Jesu po apọsteli lẹ po ko wleawufo nado tọ́n sọn abò aga tọn lọ mẹ, fihe yé dù núdùdù Juwayi tọn te. To whenue Jesu ko na yé ayinamẹ susu godo, e yidogọ dọmọ: “Yẹn ko dọ onú ehelẹ na mì, na mì nikaa dahli.” Naegbọn avase enẹ do wá do gànmẹ? E dọna yé dọmọ: “Gbẹtọ lẹ na yàn mì sọn sinagọgu mẹ. Na nugbo tọn, ojlẹ lọ ja, to whenue mẹdepope he hù mì na lẹndọ emi ko basi sinsẹ̀nzọn wiwe hlan Jiwheyẹwhe.”—Johanu 16:1, 2.

Hogbe enẹlẹ na ko hẹn apọsteli lẹ biọ bẹwlu mẹ. Dile etlẹ yindọ Jesu ko donù e go wayi dọ aihọn lọ na gbẹwanna yé, e ma dọna yé tlọlọ dọ yé na yin hùhù. Etẹwutu? E dọmọ: “Yẹn ma dọ onú ehelẹ na mì to tintan whenu, na yẹn tin to mì dè wutu.” (Johanu 16:4) Todin, e to avase na yé gandego whẹpo e nado yì. Ehe na gọalọna yé ma nado dahli to nukọn mẹ.

Jesu zindonukọn dọmọ: “Yẹn jei ewọ he do mi hlan dè, ṣogan depope to mì mẹ ma kanse mi dọ, ‘Fie wẹ hiẹ jei?’” Ojlẹ vude jẹnukọn to whèjai enẹ, yé ko kanhose gando fihe ewọ jei go. (Johanu 13:36; 14:5; 16:5) Ṣigba todin, na nuhe e dọ gando homẹkẹn go lẹ hẹn yé jẹflumẹ wutu, awubla gbọṣi ayiha yetọn mẹ. Enẹwutu, yé gboawupo nado kanhose yinukọn dogọ gando gigo he to tepọn ẹn kavi nuhe enẹ na zẹẹmẹdo na sinsẹ̀n-basitọ nugbo lẹ go. Jesu dọmọ: “Na yẹn ko dọ onú ehelẹ na mì wutu, awubla gọ́ ahun mìtọn mẹ.”—Johanu 16:6.

Enẹgodo, Jesu basi zẹẹmẹ dọmọ: “Na dagbe mìtọn wutu wẹ yẹn do jei. Na eyin yẹn ma yì, alọgọtọ lọ ma na wá mì dè to aliho depope mẹ; ṣigba eyin yẹn yì, yẹn na do e hlan mì.” (Johanu 16:7) Kiki eyin Jesu kú bo yì olọn mẹ wẹ devi etọn lẹ sọgan mọ gbigbọ wiwe he ewọ sọgan dohlan omẹ etọn lẹ to fidepope to aigba ji taidi alọgọtọ de lọ yí.

Gbigbọ wiwe lọ “na na aihọn lọ kunnudenu he dutomẹji gando ylando go podọ gando dodowiwa go podọ gando whẹdida go.” (Johanu 16:8) Mọwẹ, awugbopo aihọn tọn nado do yise hia to Visunnu Jiwheyẹwhe tọn mẹ na yin didehia. Olọn mẹ yìyì Jesu tọn na do kunnudenu he dutomẹji lẹ hia gando dodowiwa etọn go, bo nasọ do nuhewutu Satani, yèdọ “ogán aihọn ehe tọn,” do jẹna whẹdida whẹgbledomẹ tọn hia.—Johanu 16:11.

Jesu sọ zindonukọn dọmọ: “Yẹn gbẹ́ tindo onú susu nado dọna mì, ṣigba mì ma penugo nado hẹn yé todin gba.” To whenue ewọ na kọ̀n gbigbọ wiwe lọ jẹgbonu, e na deanana yé nado mọnukunnujẹ “nugbo lọ mẹ to gigọ́ mẹ,” bọ yé na penugo nado nọgbẹ̀ sọgbe hẹ nugbo enẹ.—Johanu 16:12, 13.

E paṣa apọsteli lẹ to whenue Jesu yidogọ dọmọ: “Whenu vude dogọ, mì ma na mọ mi ba, podọ whenu vude dogọ, mì nasọ vọ́ mọ mi.” Yé kanhose ode awetọ gando zẹẹmẹ nuhe dọ e te tọn go. Jesu doayi e go dọ yé jlo na kanhose e gando ehe go, enẹwutu e basi zẹẹmẹ dọmọ: “Nugbonugbo wẹ yẹn dọna mì dọ, Mìwlẹ na viavi bo doavihàn, ṣigba aihọn na jaya; mìwlẹ na blawu, ṣigba awubla mìtọn na lẹzun ayajẹ.” (Johanu 16:16, 20) To whenue Jesu yin hùhù to whèmẹ he bọdego, sinsẹ̀ngán lẹ jaya tlala, ṣigba devi lẹ blawu. Enẹgodo, awubla yetọn lẹzun ayajẹ to whenue Jesu yin finfọnsọnku! Podọ ayajẹ yetọn zindonukọn to whenue e kọ̀n gbigbọ wiwe Jiwheyẹwhe tọn jẹgbonu do yé ji.

Jesu yí ninọmẹ apọsteli lọ lẹ tọn jlẹdo ninọmẹ yọnnu he to awufiẹsa ajipanu tọn mẹ de tọn go, bo dọmọ: “To whenue yọnnu de to viji, e nọ tindo awufiẹsa, na ojlẹ etọn ko wá wutu; ṣigba to whenue e ko ji ovi pẹvi lọ, e masọ nọ flin awufiẹsa lọ ba, na ayajẹ lọ dọ gbẹtọ de ko yin jiji do aihọn mẹ wutu.” Jesu na tuli apọsteli etọn lẹ dọmọ: “Mìlọsu to awubla mẹ todin; ṣigba yẹn nasọ vọ́ wá mọ mì bọ ahun mìtọn na jaya, podọ mẹdepope ma na yí ayajẹ mìtọn sọn mì si.”—Johanu 16:21, 22.

 Kakajẹ ojlẹ ehe mẹ, apọsteli lẹ ma ko basi obiọ de to oyín Jesu tọn mẹ pọ́n gbede. Todin, e dọmọ: “To azán enẹ gbè, mìwlẹ na biọ Otọ́ lọ to oyín ṣie mẹ.” Naegbọn yé na do wàmọ? E ma yindọ Otọ́ lọ nọ whleawu nado na gblọndo wutu wẹ gba. Na nugbo tọn, Jesu dọmọ: “Otọ́ lọ lọsu yiwanna mì, na mì yiwanna mi. . . taidi afọzedaitọ Otọ́ lọ tọn wutu.”—Johanu 16:26, 27.

Tuli he Jesu na apọsteli lọ lẹ wẹ na ko na yé jide nado dọmọ: “Gbọn ehe dali, mí yise dọ Jiwheyẹwhe dè wẹ hiẹ wá sọn.” Nujikudo yetọn na yin whiwhlepọn to madẹnmẹ. Na nugbo tọn, Jesu basi zẹẹmẹ nuhe to nukọn ja lọ tọn dọmọ: “Mì pọ́n! Ojlẹ lọ ja, na nugbo tọn, e ko wá, to whenue dopodopo mìtọn na gbàdo bo yì owhé etọn titi gbè bọ mì na jo yẹn kẹdẹ do.” Etomọṣo, e hẹn yé deji dọmọ: “Yẹn dọ onú ehelẹ na mì, na gbọn yẹn gblamẹ, mì nido sọgan tindo jijọho. To aihọn mẹ, mì na nọ tindo nukunbibia, ṣigba mì gboadọ! Yẹn ko gbawhàn aihọn tọn.” (Johanu 16:30-33) E họnwun dọ Jesu ma na jo yé do. E deji dọ yelọsu sọgan gbawhàn aihọn tọn kẹdẹdile ewọ wà do, gbọn ojlo Jiwheyẹwhe tọn wiwà po nugbonọ-yinyin po dali mahopọnna vivẹnudido Satani po aihọn etọn po tọn nado doalọtena tenọgligo-hinhẹn yetọn.