Omu Yesu akumishile kulinga chilika chakwanuka kufwa chenyi, apwile lika mukapete kahelu natumbaji twenyi. Kaha avakolezezele ngwenyi: “Michima yenu kanda nayilizakaminako. Fwelelenu muli Kalunga, fwelelenu nawa muli ami.”—Yowano 13:36; 14:1.

Yesu alwezele tumbaji twenyi vakushishika vyuma vyatelelele kuvalingisa vahone kulinyenga, ambile ngwenyi: “Muzuvo yaTata muli vihela vyakutwama vyavivulu. . . . Nge ngunayi nakumiwahishila chihela chenu, nangwiza cheka nakumitambula mukatwame kuze ngwatwama ami, mangana kuze nguli ami nayenu nawa mukatwamengako.” Oloze vaposetolo jenyi kavatachikijile ngwavo Yesu apwile nakuhanjika vyakuya mwiluko. Ngocho Tomase ehwile ngwenyi: “Ove Mwata, etu katwatachikijile okwo uli nakuyako. Nyi jila natuyitachikiza ngachilihi?”—Yowano 14:2-5.

Yesu amukumbulwile ngwenyi: “Ami yami Jila, yami Muchano, yami Kuyoya.” Chuma chasakiwile hakwingila muzuvo yaIse mwilu shina kumwitavila nakwitavila vyuma anangwilenga nakulondezeza jila ayoyelelengamo. Yesu ambile ngwenyi: “Mutu naumwe wauchi mweza kuli Tata kuvanga ahichile muli ami.”—Yowano 14:6.

Fwilipu uze apwile nakwivwilila chikuma, ambile ngwenyi: “Ove Mwata, tulweze Iso, kaha kunahu.” Atela Fwilipu asakile kumona chakumwenesa chaKalunga, ngana muze vachimwenesele Mose, naElija, naIsaya. Chipwe ngocho, vaposetolo vapwile navyuma vyavilemu kuhambakana vize vyakumwenesa. Yesu ashindakanyine chishina kana hakwamba ngwenyi: “Ove Fwilipu, elu lwola lwalusuku ngunatwame nayenu, kumana noholyapwa kanda uchingutachikize nyi? Weshowo nangumono ami namono naTata nawa.” Yesu asolwele vilinga vize atwama navyo Ise, ngocho kupwa naYesu nakumona vyuma alingilenga chapwile kwijiva nge vanamono Ise. Chikupu vene Ise apwa wamulemu kuhambakana Mwana. Yesu ambile ngwenyi: “Vyuma ngweji kuhanjikanga kuli enu, kavyapwa vyayami iveneko.” (Yowano 14:8-10) Ngocho, vaposetolo vamwene nge Yesu alishilenga chikuma Ise hauhashi wenyi wakunangula.

Vaposetolo jaYesu vamwene omu alingilenga vyuma vyakukomwesa nakwivwa omu ambulwilenga mujimbu wamwaza waWangana waKalunga. Kaha avalwezele ngwenyi: “Weshowo mwangufwelela,  mwazatanga nawa milimo ngweji kuzatanga ami. Mwazatanga milimo yakuhambakana hali eyi.” (Yowano 14:12) Yesu kalumbunwine nge navakalinga vyuma vyakukomwesa chikuma kuhambakana vize alingileko. Oloze apwile nakulumbununa nge navakambulula mujimbu hatando yayisuku nakuvihela vyavivulu chikuma nakuvatu vavavulu.

Kuya chaYesu kachasolwele nge aliwile tumbaji twenyiko, mwomwo avashikile ngwenyi: “Kachi nge namulomba chuma chimwe mulijina lyami, nanguchilinga.” Kaha ambile cheka ngwenyi: “Ami nangumulomba Tata, kaha ikiye mwamihana muka-kumikafwa weka mangana atwamenga nayenu haya myaka yosena, yikiko shipilitu yamuchano.” (Yowano 14:14, 16, 17) Yesu avafwelelesele ngwenyi navakatambula shipilitu yajila yize nayivakafwanga. Chuma kana chasolokele haIikumbi lyaPendekoseta.

Yesu ambile ngwenyi: “Namuhita katando kakandende, kaha kaye kakeshi kungumona chekako, oloze enu namungumonanga, mwomwo ami ngwayoya, kaha nayenu nawa namuyoyanga.” (Yowano 14:19) Yesu kambile kaha ngwenyi navakamumona omu mwakasangukako, oloze ambile nawa ngwenyi mukuhita chalwola mwakavasangula nakukatwama naikiye mwilu kupwa vaka-kuyoya vakushipilitu.

Jino Yesu avalwezele muchano wawashi kwivwishisa hakwamba ngwenyi: “Weshowo etavila jishimbi jami nakujilamanga, ou ikiye anguzanga ami. Kaha nawa weshowo anguzanga ami, navamuzanga kuli Tata, kaha ami nawa nangumuzanga nakulisolola hatoma kuli ikiye.” Ngocho kaposetolo Yuta uze vavulukile cheka ngwavo Tateu, ahulishile ngwenyi: “Ove Mwata, ika uli nakusakila kulisolola hatoma kuli etu kaha, oloze kukaye chiku?” Yesu akumbulwile ngwenyi: “Kachi nge mutu anguzanga, mwalamanga mazu ami, kaha navamuzanga kuli Tata . . . Weshowo azeneka kunguzanga ami keshi kulama mazu amiko.” (Yowano 14:21-24) Vaka-kaye kavatachikijile ngwavo Yesu ikiye jila, ikiye muchano, ikiye kuyoya, ngana muze vamutachikijila kuli vaka-kumukavangizako.

Yesu apwile kwakamwihi nakuya, kaha tumbaji twenyi vahashile kwanuka ngachilihi vyuma vyosena vize avanangwile? Yesu ambile ngwenyi: “Muka-kumikafwa, shipilitu yajila, yize Tata mwakatuma mulijina lyami, ou ikiye vene mwakaminangulanga vyuma vyosena, nakumyanukisanga vyosena vize ngwamilwezelenga.” Vaposetolo vamwene omu shipilitu yajila yazachilenga milimo yangolo, ngocho mazu avashikile Yesu atela avakolezezele chikuma. Yesu atwalileho ngwenyi: “Nangumisela kuunda, nangumihana vene kuunda chami. . . . Michima yenu kanda nayilizakamina, chipwe kulizuzukila nawomako.” (Yowano 14:26, 27) Ngocho vaposetolo kavatelele kulizuzukila nawomako mwomwo Yesu avashikile nge Ise mwakavatetekela nakuvakinga.

Kakwatelele kuhita shimbu yayisuku numba vamone mukingo waKalungako. Yesu ambile ngwenyi: “Muka-kuyula kano kaye ali nakwiza, kaha keshi nangolo hali amiko.” (Yowano 14:30) Liyavolo ahashile kwingila mumuchima waYuta nakumuhungumwisa. Oloze Yesu kapwile nashili yize nayilingisa Satana awane kengililo kakumufungulula alikange kuli Kalungako. Kaha nawa Liyavolo kapwile nangolo jakuhonesa Yesu kumusangulako. Mwomwo ika? Yesu ambile ngwenyi: “Nguli nakulinga nge muze angulwezele Tata.” Chikupu vene, Yesu enjikijile ngwenyi Ise mwamusangula.—Yowano 14:31.