Jesu ni baapositola baitukiselize kuzwa mwa muzuzu mone bacela sico sa Paseka. Hasabafile litemuso lisikai, Jesu uekeza kubulela kuli: “Nimibulelezi lika ze kuli musike mwasitatala.” Ki kabakalañi temuso yecwalo hane iswanela? Jesu ubabulelela kuli: “Batu baka mileleka mwa sinagoge. Mane nako yataha muta batu kaufela baba mibulaya bakanahana kuli ka kueza cwalo baezize sebelezo yekenile ku Mulimu.”—Joani 16:1, 2.

Yeo ki taba yemaswe luli kwa baapositola. Nihaike kuli Jesu kwa makalelo naababulelezi kuli lifasi lika batoya, naasika babulelela patalaza kuli bakabulaiwa. Ki kabakalañi? Jesu uli: “Nenisika mibulelela lika ze kwa makalelo, kakuli nenili ni mina.” (Joani 16:4) Cwale ubafa temuso pili asika basiya kale. Temuso ye, ikabatusa kuli basike basitatala hasamulaho.

Jesu uzwelapili, uli: “Niya ku yanilumile; kono hakuna yomuñwi ku mina yanibuza kuli: ‘Uya kai?’” Kwa makalelo, manzibwana a lizazi leliswana, neba mubuzize ka za kwaya. (Joani 13:36; 14:5; 16:5) Kono cwale, bakeñisa kuli ubabulelezi ka za kunyandiswa, baba mwa maswabi amatuna. Ka mukwa ocwalo, bapalelwa kumubuza hape ka za kanya yebalibelezi kamba ka mo taba yeo ikaamela balapeli ba niti. Jesu uli: “Kabakala kuli nimibulelezi lika ze, lipilu zamina li mwa maswabi amatuna.”—Joani 16:6.

Cwale Jesu utalusa kuli: “Niezeza mina haniya. Kakuli hanisa yi, mutusi haana kutaha ku mina; kono haiba niya, nika milumela yena.” (Joani 16:7) Balutiwa ba Jesu bakona feela kuamuhela moya okenile haiba Jesu ashwa ni kuya kwa lihalimu. Moya okenile uka ulumela sina mutusi kai ni kai kwa batu fa lifasi.

Moya okenile “ukafa lifasi bupaki bobukolwisa ka za sibi ni ka za kuluka ni ka za katulo.” (Joani 16:8) Ki niti, kukabonahala hande kuli lifasi lipalezwi kuba ni tumelo ku mwanaa Mulimu. Jesu hakakambamela kwa lihalimu ukafa bupaki bobukolwisa bwa kuluka kwahae, mi ukabonisa kuli Satani, yena “mubusi wa lifasi le,” ulukela kuatulwa.—Joani 16:11.

Jesu uzwelapili kubulela kuli: “Nisanani lika zeñata za kumibulelela, kono hamukoni kuliutwisisa ka nako ye.” Haka basululela moya okenile, moya okenile uka batusa kuutwisisa “niti kaufela,” mi bakapila ka kuya ka niti yeo.—Joani 16:12, 13.

Baapositola bazingiwa ki taba yabulela Jesu hape, haali: “Kusiyezi nakonyana mi hamuna kunibona, mi hape, hamulaho wa nakonyana muka nibona.” Baipuza zatalusa. Jesu ulemuha kuli babata kumubuza ka za taba yeo, ka mukwa ocwalo, uli: “Kaniti luli namibulelela nili, mukalila ni kubokolola, kono lifasi likanyakalala; mukaba mwa maswabi, kono maswabi amina akafetuha tabo.” (Joani 16:16, 20) Jesu hakabulaiwa fa lizazi lelitatama manzibwana, babahulu ba bulapeli bakanyakalala, kono balutiwa bahae bakaba mwa maswabi. Kono Jesu hakazuswa kwa bafu, maswabi abona akafetuha tabo! Mi tabo yabona ikazwelapili haka basululela moya okenile wa Mulimu.

Jesu ubapanya muinelo wa baapositola ku musali yautwa butuku bwa lupepo, uli: “Musali hapuluha, u mwa maswabi kakuli nako yahae itile, kono hasaapuluhile, hasana kuhupula ñalelwa yahae kabakala tabo ya kuli kupepilwe mutu mwa lifasi.” Jesu ususueza baapositola bahae, uli: “Ni mina mu mwa maswabi ka nako ye; kono nika mibona hape mi lipilu zamina likanyakalala, mi hakuna yaka miamuha tabo yamina.”—Joani 16:21, 22.

 Baapositola habasika kupa kale nto yeñwi ka libizo la Jesu, kufitela cwale. Cwale ubabulelela kuli: “Mwa lizazi leo mukakupa Ndate ka libizo laka.” Ki kabakalañi habaka eza cwalo? Habana kueza cwalo kabakala kuli Ndate haalabi likupo. Kono Jesu uli: “Ndate kasibili wamilata, kabakala kuli munilatile . . . sina muyemeli yazwa ku Mulimu.”—Joani 16:26, 27.

Manzwi a Jesu akususueza baapositola mwendi abasusueza kubulela ka buikolwiso kuli: “Ka lona libaka leo lwalumela kuli uzwile ku Mulimu.” Kono tumelo yabona ituha ilikiwa. Mane Jesu ubulela zetuha liezahala, uli: “Hamubone! Nako yataha, mi mane seitile, muta mukahasana yomuñwi ni yomuñwi kwa ndu yahae mi muka nisiya ninosi.” Niteñi ubasepisa kuli: “Nimibulelezi lika ze kuli ka na, mube ni kozo. Mwa lifasi mukaba ni ñalelwa, kono mutiye lipilu! Nituzi lifasi.” (Joani 16:30-33) Jesu haabayubeki. Unani buikolwiso bwakuli ni bona bakona kutula lifasi sina yena, ka busepahali bwabona bakapeta tato ya Mulimu kusina taba ni litiko za Satani ni lifasi lahae za kuli bapalelwe kusepahala.