Johanu 13:36; 14:1.

Jesu do whẹwhinwhẹ́n he wutu apọsteli nugbonọ lọ lẹ ma dona biọ bẹwlu mẹ gando yìyì etọn go hia dọmọ: “Fininọ susu wẹ tin to owhé Otọ́ ṣie tọn gbè. . . . Eyin yẹn yì bo wleawu otẹn de tọn na mì, yẹn na lẹkọwa bo na yí mì do whégbè do dee dè, na fihe yẹn te mìlọsu nido to finẹ.” Ṣigba, apọsteli lẹ ma mọnukunnujẹemẹ dọ olọn mẹ yìyì hodọ wẹ e te. Tọmasi kanse dọmọ: “Oklunọ, mí ma yọ́n fihe hiẹ jei. Nawẹ mí yọ́n aliho lọ gbọn?”—Johanu 14:2-5.

Jesu gblọn dọmọ: “Yẹn wẹ aliho lọ, nugbo lọ po ogbẹ̀ po.” Mẹde ma sọgan yì owhé Otọ́ etọn tọn gbè to olọn mẹ, adavo e kẹalọyi ewọ po nuplọnmẹ etọn lẹ po bo hodo aliho gbẹninọ tọn etọn. Jesu dọmọ: “Mẹdepope ma nọ wá Otọ́ dè adavo gbọn yẹn gblamẹ.”—Johanu 14:6.

Filippi he to todoai po sọwhiwhe po biọ dọmọ: “Oklunọ, do Otọ́ lọ hia mí, podọ enẹ ko pé mí.” E taidi dọ Filippi jlo na mọ numimọ de gando Jiwheyẹwhe go taidi dehe Mose, Elija, po Isaia po mọ lẹ. Ṣigba, apọsteli lọ lẹ ko mọ nude he pọnte hú numimọ enẹlẹ. Jesu zinnudo ehe ji, bo gblọn dọmọ: “Yẹn ko tin po mì po na ojlẹ dindẹn sọmọ, ṣogan, bọ hiẹ Filippi ma ko yọ́n mi ya? Ewọ he ko mọ mi ko mọ Otọ́ lọ ga.” Jesu do mẹhe nkọ Otọ́ lọ yin hia to pipé mẹ; enẹwutu nado mọ Jesu bo nọpọ́ hẹ ẹ nọ taidi dọ yè ko mọ Otọ́ lọ wẹ nkọ. E họnwun dọ Otọ́ lọ klohugan Visunnu lọ, na Jesu dọmọ: “Nuhe yẹn dọna mì lẹ, yẹn ma dọ sọn ojlo ṣie titi mẹ gba.” (Johanu 14:8-10) Apọsteli lẹ mọdọ Jesu to didohia dọ Otọ́ emitọn dè wẹ nuhe emi to pinplọnmẹ lẹpo nọ wá sọn.

Apọsteli Jesu tọn lẹ ko mọ bọ e wà azọ́njiawu lẹ  bo ko sọ sè wẹndagbe he e lá gando Ahọluduta Jiwheyẹwhe tọn go. Todin, e dọna yé dọmọ: “Ewọ he nọ do yise hia to yẹn mẹ, ewọ lọsu na wà azọ́n he yẹn wà lẹ; ewọ nasọ wà azọ́n he klohu ehelẹ.” (Johanu 14:12) Jesu ma to didọ dọ yé na wà azọ́njiawu he klohugan dehe ewọ ko wà lẹ gba. Ṣigba, dọ yé na hẹn lizọnyizọn yetọn di na ojlẹ he dẹn hú ewọ tọn, yì lẹdo he gbloada hú fie e yì lẹ podọ jẹ gbẹtọ susu hugan lẹ dè.

Yìyì Jesu tọn ma zẹẹmẹdo dọ ewọ na gbẹkọ yé go, na e dopà dọmọ: “Eyin mì biọ nudepope to oyín ṣie mẹ, yẹn na wà ẹ.” Humọ, e dọmọ: “Yẹn nasọ biọ Otọ́ bọ ewọ na na mì alọgọtọ devo he na nọhẹ mì kakadoi, enẹ wẹ gbigbọ nugbo tọn lọ.” (Johanu 14:14, 16, 17) E hẹn yé kudeji dọ yé na mọ gbigbọ wiwe yí, ehe yin alọgọtọ devo lọ. Enẹ jọ domọ to azán Pẹntikọsti tọn gbè.

Jesu dọmọ: “Whenu vude dogọ, aihọn ma nasọ mọ mi ba, ṣigba mìwlẹ na mọ mi, na yẹn to ogbẹ̀ bọ mìwlẹ nasọ nọgbẹ̀ wutu.” (Johanu 14:19) E ma yindọ Jesu na sọawuhia yé to agbasa mẹ to fọnsọnku etọn godo kẹdẹ wẹ gba, ṣigba e na wá fọ́n yé sọnku na yé nido tin po e po to olọn mẹ taidi nudida gbigbọnọ lẹ.

Todin, Jesu dọ nugbo he bọawu de dọmọ: “Ewọ he mọ gbedide ṣie lẹ yí bo nọ yìn yé, ewọ wẹ mẹhe yiwanna mi. To alọ devo mẹ, ewọ he yiwanna mi, Otọ́ ṣie na yiwanna ẹn, yẹn nasọ yiwanna ẹn bo na do dee hia ẹ hezeheze.” Whenẹnu, apọsteli Juda, mẹhe sọ nọ yin yiylọdọ Tade kanse dọmọ: “Oklunọ, etẹwẹ jọ bọ hiẹ do jlo na do dewe hia mí hezeheze bo ma jlo na do dewe hia aihọn lọ?” Jesu gblọn dọmọ: “Eyin mẹdepope yiwanna mi, ewọ na payi ohó ṣie go, Otọ́ ṣie nasọ yiwanna ẹn . . . Ewọ he ma yiwanna mi ma nọ payi ohó ṣie lẹ go.” (Johanu 14:21-24) To vogbingbọn mẹ na hodotọ Jesu tọn lẹ, aihọn lọ ma kẹalọyi ewọ taidi aliho lọ, nugbo lọ po ogbẹ̀ po.

Jesu jei, enẹwutu nawẹ devi etọn lẹ na penugo nado flin nuhe e ko plọn yé lẹpo gbọn? Jesu basi zẹẹmẹ dọmọ: “Alọgọtọ lọ, yèdọ gbigbọ wiwe, he Otọ́ lọ na dohlan to oyín ṣie mẹ, enẹ lọ wẹ na plọn mì onú lẹpo bo na hẹn onú lẹpo he yẹn ko dọna mì wá oflin mẹ na mì.” Apọsteli lọ lẹ ko mọ lehe gbigbọ wiwe tindo huhlọn do, enẹwutu, jidenamẹ ehe miọnhomẹna yé. Jesu yidogọ dọmọ: “Yẹn jo jijọho do mì dè, yẹn na mì jijọho ṣie. . . . Mì dike ahun mìtọn biọ bẹwlu mẹ kavi gbàdo na obu wutu blo.” (Johanu 14:26, 27) Enẹwutu, devi lẹ tindo whẹwhinwhẹ́n ma nado biọ bẹwlu mẹ—yé na mọ anademẹ po hihọ́ po yí sọn Otọ́ Jesu tọn dè.

Kunnudenu he dohia dọ Jiwheyẹwhe nọ basi hihọ́namẹ lẹ na yin mimọ to madẹnmẹ. Jesu dọmọ: “Ogán aihọn tọn lọ ja. Podọ ewọ ma tindo huhlọn do yẹn ji.” (Johanu 14:30) Lẹgba ko penugo nado biọ Juda mẹ bo deanana ẹn. Ṣigba, ayilinlẹn ylando tọn de ma tin to Jesu mẹ, ehe Satani sọgan yizan nado deanana ẹn sọta Jiwheyẹwhe. Mọjanwẹ Lẹgba ma na penugo nado hẹn Jesu gbọṣi yọdò mẹ do niyẹn. Etẹwutu? Jesu dọmọ: “Dile Otọ́ lọ ko degbena mi do, mọkẹdẹ wẹ yẹn to wiwà do.” E kudeji dọ Otọ́ etọn na fọ́n ẹn sọnku.—Johanu 14:31.