Konima youvalelo wedimbuluko, Jesus okwa li natango novayapostoli vaye monduda yopombada, nokwe va ladipika a ti: “Inamu kala mwa nyika oluhodi momitima deni, ndele kaleni mu na eitavelo muKalunga nomwaame.” — Johannes 13:36; 14:1.

Jesus okwa li a yandja etomheno la femba kovayapostoli vaye ovadiinini opo vaha kale va nyika oluhodi omolwokuya kwaye, a ti: “Meumbo laTate omu na eenhele dihapu. . . . Ngeenge onda i ndi ke mu longekidile onhele, ohandi ka aluka ndi mu twale keumbo opo nanye mu ka kale apa handi ka kala.” Ashike ovayapostoli vaye kava li ve shii kutya okwa li ta popi shi na sha nokuya kwaye meulu. Tomas okwa pula a ti: “Omwene, ondjila ohatu i shiiva ngahelipi ngeenge katu shii oku to i?” — Johannes 14:2-5.

Jesus okwa nyamukula a ti: “Aame ondjila, noshili nomwenyo.” Ngeenge otwe mu tambula ko ndele hatu tambula ko omahongo aye nokuhopaenena onghedi yaye yokukalamwenyo, opo ashike omunhu ta dulu okuya meumbo laXe lomeulu. Jesus okwa ti: “Kape na ou te uya kuTate, ngeenge ita pitile mwaame.” — Johannes 14:6.

Filippus okwa li ta pwilikine nelitulemo, ndele ta ti: “Omwene, tu ulikila Xo opo tu kale twa mbilipalelwa.” Otashi dulika Filippus a li a hala a monifilwe emoniko kuKalunga, ngaashi Moses, Elia naJesaja. Ashike ovayapostoli ova li ve na shihapu shi dulife omamoniko oo. Jesus okwa divilika oshitwa osho eshi a nyamukula a ti: “Filippus, onda kala nanye efimbo lile, ndele fiyo opaife ku shii nge? Keshe ou a mona nge, okwa mona yo Tate.” Jesus oku na omaukwatya a fa aXe, onghee ngeenge owe mu shiiva, kungaho, owa fa ashike wa shiiva Xe. Oshoshili kutya Xe oku dule Omona, nomolwaasho Jesus a ti: “Oinima ei handi mu lombwele inai dja mwaame mwene, ndele Tate ou e na ekwatafano naame oye ta longo oilonga yaye.” (Johannes 14:8-10) Ovayapostoli ova li va mona kutya Jesus ota yandje efimano kuXe omolwoinima oyo a li ta hongo.

Ovayapostoli vaJesus ova li va mona oikumwifilonga oyo a longa nova uda eshi a li ta udifa onghundana iwa kombinga yOuhamba waKalunga. Opo nee okwe va lombwela a ti: “Keshe ou e na eitavelo mwaame ota ka longa yo oilonga ei handi longo; nota ka longa oilonga inene i dule ei.” (Johannes 14:12) Jesus ka li a hala okutya otava ka longa oikumwifilonga i dule oyo a longa. Ndele ponhele yaasho, okwa li ta ti otava ka longa oilonga yokuudifa oule wefimbo, tava ka udifila ovanhu vahapu nosho yo moitukulwa ihapu.

Okuya kwaJesus ka kwa li kwe va ningifa va kale ve udite va ekelwashi, molwaashi okwe va udanekela a ti: “Ngeenge omwa indile sha medina lange, ohandi shi mu pe.” Okwa weda ko vali a ti: “Ohandi ka indila Tate note ke mu pa vali osho tashi mu kwafele fiyo alushe, omhepo iyapuki oyo tai holola oshili.” (Johannes 14:14, 16, 17) Okwa li e va shilipaleka kutya otava ka mona omhepo iyapuki i li omukwafi wavo. Naasho osho sha li sha ningwa mefiku lOpentekoste.

Jesus okwa ti: “Mafiku ounyuni itau ka mona nge vali, ndele nye otamu ka mona nge, shaashi ondi na omwenyo, nanye otamu ka kala nomwenyo.” (Johannes 14:19) Jesus ka li ashike te ke va holokela molupe lopanhu konima yenyumuko laye, ndele mokweendela ko kwefimbo ote ke va nyumuna va ka kale pamwe naye meulu ve li oishitwa yopamhepo.

Jesus okwe va lombwela oshili, a ti: “Keshe ou ta tambula oipango yange nokudulika kuyo oku hole nge. Keshe ou e hole nge ota ka kala e holike kuTate, naame ohandi ka kala ndi mu hole nohandi ke mu lihololela.” Ndele omuyapostoli Judas, oo ha ifanwa Tadeus, okwa pula a ti: “Omwene, oshike sha ningwa po opo u kale wa hala oku tu lihololela ndele haunyuni?” Jesus okwa nyamukula a ti: “Keshe ou e hole nge, ota diinine eendjovo dange, na Tate ota ka kala e mu hole. . . . Ou iha diinine eendjovo dange, ke hole nge.” (Johannes 14:21-24) Mepingafano novashikuli vaye, ounyuni inau tala ko Jesus e li ondjila, oshili nomwenyo.

Jesus okwa li ta i, ndele ongahelipi ovahongwa vaye va li tava ka dimbuluka oinima aishe oyo a li e va honga? Jesus okwa yelifa a ti: “Omhepo iyapuki, oyo Tate ta ka tuma medina lange i mu kwafele, otai ke mu honga oinima aishe noku mu dimbulukifa aishe oyo nde mu lombwela.” Ovayapostoli ova li va mona eenghono domhepo iyapuki nghee tadi dulu okulonga, nomolwaasho eshilipaleko olo la li tali va hekeleke. Jesus okwa weda ko a ti: “Ohandi mu fiile ombili oyo nde mu pa. . . . Inamu kala mwa nyika oluhodi momitima deni noinamu efa di mbadapale.” (Johannes 14:26, 27) Ovahongwa kava li ve na etomheno lokukala va mbadapala, molwaashi ova li tava ka wilikwa kuXe.

Oumbangi u na sha neameno laKalunga owa li pokulimonikila. Jesus okwa ti: “Omupangeli wounyuni ou ote uya noke na eenghono dokupangela nge.” (Johannes 14:30) Ondiaboli oya li ya nwefa mo Judas. Molwaashi Jesus ka li e na ounghundi washa, Satana ka li a dula oku mu amuna ko kuKalunga. Natango Ondiaboli kai na eenghono dokuningifa Jesus aha nyumuke. Omolwashike mbela? Jesus okwa ti: “Ohandi ningi naanaa ngaashi Tate a lombwela nge.” Okwa li a tomhwa kutya Xe ote ke mu nyumuna. — Johannes 14:31.