Yezu n’a ka cidenw be bɔra sangaso kɔnɔ, u ye Tɛmɛnkan seli dumuni kɛ yɔrɔ min na. Koo min bena u sɔrɔ, Yezu ye wagati caaman ta k’u lasɔmi o koo la, ani a ko: “Ne ye koo bɛɛ fɔ aw ye janko aw kunna kana cɛn.” Mun na o lasɔmini kuma tun bɛnnin lo? Yezu y’a fɔ u ye ko: “U bena aw gwɛn ka bɔ kalansow kɔnɔ, waati dɔ bena se, mɔgɔ minw bena aw faga, olu bena miiri k’u ye Ala sago le kɛ.”—Zan 16:1, 2.

N’a sɔrɔ o kuma ye cidenw hakili ɲagami. Yezu tun kɔnna k’a fɔ u ye ko duniɲa mɔgɔw bena u kɔniya. Nka, a tun m’a fɔ u ye ka gwɛ k’u bena u faga. Mun na do? A ko: “Ne ma kɔn k’o fɔ aw ye kabini a daminɛ, bari ne tun be n’aw ye.” (Zan 16:4). Nka sisan, a b’u labɛnna sabu a ka ɲi ka taga sankolo la ani a t’a fɛ u ka limaniya ka bɔsi u la.

Yezu y’a fara a kan ko: “Ne be taga ne cibaga fɛ, aw si ma ne ɲininga ko ne be taga min.” O loon sufɛ, u tun kɔnna ka Yezu ɲininga ko a be tagara min (Zan 13:36; 14:5; 16:5). Nka sisan, u hakili ɲagaminin lo ani u dusu kasinin lo sabu Yezu y’a fɔ u ye ko mɔgɔw bena u tɔɔrɔ. O kama, nɔɔrɔ min be Yezu kɔnɔna ani o bena Ala sagokɛla sɔbɛw nafa cogo min na, u ma Yezu ɲininga o koo la. Yezu y’a fɔ u ye ko: “Aw hakili ɲagamina ne ka kuma nin kosɔn.”—Zan 16:6.

Yezu y’a ɲɛfɔ u ye ko: “Aw kama lo ne be taga, ni ne ma taga, Dɛmɛbaga tena na aw fɛ, nga ni ne tagara, ne ben’a ci aw ma.” (Zan 16:7). Fɔɔ Yezu ka sa ani ka kɔsegi sankolo la walisa a ka kalandenw ka se ka hakili senu sɔrɔ. O hakili senu lo bena kɛ u dɛmɛbaga ye, u mana kɛ yɔrɔ o yɔrɔ dugukolo kan.

Hakili senu “bena hakɛko ni tilenninyako, ani Ala ka kitiko gwɛya diɲɛ mɔgɔw ye, k’a yira u la k’u filila o koo nunu na.” (Zan 16:8). Tiɲɛn na, a bena a yira ka gwɛ ko duniɲa mɔgɔw ma limaniya Ala Dencɛ la. Ni Yezu yɛlɛla ka taga sankolo la, o bena a yira ka gwɛ ko a tilennin lo ani ko Sutana, “diɲɛ nin kuntigi” ka kan ni halakili ye.—Zan 16:11.

Yezu tagara ɲɛ n’a ka kuma ye ko: “Koo caaman be ne fɛ k’o fɔ aw ye, nga aw tena se k’o bɛɛ faamu sisan.” Ni hakili senu nana jigi u kan, u bena se ka “tiɲɛ bɛɛ lɔn.” O la, u bena se ka ɲɛnamaya kɛ ka kɛɲɛ n’o tiɲɛn ye.—Zan 16:12, 13.

O kɔ, Yezu y’a fɔ ko: “Yanni waati dɔɔni aw tena ne ye, o kɔ waati dɔɔni tugu aw bena tila ka ne ye.” O kuma y’a ka cidenw hakili ɲagami. U tora ka ɲɔgɔn ɲininga o kuma kɔrɔ la. Yezu y’a faamu ko u b’a fɛ k’a ɲininga minkɛ, a y’a fɔ u ye ko: “Tiɲɛ tiɲɛ na, ne b’a fɔ aw ye ko, aw bena kasi fɔɔ ka kɛ makaritɔw ye, k’a sɔrɔ diɲɛ mɔgɔw be nisɔndiya la. Aw dusu bena kasi nga, aw ka dusukasi bena yɛlɛma ka kɛ nisɔndiya ye.” (Zan 16:16, 20). Lɛri damanin o kɔ, u bena Yezu faga (wulafɛ) ani diinan kuntigiw bena ninsɔndiya. Nka, Yezu ka kalandenw dusu bena kasi. O kɔ, tuma min na Yezu bena kunu ka bɔ saya la, a ka kalandenw ka dusukasi bena yɛlɛma ka kɛ ninsɔndiya ye. Dɔ bena fara u ka ninsɔndiya kan tuma min na Yezu bena Ala ka hakili senu jigi u kan.

Yezu y’a ka cidenw ka koo suma ni muso tintɔ ka koo ye. A ko: “Ni muso be jigira deen na tuma min na, a nii be tɔɔrɔ, bari a ka tɔɔrɔwaati le sera, nga n’a jigira ka ban, a hakili te to o tɔɔrɔ la tugu deen sɔrɔ nisɔndiya fɛ.” Yezu y’a ka cidenw jija ko: “Aw dusu kasinin be sisan fana, nga an bena ɲɔgɔn ye tugu, o tuma na aw bena nisɔndiya, mɔgɔ si te se ka nisɔndiya nin cɛn aw fɛ.”—Zan 16:21, 22.

Kabi Yezu ka cidenw be n’a ye, u ma foyi deli a tɔgɔ la. Sisan Yezu y’a fɔ u ye ko: “O loon na,  aw bena Ala daali ni ne tɔgɔ ye.” Mun na u ka ɲi ka Faa deli Yezu tɔgɔ la? Yala o kɔrɔ ko Faa t’a fɛ k’u jaabi wa? Ayi, o tɛ. Yezu ko: “N Faa yɛrɛ fana b’aw kanu, bari aw ye ne kanu, ka l’a la ko ne bɔra Ala fɛ.”—Zan 16:26, 27.

N’a sɔrɔ, Yezu ka kumaw ye cidenw jaa gwɛlɛya. O kama, u y’a fɔ ko: “O le y’a to an lar’a la ko i bɔra Ala fɛ.” Yanni dɔɔni u ka limaniya bena kɔrɔbɔ. O kama, Yezu y’u lasɔmi ko: “Ayiwa, waati dɔ bena se, o waati nin yɛrɛ sera ka ban, aw bena jɛnsɛn, bɛɛ n’a taayɔrɔ, ka ne kelen to.” Nka, a y’u hakili sigi ko: “Ne y’o fɔ aw ye janko aw ka to ni ne ye ka hɛrɛ sɔrɔ. K’aw to diɲɛ na, dusukasi le be aw kan, nga aw k’aw jaa gwɛlɛya, ne ye see sɔrɔ diɲɛ kan ka ban.” (Zan 16:30-33). Ayi, Yezu m’u to u kelen na. Sutana n’a ka duniɲa bena u kɔrɔbɔ ani k’a ɲini k’u ka kantigiya tiɲɛ. O bɛɛ n’a ta, Yezu lanin b’a la k’u bena see sɔrɔ duniɲa kan ka Ala sago kɛ k’a dafa i ko ale y’a kɛ cogo min na.