Wañukusqanta yuyarinapaq cenata mikuruspankum Jesusqa apostolninkunata kallpanchananpaq huñunakusqanku wasipa altosninpi nirqa: “Amayá sunquykichikqa hukmanyachunchu, Diospiyá hinalla iñiychik, chaynallataqyá ñuqapipas iñiychik”, nispa (Juan 13:36; 14:1).

Chaymi paykunawan manaña kaptin ama llumpayta hukmanyarunankupaq nirqaraq: “Taytaypa wasinpiqa achkam yachanapaq wasikuna kachkan [...]. Sichum risaq hinaspa qamkunapaq sitiota allichamusaq hinaspayqa kaqmantam hamusaq, hinaspam wasiyman pusasqaykichik maymi kasqaypi qamkunapas kanaykichikpaq”, nispa. Chaynata Jesus nispanqa rimachkarqa hanaq pachaman kutinanmantam, apostolninkunam ichaqa mana chaytaqa entienderqakuchu. Chaymi Tomas nirqa: “Señor, manam yachanikuchu mayman risqaykitaqa. Hinachkaspaqa, ¿imaynamá ñantaqa riqsiymanku?”, nispa (Juan 14:2-5).

Jesusñataqmi nirqa: “Ñuqam kani ñan, chiqap kaq chaynataq kawsay quqpas”, nispa. Jesuspa yachachisqankunata kasukuspa payta qatipakuqkunallam taytanpa yachanan hanaq pachamanqa rinmanku. Chaymi nirqa: “Ñuqantakamallam pipas taytaymanqa asuykun”, nispa (Juan 14:6).

Jesuspa chayna nisqantam Felipe allinta uyarichkarqa, chaymi nirqa: “Señor, taytaykitayá qawaykachiwayku hinaptinqa chayllapaqñam kaniku”, nispan. Felipeqa yaqachusmi munarqa Dios rikuriykunanta, imaynam Moisesman, Eliasman hinaspa Isaiasman rikuriykusqanman hina. Chaymi Jesusñataq nirqa: “¿Kaychikan tiempoña qamkunawan kachkaptiychu Felipe manaraq riqsiwanki? Ñuqata rikuwaqniyqa taytaytapas rikurunñam”, nispa. Jesusqa imayna kasqanpim taytan hina karqa, chaymi Jesusta rikuqkunaqa taytantapas rikuchkanmanku hina karqa. Chaywanpas Jehova Diosqa Jesusmanta aswan atiyniyuqmi, chaymi Jesusqa nirqa: “Tukuy imata qamkunaman nisqaytaqa manam kikillaymantachu rimani”, nispa (Juan 14:8-10). Apostolninkunaqa sutillatam qawarqaku imamanta yachachispanpas Jesusqa Jehova Diosta hatunchasqanta.

Paykunaqa Jesuspa tukuy ruwasqankunatam qawarqaku, hinaspapas Diosmanta willakusqankunatam uyarirqaku. Chaymi Jesus nirqa: “Pipas ñuqapi iñiqqa ñuqapa ruwasqaykunatapas ruwanqam, taytayman risqayraykum ruwasqaykunamantapas aswan mastaraq ruwanqa”, nispa (Juan 14:12). Chaynata nispanqa manam paymanta  mastaraq apostolninkuna milagrokunata ruwanankumantachu nichkarqa, aswanqa apostolninkuna aswan achka watakuna, aswan achka llaqtakunapi hinaspa achka runakunaman Jehova Diosmanta willakunankumantam nichkarqa.

Jesus pasakuptinpas apostolninkunaqa manam sapallankuchu qiparunanku karqa, Jesusqa nirqam: “Ñuqapa sutiypi imatapas mañakuptikichikqa ruwasaqmi”, nispa. Chaymantapas nirqam: “Ñuqam taytayta mañakusaq hinaptinmi ñuqamanta huk yanapasuqnikichikta qusunkichik chaynapi wiñaypaq qamkunawan kananpaq. Chayqa chiqap kaqmanta willakuq chuya espiritum”, nispa (Juan 14:14, 16, 17). Chayna nisqanwanmi apostolninkunaqa mana iskayrayanankuchu karqa ‘yanapaqninku’ chuya espirituta chaskinankumantaqa. Chuya espiritutaqa chaskirqakum pentecostes nisqanku huñunakuypi.

Chaymantam nirqa: “Manam unayñachu runakunaqa rikuwanqa, qamkunam ichaqa rikuwankichik. Ñuqa kawsasqayraykum qamkunaqa kawsankichik”, nispa (Juan 14:19). Chaywanqa nichkarqa kawsariramuspan aycha cuerpopiraq apostolninkunaman rikuriykunantam, hinaspa wañukuspankuqa kuska kanankupaq hanaq pachapaq kawsarichinanmantam.

Hinaspapas Jesusqa nirqam: “Kamachisqaykunata yachaspan kasukuqqa kuyawaqniymi. Kuyawaqniytaqa taytaypas kuyanqataqmi, ñuqapas paytaqa kuyasaqmi hinaspam sumaqta riqsichikusaq”, nispa. Chaymi qatiqnin Judas Tadeo tapurqa: “Señor, ¿imanasqataq ñuqaykumanqa sumaqta riqsichikunki, runakunamanñataq mana riqsichikunkichu?”, nispa. Hinaptinmi Jesusñataq nirqa: “Pipas kuyawaspanqa nisqaykunatam kasukunqa, paytaqa taytaypas kuyanqam [...]. Pipas mana kuyawaqniyqa manam nisqaykunataqa kasukunchu”, nispa (Juan 14:21-24). Qatiqninkunaqa riqsikuqkum Jesusqa ñan, chiqap kaq chaynataq kawsay qukuq kasqanta, paymanta iskayrayaq runakunam ichaqa mana.

Jesus pasakuptinqa, ¿imaynatataq qatiqninkunaqa tukuy yachachisqankunata yuyarinmanku karqa? Jesusmi nirqa: “Taytaymi sutiypi kachamunqa yanapasuqnikichik chuya espirituta, paymi tukuy imata yachachisunkichik hinaspa yuyarichisunkichik tukuy ima rimapayasqaykunata”, nispa. Chaynata nisqanwanmi apostolkunaqa hawkayaykurqaku, paykunaqa qawarqakuñam chuya espiritu yanapaptin Jesuspa tukuy ima ruwasqanta. Jesusqa nirqataqmi: “Hawka kaytam saqikichik, hawkayayniytam quykichik. [...] Amayá llakikuychikchu nitaq manchakuychikchu”, nispa (Juan 14:26, 27). Jesuspa qatiqninkunaqa manam imamantapas llakikunankuchu karqa, paykunataqa Jehova Diosmi yachachinan hinaspa yanapanan karqa.

Manapas unaymantam apostolkunaqa qawananku karqa Jehova Dios imayna yanapasqanta. Chaymi Jesus nirqa: ‘Kay pachata kamachiqmi hamuchkan. Payqa manam ñuqataqa munaychakuwanchu’, nispa (Juan 14:30). Diabloqa Judastam munaychakururqa, Jesustam ichaqa mana atirqachu Jehova Diosta tukuy imapi kasukusqanrayku. Satanasqa manataqmi harkakuyta atirqachu Jesusta Dios kawsarichinantaqa. ¿Imanasqa? Jesusmi nirqa: ‘Taytaypa kamachiwasqanman hinam imam kaqta ruwachkani’, nispa. Kasukusqanraykum Jesusqa mana iskayrayarqachu taytan kawsarichinanmantaqa (Juan 14:31).