Legan a wala nid tagey a kuarto si Jesus a kaiba iray apostol to kayari pangdem ed memoryal, pinaseseg to ra: “Agyo aabuloyan a nagonigon so kapusoan yo. Ipatnag yoy pananisia ed Dios; ipatnag yo met so pananisia ed siak.”​—Juan 13:36; 14:1.

Imbaga nen Jesus ed saray matoor ya apostol to no akin ya ag-ira nepeg a nagonigon ed iyalis to: “Dakel so napanayaman ed abung nen Amak. . . . No niparaan ko la imay pasen parad sikayo, ompawil ak tan awiten ta kayod ayaman ko, pian no iner so kawalaan ko et wadman kayo met.” Balet ag-atalosan na saray apostol ya say tutukoyen to et say iyakar tod tawen. Kanian tinepet nen Tomas: “Katawan, agmi amta no iner so laen mo. Panon min naamtaan so dalan?”​—Juan 14:2-5.

Inmebat si Jesus: “Siak so dalan tan say katuaan tan say bilay.” Say sakey et makaloob labat ed abung nen Ama to diad tawen no awaten toy Jesus tan saray bangat to tan aligen toy kabibilay to. Imbaga nen Jesus: “Anggapoy makasabi ed Ama no aliwan diad panamegley ko.”​—Juan 14:6.

Diad saman et ondedengel a maong si Felipe, tan oniay kinerew to: “Katawan, ipanengneng mod sikami so Ama, tan magenap la itan ed sikami.” Singa labay nen Felipe ya manpanengneng so Dios, a singa diad saray pasingawey ed si Moises, Elias, tan Isaias. Balet, mas maabig ni naeksperiensya na saray apostol nen say pakanengneng na saray ontan a pasingawey. Impabitar itan nen Jesus diad ebat to: “Anggano abaybayag ta kayo lan kaiba, agmo ak nin siansia kabat, Felipe? Siopaman ya akanengneng ed siak et anengneng to met lay Ama.” No antoy personalidad na Ama et nanengneng a mismo ed si Jesus; kanian, siopaman a nakaiba toy Jesus tan makaobserba ed sikato et singa to met la anengneng so Ama. Siempre, say Ama et mas atagey nen say Anak, ta imbaga nen Jesus: “Saray ibabagak ed sikayo et agko ibabaga unong ed dilin kanonotan ko.” (Juan 14:8-10) Amta na saray apostol ya amin ya ibabangat nen Jesus et bibidbiren ton manlalapud Ama to.

Anengneng na saray apostol so panggagawa  nen Jesus na makapakelaw iran bengatla tan arengel day pangipupulong to na maong a balita na Panarian na Dios. Natan et imbaga tod sikara: “Siopaman a mangipapatnag na pananisia ed siak et gawaen to met iray kimey a gagawaen ko; tan gawaen to iray kimey a mas baleg nen saraya.” (Juan 14:12) Aglabay ya ibaga nen Jesus a manggawa ira na mas makapakelaw iran bengatla nen say ginawa to. Imbes, say ministeryo ra et gawaen da diad mas mabayag a panaon, mas malaknab a pasen, tan mas dakdakel a totoo.

Anggano onalis lay Jesus, agto paulyanan iray apostol to, ta insipan to: “No onkerew kayo na antokaman diad ngaran ko, gawaen ko itan.” Inkuan to ni: “Onkerew ak ed Ama tan ikdan to kayo na sakey nin mananulong a nakaiba yo ed andi-anggaan, say espiritu na katuaan.” (Juan 14:14, 16, 17) Pinaseguroan to ra a makaawat iray masanton espiritu, a sakey nin mananulong. Nagawa itan diad agew na Pentecostes.

“Agla manbayag,” kuan nen Jesus, “et agak la nanengneng na mundo, balet nanengneng yo ak, lapud mabilay ak tan manbilay kayo.” (Juan 14:19) Aglabat manpanengneng si Jesus ed sikara diad pisikal kayari kioli to, noagta onsabi panaon et sikaray paolien to pian nakaiba to rad tawen bilang espiritu.

Natan et imbaga nen Jesus iyan simplin katuaan: “Siopaman a mangaawat ed saray ganggan ko tan manguunor ed saratan, aaroen to ak. Tan siopaman a mangaaro ed siak et aroen nen Amak, tan sikatoy aroen ko tan nakabat to ak a maong.” Diad saya et tinepet nen Judas, a manngaran met na Tadeo: “Katawan, akin et labay mon ipakabat a maong so sarilim ed sikami, aliwan ed saray totoo ed mundo?” Inmebat si Jesus: “Siopaman a mangaaro ed siak, unoren toy salitak, tan sikatoy aroen na Amak . . . Siopaman ya agmangaaro ed siak et agto uunoren iray salitak.” (Juan 14:21-24) Aliwan singa saray papatumbok to, agbibidbiren na mundo a si Jesus so dalan, say katuaan, tan say bilay.

Natan ta onalis lay Jesus, panon ya nanonotan na saray disipulo to so amin ya imbangat tod sikara? Imbaga nen Jesus: “Say mananulong, say masanton espiritu, ya ibaki na Ama diad ngaran ko, so mangibangat ed sikayo na amin a bengatla tan mangipanonot ed sikayo ed amin ya imbagak ed sikayo.” Anengneng la na saray apostol no panon kabiskeg so masanton espiritu, kanian seguradon aligliwa ira ed sayan panamaseguro. Imbaga ni nen Jesus: “Itilak kod sikayo so kareenan ya iter ko. . . . Agyo aabuloyan a nagonigon odino ontakot so kapusoan yo.” (Juan 14:26, 27) Kanian agnepeg a nagonigon odino manpaga iray disipulo​—makaawat ira na panangiwanwan tan proteksion na Ama nen Jesus.

Magano lan nanengneng so ebidensya na proteksion na Dios. Imbaga nen Jesus: “Onsasabi lay manuley na mundo, tan agto ak nayarian a kontrolen.” (Juan 14:30) Say Diablo et linmoob ed si Judas tan kinontrol to. Balet anggapoy kakapuyan nen Jesus ya naanamot nen Satanas pian naimpluensyaan ton onsumpad Dios. Tan agmet nayarian na Diablo a kontrolen si Jesus anggan diad ipapatey. Akin? Imbaga nen Jesus: “Gagawaen ko so ingganggan ed siak na Ama.” Segseguradoy Jesus a sikatoy paolien nen Ama to.​—Juan 14:31.