Iesu hë me itretre dreng a trotrije la hnahag e koho, thupene la hna ce xeni la Paseka. Nyimu eamo hë hnei Iesu hna hamë angatr, ngo öni nyidrëti hmaca: “Hnenge hna qaja la itre ewekë cili koi nyipunie, matre tha tro pi kö nyipunie a kei.” Hnauëne la nyidrëti a qaja lai? Ke öni nyidrë: “Tro la itre atr a helë nyipunie qa hnine la sunago, nge eje hi, tro ha traqa la ijine tro la itre atr a humuthi nyipunie me mekune ka hape, angatr a huliwa koi Akötresie.”—Ioane 16:1, 2.

Ma kolo jë a jole la hni ne la itre aposetolo. Eje hi, ase hë Iesu hmekë angatr ka hape, tro ha methinë angatr hnei fen, ngo nyidrëti petre hi la a qaja mekötin ka hape, tro ha humuthi angatr. Pine nemen? Ke öni nyidrë: “Tha hnenge kö hna canga qaja lai koi nyipunie, ke ce eni pala kö lo me nyipunie.” (Ioane 16:4) Ngo enehila, nyidrëti a hmekë angatr qëmekene troa tro. Nge tro lai a xatua angatr, matre tha tro kö angatr a kei.

Öni Iesu hmaca: “Enehila, eni ha tro kowe lo Atre upi ni, ngo pë pi kö ala casi thei nyipunie ka hane hnyingë ni ka hape: ‘Nyipëti a tro ië?’ ” Ame lo xötrei, angatr asë a isa hnyinge ka hape, nyidrëti a tro ië. (Ioane 13:36; 14:5; 16:5) Ngo enehila, tha mekune hë angatr, ke hnei Iesu hna qeje iaxösisi. Casi hi la ka mama cile koi angatr a akötr. Matre tha hnyingëne pi kö angatr la lolo ka treqe nyidrë, maine aliene koi itretre dreng. Haawe, öni Iesu jë hi: “Ngo pine laka, ase hë ni qaja la itre ewekë cili koi nyipunie, hace hë la itre hni nyipunie hnei hleuhleu.”—Ioane 16:6.

Thupene lai, öni Iesu: “Nyine loi koi nyipunie e tro ni a tro qaathei nyipunie. Ke maine tha tro kö ni a tro, tha tro kö a traqa la ixatua koi nyipunie, ngo maine tro ni a tro, tro hë ni a upi angeic koi nyipunie.” (Ioane 16:7) Tro hi la itretre dreng a atreine kapa la uati hmitrötr, e tro Iesu a pane mec me elë hnengödrai. Qa ngöne lai, ijiji nyidrëti hë troa upe la ua, lo ixatua kowe la nöjei atre i nyidrë e cailo fen.

Tro hë la uati hmitrötr a “amamane kowe la fen la itre ngazo ne ej. Nge tro fe angeic a anyipicine laka, ka meköti la hnenge hna kuca, me amamane la nöj nyine troa amekötin hnei Akötresie.” (Ioane 16:8) Eje hi, tro ha mama cile laka, tha lapaune kö la fen kowe la Nekö i Akötresie, nge tro ha mama laka, atre ka meköti Iesu. Ketre, tro fe a mama la kepine matre loi e troa ameköti Satana, “atre musinëne la fen.”—Ioane 16:11.

Öni Iesu hmaca: “Tru catre pala kö hnei ewekë hnenge hna pi qaja koi nyipunie, ngo tha ijiji nyipunieti pala kö troa kapa.” Ngo e hamëne hë nyidrë la uati hmitrötr, tro ej a xatua angatr troa trotrohnine “la nöjei nyipici,” nge tro hë angatr a mele thenge la nyipici.—Ioane 16:12, 13.

Sesëkötre pi kö la itre aposetolo la angatr a drei Iesu e hape: “Easenyi hë matre tha tro hmaca kö nyipunieti a öhnyi ni, nge easenyi hë matre tro hmaca nyipunieti a öhnyi ni.” Matre angatr a ihnyingënekeune la aliene la itre trengewekë i nyidrë. Eloine hi, trotrohnine hi Iesu laka, angatr a pi atre, matre nyidrëti a qejepengöne jë me hape: “Nyipici, eni a qaja hnyawa koi nyipunie, tro hë nyipunieti a treije me latresi, ngo tro la fen a madrin; nge tro fe nyipunieti a hnë mec, ngo tro ha saze la akötre i nyipunie koi madrin.” (Ioane 16:16, 20) Ngöne la drai thupen e hnaipajö, tro ha humuthi Iesu nge tro itre hene ne hmi a madrin, nge itre aposetolo a latresi. Ngo tro ha saze la latresi angatr koi madrin, e amele Iesu hmaca jë! Nge tro ha atraqatre  la madrine i angatr e upe pi nyidrëti la uati hmitrötre koi angatr.

Iesu a aceitunë itre aposetolo me ketre föe ka troa hnaho, öni nyidrë: “Ame la kola hnaho la ketre föe, angeic a akötr ke easenyi hë la traeme i angeic, ngo e ase hë, tha mekune hmaca kö angeice lo akötre i angeic, ke ase hë hnahone la ketre atr e celë fen.” Ame hnei nyidrëti hna thuecatre i angatr me hape: “Haawe, tui nyipunie hi lai enehila, nyipunie a akötr, ngo tro hmaca ni a iöhnyi me nyipunie, nge tro ha madrine la itre hni nyipunie. Nge pëkö atr ka troa apatrene la madrine i nyipunie.”—Ioane 16:21, 22.

Qaan ekö, tha hane kö itre aposetolo sipo ngöne la ëje i Iesu. Ngo enehila öni nyidrë: “Ngöne la ijine cili, tro hë nyipunie a sipone koi Kaka ngöne la ëjeng.” Hnauën? Tha hnene kö laka, xele kö la Kem troa sa koi angatr. Ngo Iesu a qejepengön me hape: “Kakati fe a hane hnimi nyipunie, ke hnei nyipunieti hna hnimi ni. . . eni hi la qeneqaja i Akötresie.”—Ioane 16:26, 27.

Ma hnene la elolone la itre ithuecatre i Iesu, öni itre aposetolo: “Haawe, hnene hi lai, mejiune hë huni laka, hna upi nyipë hnei Akötresie.” Easenyi hë matre tupathe jë la itre trengewekë i angatr. Eje hi, öni Iesu: “Easenyi hë la ijine tro nyipunieti a isa ije, me isa lapa hnalapan, nge tro hë nyipunie a nue ni.” Ngo öni nyidrëti pe: “Hnenge hna qaja la itre ewekë cili koi nyipunie matre, jëne ni, tro hë nyipunie a tingeting. Ngo eje hi laka, ame e celë fen, tro ha icilekeu me nyipunie, ngo catre pi pe! Ase hë ni ngaane la fen.” (Ioane 16:30-33) Tha Iesu kö a nuaxöji angatr. Xecie hnyawa koi nyidrë ka hape, ijiji angatre fe troa hane ngaane la fen tui nyidrë. Tro angatr a mele nyipici me kuca la aja i Akötresie, ngacama tro ju hë Satana me fene i angeic a thele troa akeinyi angatr.