Nuuruʼ Jesús ne ca apóstol stiʼ ndaaniʼ cuartu que. Despué de gudoxhícabe ne gúdxibe laacaʼ guietenaláʼdxicaʼ guendaguti stibe, guluube gana laacaʼ ne gúdxibe laacaʼ: «Cadi guiuubaʼ ladxidoʼto. Lagapa fe Dios, ne lagapa fe naa» (Juan 13:36; 14:1).

Gudxi Jesús ca apóstol stiʼ cadi tan chuʼcaʼ xizaa ora maʼ chebe: «Ra lidxi Bixhozeʼ nuu stale lugar ra cuézatu. [...] Ne ora maʼ guyaaʼ ne maʼ bineʼ preparar ti lugar para laatu, zabiguetaʼ ne naa piaʼ zadxagaluáʼ laatu ra yoo, ti chuʼtu ra nuaaʼ». Peru cadi cayene ca apóstol que paraa nga caniʼbe chebe. Ngue runi gunabadiidxaʼ Tomás laabe: «Señor, qué gánnadu paraa cheluʼ. ¿Ximodo nga naluʼ nánnadu neza ca yaʼ?» (Juan 14:2-5).

Para bicabi Jesús laabe: «Naa nga neza, ni dxandíʼ ne guendanabani». Ca ni guni cré Jesús ne ca ni rusiidiʼ ne chinanda ejemplu stibe, zanda chuʼ ra nuu Bixhózebe ni nuu guibáʼ. Bisiene Jesús: «Guirutiʼ zanda cheʼ ra nuu Bixhozeʼ pa cadi pur naa» (Juan 14:6).

Cumu cucaadiaga Felipe ni caniʼbe que la? gúdxibe Jesús: «Señor, biluíʼ laadu Bixhózeluʼ, ne maʼ ngasi». Zándaca nuube guluíʼ Jesús laabe Dios lu ti visión casi biʼyaʼ Moisés, Elías ne Isaías. Peru jma galán ni napa ca apóstol riʼ que ti visión. Bisiene Jesús ni ora gudxi laacabe: «Biaa padxí nuaaniaʼ laatu, ¿nin né zacá caʼruʼ gunibiaʼluʼ naa la? Felipe. Ni maʼ biiyaʼ naa la? laaca maʼ biiyaʼ Bixhozeʼ». Cumu rusihuinni Jesús ca cualidad stiʼ Bixhoze la? casi ñaca maʼ biiyacabe Bixhózebe biaʼ tiempu maʼ bibaninécabe laabe. Peru nánnanu jma napa Bixhózebe poder que laabe, ngue runi guníʼ Jesús: «Cadi naa diaʼ riguixheʼ guiráʼ ni rabeʼ laatu, sínuque Bixhozeʼ» (Juan 14:8-10). Biiyaʼ ca apóstol que bisisaca Jesús Bixhoze purtiʼ laa nga bisiidiʼ laabe guiráʼ ni cusiidibe.

Maʼ biiyacabe biʼniʼ Jesús stale milagru ne maʼ  binadiágacabe biʼniʼ predicarbe ca noticia galán stiʼ Reinu stiʼ Dios. Yanna gudxi Jesús laacabe: «Guiráʼ tu gapa fe naa laaca zuni ni cayuneʼ» (Juan 14:12). Cadi caníʼ diʼ Jesús, zúnicabe milagru jma naroʼbaʼ que ni biʼniʼ. Ni caniʼbe nga, jma stale tiempu zuni predicarcaʼ, zinecaʼ stiidxabe jma zitu ne zuni predicarcaʼ jma stale binni.

Neca maʼ cheʼ Jesús peru qué ziaana ca apóstol que stúbicaʼ purtiʼ gúdxibe laacaʼ: «Pa guinábatu xiixa lu laʼyaʼ la? zuneʼ ni». Ne dede gúdxibe laacaʼ: «Ne zanabaʼ Bixhozeʼ gudii laatu sti ayudante ni guiaanané laatu para siempre: espíritu santu ni rusihuinni ni dxandíʼ» (Juan 14:14, 16, 17). Gudxi Jesús laacabe ziuu «sti ayudante» zacané laacabe ne laani nga espíritu santu. Ne bizaaca ni lu Pentecostés.

Ne gúdxiruʼ Jesús laacabe: «Xcaadxi si maʼ qué zuuyaʼ binni naa, peru laatu zuuyatu naa, purtiʼ nabaneʼ ne laatu laaca zabánitu» (Juan 14:19). Cadi cayabi si Jesús laacabe zahuinni nezalúcabe gati si, sínuque zandisaʼ Jesús laacabe né ti cuerpu de espíritu ne zacá chuʼnécabe laabe guibáʼ.

De raqué gudxi Jesús laacabe ti cosa nabé risaca: «Guiráʼ tu guicaa ca mandamientu stinneʼ ne guni ni ná ni la? nga nga ni nadxii naa. Ne tu nadxii naa la? laaca zannaxhii Bixhozeʼ laa, ne naa laaca zannaxhieeʼ laa ne zacaniaʼ laa gunibiáʼ chaahuiʼ naa». Óraque gunabadiidxaʼ Judas Tadeo laabe: «Señor, ¿xi guca pue? ¿Xiñee laasidu chigacaneluʼ gunibiáʼ chaahuidu lii ne cadi guiráʼ binni yaʼ?». Para bicabi Jesús laabe: «Pa nadxii tuuxa naa la? zuzuubaʼ stiidxaʼ. Ne zannaxhii Bixhozeʼ laa [...]. Tu cadi nadxii naa qué zuzuubaʼ stiidxaʼ» (Juan 14:21-24). Ca ni cadi naca xpínnibe qué gánnacaʼ pa Jesús nga neza, ni dxandíʼ ne guendanabani.

Yanna cumu maʼ cheʼ Jesús, ¿ximodo guietenalaʼdxiʼ ca discípulo stibe guiráʼ ni maʼ bisiidibe laacaʼ yaʼ? Laabe bisiénebe: «Zuseendaʼ Bixhozeʼ espíritu santu lu laʼyaʼ para gacané laatu, zusiidiʼ laatu guiráʼ cosa ne zusietenalaʼdxiʼ laatu guiráʼ ni maʼ gudxeʼ laatu». Nabé gudixhedxí ca diidxaʼ riʼ ladxidóʼ ca apóstol purtiʼ maʼ biiyacaʼ poder napa espíritu santu. Ne gúdxiruʼ Jesús laacabe: «Zudieeʼ laatu paz stinneʼ ne zusaananiaʼ ni laatu. [...] Cadi guiuubaʼ ladxidoʼto ne cadi guidxíbitu» (Juan 14:26, 27). Cadi naquiiñeʼ chuʼ ca discípulo xizaa purtiʼ zapa Bixhoze Jesús laacabe ne zuni dirigir laacabe.

Ne mayaca, zahuinni modo cayapa Dios laacabe. Bisiene Jesús ni: «Maʼ zeeda ni cayuni mandar guidxilayú riʼ, ne qué zanda guni dominarbe naa» (Juan 14:30). Gunda guyuu Binidxabaʼ ndaaniʼ ladxidóʼ Judas ne biʼniʼ dominarbe laa. Peru qué zanda quiteʼ Binidxabaʼ Jesús para gucaalú Dios. Laaca qué gapa Binidxabaʼ poder para gucueeza laabe de guiásabe de lade gueʼtuʼ. ¿Xiñee yaʼ? Jesús guníʼ xiñee: «Cayuneʼ casi peʼ modo biʼniʼ mandar Bixhozeʼ naa». Nga runi nuube seguru zandisaʼ Bixhózebe laabe (Juan 14:31).