ជំពូកទី១១៩
លោកយេស៊ូជាផ្លូវ ជាសេចក្ដីពិត ជាជីវិត
-
លោកយេស៊ូនឹងទៅដើម្បីរៀបចំកន្លែងមួយ
-
លោកសន្យាឲ្យអ្នកជួយមួយដល់ពួកអ្នកកាន់តាមលោក
-
បិតាគឺធំជាងលោកយេស៊ូ
ក្រោយពីពិសាអាហារពិធីរំលឹក លោកយេស៊ូនៅជាមួយនឹងពួកសាវ័កក្នុងបន្ទប់ធំនៅជាន់លើនោះនៅឡើយ។ រួចមកលោកលើកទឹកចិត្តពួកគាត់ថា៖ «កុំឲ្យចិត្តរបស់អ្នករាល់គ្នាថប់បារម្ភឡើយ។ ចូរបង្ហាញជំនឿលើព្រះ ហើយបង្ហាញជំនឿលើខ្ញុំដែរ»។—យ៉ូហាន ១៣:៣៦; ១៤:១
បន្ទាប់មក លោកយេស៊ូផ្ដល់នូវមូលហេតុដែលជួយពួកសាវ័កស្មោះត្រង់មិនឲ្យថប់បារម្ភចំពោះការចាកចេញទៅរបស់លោក។ លោកមានប្រសាសន៍ថា៖ «ក្នុងលំនៅរបស់បិតានៃខ្ញុំមានទីអាស្រ័យជាច្រើន។ . . . ប្រសិនបើខ្ញុំទៅរៀបចំកន្លែងមួយឲ្យអ្នករាល់គ្នា នោះខ្ញុំនឹងមកម្ដងទៀត រួចនឹងទទួលអ្នករាល់គ្នាមកឯលំនៅរបស់ខ្ញុំ ដើម្បីឲ្យអ្នករាល់គ្នានៅកន្លែងដែលខ្ញុំនៅដែរ»។ ក៏ប៉ុន្តែ ពួកសាវ័កមិនយល់ថាលោកកំពុងមានប្រសាសន៍អំពីការទៅស្ថានសួគ៌ឡើយ។ ដូច្នេះ ថូម៉ាស់និយាយទៅកាន់លោកថា៖ «លោកម្ចាស់ យើងមិនដឹងថាលោកនឹងទៅឯណាទេ តើយើងអាចស្គាល់ផ្លូវដូចម្ដេចបាន?»។—យ៉ូហាន ១៤:២-៥
លោកយេស៊ូឆ្លើយតបថា៖ «ខ្ញុំជាផ្លូវ ជាសេចក្ដីពិត និងជាជីវិត។ គ្មានអ្នកណាអាចមកឯបិតានៅស្ថានសួគ៌បានឡើយ លើកលែងតែអ្នកនោះមកតាមខ្ញុំ»។ (យ៉ូហាន ១៤:៦) ដូច្នេះ បុគ្គលម្នាក់អាចចូលក្នុងលំនៅរបស់បិតាលោកនៅស្ថានសួគ៌បាន លុះត្រាតែបុគ្គលនោះទទួលស្គាល់លោកយេស៊ូនិងសេចក្ដីបង្រៀនរបស់លោក ថែមទាំងធ្វើតាមគំរូរបស់លោកក្នុងជីវិត។
ភីលីពកំពុងស្ដាប់លោកយេស៊ូយ៉ាងយកចិត្តទុកដាក់ រួចសូមលោកថា៖ «លោកម្ចាស់ សូមបង្ហាញឲ្យយើងឃើញបិតានៅស្ថានសួគ៌ នោះគ្រប់គ្រាន់ហើយសម្រាប់យើង»។ តាមមើលទៅ ភីលីពចង់ឃើញការបើកបង្ហាញក្នុងគំនិតអំពីព្រះដូចដែលម៉ូសេ អេលីយ៉ា និងអេសាយបានឃើញ។ ក៏ប៉ុន្តែ ពួកសាវ័កមានអ្វីមួយដែលប្រសើរជាងការបើកឲ្យឃើញក្នុងគំនិតទៅទៀត។ លោកយេស៊ូបញ្ជាក់អំពីចំណុចនេះក្នុងចម្លើយរបស់លោកដែលថា៖ «ភីលីព ខ្ញុំបាននៅជាមួយនឹងអ្នករាល់គ្នាយូរហើយ តើអ្នកនៅតែមិនស្គាល់ខ្ញុំឬ? អ្នកណាដែលបានឃើញខ្ញុំ អ្នកនោះបានឃើញបិតាដែលនៅស្ថានសួគ៌ហើយ»។ លោកយេស៊ូបង្ហាញគុណសម្បត្ដិរបស់បិតាលោកយ៉ាងល្អឥតខ្ចោះ ដូច្នេះការដែលពួកសាវ័ករស់នៅជាមួយនឹងលោក ហើយសង្កេតមើលការប្រព្រឹត្តរបស់លោក នោះហាក់ដូចជាពួកគាត់បានឃើញបិតាហើយ។ ប៉ុន្តែ លោកយេស៊ូបញ្ជាក់ថាបិតាគឺធំជាងបុត្រដោយមានប្រសាសន៍ថា៖ «អ្វីៗដែលខ្ញុំប្រាប់អ្នករាល់គ្នា ខ្ញុំមិននិយាយចេញពីខ្លួនខ្ញុំឡើយ»។ (យ៉ូហាន ១៤:៨-១០) ហេតុនេះ ពួកសាវ័កអាចឃើញថាលោកយេស៊ូកំពុងសរសើរតម្កើងបិតារបស់លោក ដោយបញ្ជាក់ថាសេចក្ដីបង្រៀនទាំងអស់ជារបស់បិតាលោក។
ពួកសាវ័ករបស់លោកយេស៊ូបានឃើញលោកធ្វើការអស្ចារ្យជាច្រើន ហើយបានឮលោកប្រកាសដំណឹងល្អអំពីរាជាណាចក្រព្រះ។ ឥឡូវនេះ លោកប្រាប់ពួកគាត់ថា៖ «អ្នកណាដែលបង្ហាញជំនឿលើខ្ញុំ អ្នកនោះនឹងធ្វើការដែលខ្ញុំធ្វើដែរ ក៏នឹងធ្វើការដ៏ធំជាងនោះទៅទៀត»។ (យ៉ូហាន ១៤:១២) លោកយេស៊ូមិនមែនកំពុងមានប្រសាសន៍ថាពួកគាត់នឹងធ្វើអព្ភូតហេតុអស្ចារ្យជាងលោកនោះទេ។ ប៉ុន្តែ ពួកអ្នកកាន់តាមលោកនឹងផ្សព្វផ្សាយដល់មនុស្សច្រើនជាង នៅកន្លែងឆ្ងាយៗជាង និងអស់រយៈពេលយូរជាង។
ទោះបីជាលោកយេស៊ូនឹងចាកចេញពីពួកសាវ័កក៏ដោយ តែលោកនឹងមិនបោះបង់ចោលពួកគាត់ឡើយ ពីព្រោះលោកសន្យាថា៖ «ប្រសិនបើអ្នករាល់គ្នាសុំអ្វីក៏ដោយ ដោយនូវឈ្មោះរបស់ខ្ញុំ នោះខ្ញុំនឹងធ្វើ»។ បន្ថែមទៅទៀត លោកមានប្រសាសន៍ថា៖ «ខ្ញុំនឹងសុំបិតាដែលនៅស្ថានសួគ៌ រួចលោកនឹងឲ្យអ្នកជួយមួយទៀតដល់អ្នករាល់គ្នា ដែលនឹងនៅជាមួយនឹងអ្នករាល់គ្នាជារៀងរហូត ពោលគឺសកម្មពលដែលសម្ដែងពីសេចក្ដីពិត»។ (យ៉ូហាន ១៤:១៤, ១៦, ១៧) លោកសន្យាចំពោះពួកអ្នកកាន់តាមលោកថាពួកគាត់នឹងទទួលអ្នកជួយមួយ ពោលគឺសកម្មពលបរិសុទ្ធ។ ពួកអ្នកកាន់តាមបានទទួលសកម្មពលបរិសុទ្ធនៅបុណ្យថ្ងៃទី៥០។
លោកយេស៊ូមានប្រសាសន៍ថែមទៀតថា៖ «បន្ដិចទៀតពិភពលោកនេះនឹងលែងឃើញខ្ញុំទៀតហើយ ប៉ុន្តែអ្នករាល់គ្នានឹងឃើញខ្ញុំ ពីព្រោះខ្ញុំរស់ ហើយអ្នករាល់គ្នាក៏នឹងរស់ដែរ»។ (យ៉ូហាន ១៤:១៩) ដូច្នេះ លោកយេស៊ូនឹងមិនគ្រាន់តែបង្ហាញខ្លួនឲ្យពួកអ្នកកាន់តាមឃើញក្រោយពីលោកបានត្រូវប្រោសឲ្យរស់ឡើងវិញប៉ុណ្ណោះទេ តែក្រោយមកលោកនឹងប្រោសពួកគាត់ឲ្យរស់ឡើងវិញជាបុគ្គលវិញ្ញាណនៅស្ថានសួគ៌ជាមួយនឹងលោក។
ឥឡូវលោកយេស៊ូបញ្ជាក់សេចក្ដីពិតដ៏ងាយយល់មួយថា៖ «អ្នកណាដែលមានបញ្ញត្ដិរបស់ខ្ញុំហើយប្រព្រឹត្តតាម អ្នកនោះស្រឡាញ់ខ្ញុំ ហើយអ្នកណាដែលស្រឡាញ់ខ្ញុំ អ្នកនោះនឹងទទួលសេចក្ដីស្រឡាញ់ពីបិតារបស់ខ្ញុំ ហើយខ្ញុំនឹងស្រឡាញ់អ្នកនោះ ក៏នឹងបង្ហាញខ្លួនជាចំហឲ្យអ្នកនោះឃើញ»។ ពេលឮដូច្នេះ សាវ័កយូដាសដែលគេហៅថា ថាដេ បាននិយាយទៅកាន់លោកថា៖ «លោកម្ចាស់ តើអ្វីបានកើតឡើងបានជាលោកនឹងបង្ហាញខ្លួនជាចំហឲ្យយើងឃើញ តែមិនបង្ហាញខ្លួនឲ្យពិភពលោកឃើញ?»។ លោកយេស៊ូតបទៅគាត់ថា៖ «ប្រសិនបើអ្នកណាស្រឡាញ់ខ្ញុំ អ្នកនោះនឹងប្រព្រឹត្តតាមពាក្យរបស់ខ្ញុំ ហើយបិតារបស់ខ្ញុំនឹងស្រឡាញ់អ្នកនោះ . . . អ្នកណាដែលមិនស្រឡាញ់ខ្ញុំ អ្នកនោះមិនប្រព្រឹត្តតាមពាក្យរបស់ខ្ញុំឡើយ»។ (យ៉ូហាន ១៤:២១-២៤) ផ្ទុយពីពួកអ្នកកាន់តាមលោកយេស៊ូ មនុស្សជាទូទៅមិនទទួលស្គាល់លោកថាជាផ្លូវ ជាសេចក្ដីពិត និងជាជីវិតនោះទេ។
លោកយេស៊ូនឹងចាកចេញទៅ ដូច្នេះតើតាមរបៀបណាពួកអ្នកកាន់តាមអាចនឹកចាំនូវអ្វីទាំងអស់ដែលលោកបានបង្រៀនពួកគាត់? លោកយេស៊ូពន្យល់ថា៖ «អ្នកជួយដែលជាសកម្មពលបរិសុទ្ធរបស់ព្រះ ដែលបិតានៅស្ថានសួគ៌នឹងចាត់ឲ្យមកក្នុងឈ្មោះខ្ញុំ នឹងបង្រៀនអ្នករាល់គ្នានូវអ្វីៗទាំងអស់ ហើយធ្វើឲ្យអ្នករាល់គ្នានឹកឃើញអ្វីៗដែលខ្ញុំបានប្រាប់»។ ពួកសាវ័កបានឃើញថាសកម្មពលបរិសុទ្ធគឺខ្លាំងក្លា ដូច្នេះប្រសាសន៍របស់លោកយេស៊ូពិតជាសម្រាលទុក្ខពួកគាត់មែន។ លោកយេស៊ូមានប្រសាសន៍បន្ថែមថា៖ «ខ្ញុំបន្សល់សេចក្ដីសុខសាន្តទុកឲ្យអ្នករាល់គ្នា។ . . . កុំឲ្យចិត្តរបស់អ្នករាល់គ្នាថប់បារម្ភឡើយ ហើយកុំមានចិត្តរួញរាដែរ»។ (យ៉ូហាន ១៤:២៦, ២៧) ហេតុនេះ ពួកអ្នកកាន់តាមលោកយេស៊ូមានមូលហេតុជាច្រើនដែលជួយពួកគាត់មិនឲ្យថប់បារម្ភ ពីព្រោះពួកគាត់នឹងទទួលការណែនាំ ថែមទាំងការការពារពីបិតារបស់លោក។
មិនយូរក្រោយមក ពួកអ្នកកាន់តាមលោកយេស៊ូនឹងឃើញថាព្រះការពារអ្នកបម្រើរបស់លោក។ លោកយេស៊ូមានប្រសាសន៍ថា៖ «អ្នកគ្រប់គ្រងពិភពលោកនេះជិតមកដល់ហើយ។ អ្នកនោះមិនមានអំណាចលើខ្ញុំទេ»។ (យ៉ូហាន ១៤:៣០) មេកំណាចបានមានឥទ្ធិពលមកលើយូដាស។ ប៉ុន្តែ លោកយេស៊ូគ្មានភាពទន់ខ្សោយដែលមកពីភាពខុសឆ្គងដែលសាថានអាចប្រើ ដើម្បីធ្វើឲ្យលោកក្បត់ព្រះឡើយ។ ម្យ៉ាងទៀត មេកំណាចក៏មិនអាចរារាំងការដែលព្រះប្រោសលោកយេស៊ូឲ្យរស់ឡើងវិញដែរ។ ហេតុអ្វី? ពីព្រោះលោកយេស៊ូបញ្ជាក់ថា៖ «ខ្ញុំកំពុងធ្វើអ្វីដែលបិតានៅស្ថានសួគ៌បានបង្គាប់ខ្ញុំឲ្យធ្វើ»។ ដូច្នេះ លោកជឿជាក់ថាបិតានឹងប្រោសលោកឲ្យរស់ឡើងវិញ។—យ៉ូហាន ១៤:៣១
