Jesus enggau bala rasul nyauka mupuk ari endur alai sida udah ngintu Pengerami Paska. Jesus udah meri mayuh jaku lalau ngagai sida, lalu ku iya agi: “Aku madah ngagai kita semua pekara tu, ngambika kita enda lenyau pengarap.” Nama reti ku Jesus? Iya madah ngagai sida: “Kita deka diburu ari balai gempuru. Kebendar iya, maya deka datai alai tiap iku orang ke munuh kita deka ngumbai diri bejalaika pengawa ti tuchi ngagai Petara.”—John 16:1, 2.

Jaku Jesus engka ngasuh bala rasul berasai irau. Taja pan Jesus kala madah dunya deka begedika sida, tang iya bedau madah sida deka dibunuh. Nama kebuah? Ku Jesus: “Sebedau tu, aku enda madah ngagai kita pasal semua pekara tu laban aku agi enggau kita.” (John 16:4) Tang sebedau Jesus mupuk, iya nyikap sida ngambika ulih napi penguji ke deka nyadi dudi hari ila. Tu deka nulung sida ngambika enda lenyau pengarap.

Jesus madah: “Aku deka mupuk ngagai Iya ke ngirumka aku. Taja pia, nadai siku pan ari kita nanya aku, ‘Kini ke penunga nuan?’” Kebendar iya ba malam nya, bala rasul udah nanya pasal kini penunga Jesus. (John 13:36; 14:5; 16:5) Tang, pengudah sida ninga pasal pemerinsa ke deka ditapi sida, bala rasul amat tusah ati. Nya alai, sida enda nanya Jesus pasal mulia ke deka diterima iya sereta nama reti nya ke bala penyembah ti bendar. Jesus nemu asai ati sida, nyadi ku iya: “Kita tusah ati laban aku udah madah ngagai kita pasal semua utai nya.”—John 16:6.

Udah nya, Jesus nerangka: “Aku mupuk ke penguntung kita. Enti aku enda mupuk, penulung nya enda datai ngagai kita. Tang enti aku mupuk, aku deka ngirumka penulung nya ngagai kita.” (John 16:7) Bala murid semina ulih nerima kuasa kudus enti Jesus mati lalu ngagai serega. Jesus ulih meri kuasa kudus nyadika penulung ngagai semua murid iya ba serata dunya.

Kuasa kudus Petara “deka nunjukka bukti ti terang ngagai dunya pasal dosa dunya. Iya mega deka meri bukti ti terang pasal sapa ke ngereja utai ti lurus sereta sapa ke deka diakim Petara.” (John 16:8) Iya ke amat, dunya bedosa laban sida enggai arapka Anak Petara lalu kuasa kudus deka mandangka nya. Ketegal Jesus ulih ngagai serega, tu siti bukti ke nunjukka iya ngereja utai ti lurus. Nyadi tu nunjukka kebuah “pemerintah dunya tu,” iya nya Sitan patut diakim.—John 16:11.

Ku Jesus agi: “Mayuh agi utai ke deka dipadah aku ngagai kita. Tang kita enda ulih meretika nya diatu.” Lebuh Jesus meri kuasa kudus ngagai bala murid iya, sida deka diiring kena meretika “semua pemendar,” lalu sida ulih idup sejalai enggau pemendar nya.—John 16:12, 13.

Bala rasul enda mereti lebuh Jesus madah: “Enda lama agi, kita enda ulih meda aku. Tang enda lama udah nya, kita deka meda aku.” Nyadi, sida nanya ngagai pangan diri nama reti ku iya. Jesus nemu sida deka nanya iya mayuh agi pasal pekara tu, nya alai iya nerangka: “Enggau bendar aku madah ngagai kita: Kita deka bekeduie sereta rauh-rauh nyabak, tang dunya deka gaga ati. Kita deka tusah ati, tang penusah ati nya deka berubah nyadi pengaga ati.” (John 16:16, 20) Lebuh Jesus dibunuh sehari pengudah nya, bala tuai pengarap gaga ati, tang bala murid iya tusah ati. Taja pia, penusah ati sida deka berubah nyadi pengaga ati lebuh Jesus diangkatka idup baru! Lalu sida mega gaga ati lebuh sida nerima kuasa kudus Petara.

Jesus nyemakka utai ke deka ditapi sida enggau siku indu ke radai deka beranak, Jesus madahka:  “Siku indu ke deka ngadaka anak ngasaika pemedis, laban maya iya deka beranak udah datai. Tang pengudah ngadaka anak iya, indu nya enda agi ingatka pemedis iya. Iya gaga ati laban siku da agi mensia udah ada ke dunya.” Jesus lalu meransang bala rasul, ku iya: “Pia mega enggau kita. Diatu kita tusah ati, tang aku deka betemu enggau kita baru. Ati kita deka penuh enggau pengaga, lalu nadai orang ulih ngerampas pengaga nya ari kita.”—John 16:21, 22.

Nyentukka maya nya, bala rasul bedau agi minta nama-nama utai dalam nama Jesus. Tang Jesus madah: “Ba hari nya, kita deka minta ngagai Apai dalam nama aku.” Nama kebuah sida patut ngereja nya? Jaku Jesus ukai reti Petara enggai nulung sida. Kebendar iya, Jesus madah: “Apai Empu rinduka kita, laban kita rinduka aku . . . nyadi pengari Petara.”—John 16:26, 27.

Jaku Jesus udah meransang bala rasul, engka nya kebuah sida madah: “Enggau tu, kami pechaya nuan endang datai ari Petara.” Enda lama agi, pengarap sida deka diuji. Jesus madah utai ke deka nyadi: “Maya nya deka datai, indah maya nya udah datai, lebuh kita deka pambar lalu pulai ngagai rumah diri empu. Kita deka ninggalka aku kediri.” Taja pia, iya meransang sida: “Aku madah ngagai kita pasal semua utai tu, ngambika kita bulih pengelantang nengah aku. Kita deka napi penusah ti balat ba dunya tu, tang anang takut! Aku udah ngalahka dunya.” (John 16:30-33) Tang Jesus enda ninggalka sida pia aja. Iya nemu sida mega tentu ulih ngalahka dunya. Lalu enda ngira nama penguji ke deka ditapi sida ari Sitan enggau dunya Sitan, sida deka mujur ngereja peneka Petara enggau tetap ati.