Jesu inze asali ni baapositola bahae mwa muzuzu wa kwahalimu ili hamulaho wa sico sa kupuzo, ubasusueza kuli: “Musike mwatuhelela lipilu zamina kuziyeleha. Mubonise tumelo ku Mulimu; mubonise tumelo ni ku na.”—Joani 13:36; 14:1.

Jesu ufa baapositola bahae babasepahala libaka habasa swaneli kuziyeleha hamulaho wa kufunduka kwahae, uli: “Mwa ndu ya Ndate kunani libaka za kuina zeñata. . . . Haiba niya kuyo milukiseza sibaka, nikakuta mi nika miamuhela haesu, kuli koniinzi ni mina mube kwateñi.” Kono baapositola habalemuhi kuli utalusa za kuya kwa lihalimu. Tomasi ubuza kuli: “Mulena, haluzibi kouya. Lukona kuziba cwañi nzila yeya kwateñi?”—Joani 14:2-5.

Jesu ualaba kuli: “Ki na nzila ni niti ni bupilo.” Mutu ukona kukena mwa ndu ya Mulimu haiba aamuhela Jesu ni lituto zahae ni kulikanyisa mupilelo wahae. Jesu uli: “Hakuna yataha ku Ndate haisi ka na.”—Joani 14:6.

Filipi uteeleza ka tokomelo, mi ukupa kuli: “Mulena, lubonise Ndate, mi kukalikana ku luna.” Kubonahala kuli Filipi ubata kubona lisupo zebonisa kubateñi kwa Mulimu sina zanaabonisizwe Mushe, Elia, ni Isaya. Kono baapositola babona zetuna kufita lipono zeo. Jesu ubonisa cwalo ka kualaba kuli: “Niha seniinzi ni mina nako ye kaufela, kana hausika niziba Filipi? Mutu kaufela yaniboni uboni ni Ndate.” Jesu ubonisa hande tulemeno twa Mulimu, ka mukwa ocwalo, kupila ni Jesu ni kubona zasweli kueza kuswana feela ni kubona Ndate. Nihakulicwalo, Ndate ki yomutuna ku Mwana, kakuli Jesu uli: “Litaba zeni mibulelela haniipuleleli zona na muñi.” (Joani 14:8-10) Baapositola bakona kulemuha kuli lituto za Jesu kaufela lizwa ku Ndatahe.

 Baapositola ba Jesu baiponezi yena inze aeza limakazo zetuna, mi baikutwezi yena inze akutaza taba yende ka za Mubuso wa Mulimu. Cwale ubabulelela kuli: “Mutu kaufela yabonisa tumelo ku na ni yena ukaeza misebezi yenieza; mi ukaeza misebezi yemituna hahulu kufita ye.” (Joani 14:12) Jesu haatalusi kuli bakaeza limakazo zetuna kufita zaezize. Kono bona bakakutaza ka nako yetelele, mwa libaka zetuna, ni kwa batu babapila kwa libaka za kwahule.

Jesu nihafunduka cwalo haana kubayubeka, kakuli uli: “Haiba mukupa nto ifi kamba ifi ka libizo laka, nika ieza.” Hape, uli: “Nikakupa Ndate mi uka mifa mutusi yomuñwi kuli abe ni mina kuya kuile, ona moya wa niti.” (Joani 14:14, 16, 17) Ubasepisa kuli bakaamuhela moya okenile, yena mutusi yomuñwi. Seo sikaezahala fa lizazi la Pentekota.

Jesu uli: “Kusiyezi nakonyana mi lifasi halina kunibona hape, kono mina muka nibona, kakuli napila mi ni mina mukapila.” (Joani 14:19) Jesu ukabonahala ku bona hakazuswa kwa bafu, mi hamulaho wa nako uka bazuseza kwa bupilo bwa kwa lihalimu sina libupiwa za moya kuli bayo ba ni yena.

Cwale Jesu ubulela taba yebunolo uli: “Mutu kaufela yanani milao yaka mi aimamela ki yena yanilata. Mi mutu kaufela yanilata ukalatwa ki Ndate, mi nika mulata, mi nikaiponahaza patalaza ku yena.” Hautwa cwalo, Judasi yabizwa hape kuli Tadea, ubuza kuli: “Mulena, kuezaheziñi kuli ulele kuiponahaza patalaza ku luna mi isiñi kwa lifasi?” Jesu ualaba kuli: “Haiba mutu wanilata, ukamamela linzwi laka, mi Ndate uka mulata . . . Mutu kaufela yasa nilati hamameli manzwi aka.” (Joani 14:21-24) Lifasi halilemuhi kuli Jesu ki yena nzila, niti, ni bupilo sina balutiwa bahae.

Jesu waikela, cwale balutiwa bahae baka kona cwañi kuhupula lika kaufela zabalutile? Jesu uli: “Kono mutusi, ona moya okenile, waka milumela Ndate ka libizo laka, ona uka miluta lika kaufela ni kumihupulisa lika kaufela zeni mibulelezi.” Baapositola baiponezi moubelekela moya okenile, kacwalo, baomba-ombiwa ki sepiso ye. Jesu uekeza kuli: “Nimisiyela kozo; nimifa kozo yaka. . . . Musike mwatuhelela lipilu zamina kuziyeleha kamba kulituhelela kukenelwa ki sabo.” (Joani 14:26, 27) Kacwalo, baapositola banani libaka habasa swaneli kuziyeleha, kakuli bakaetelelwa ni kusilelezwa ki Ndatahe Jesu.

Baapositola batuha baiponela bupaki bwa kusilelezwa ki Mulimu. Jesu uli: “Mubusi wa lifasi wataha, mi haakoni kuniswala.” (Joani 14:30) Diabulosi naakonile kukena ku Judasi ni kumuzamaisa. Kono Jesu haana bufokoli bwa kueza sibi bobukona kutahisa kuli Satani amutahiseze kukwenuhela Mulimu. Mi Diabulosi haana kukona kubulaya Jesu kuya kuile. Ki kabakalañi hakusicwalo? Jesu uli: “Nieza sina mwanilaelezi Ndate.” Unani buikolwiso bwa kuli Ndatahe uka muzusa kwa bafu.—Joani 14:31.