Yesu navaposetolo jenyi vasakile kulovoka mukapete kahelu muze vapwile nakulila kulya chaPaseka. Omu Yesu akumishile kuvahana jindongi, ambile ngwenyi: “Ngunahanjika vyumevi kuli enu kuchina namukahukana.” Mwomwo ika chatelemo kuvahuhumuna? Avalwezele ngwenyi: “Vatu navakamihanganga mujisunangonga. Chikupu vene ola yili nakwiza omu vosena vaze navakamijiha navakashinganyeka ngwavo vanazate mulimo wajila kuli Kalunga.”—Yowano 16:1, 2.

Mujimbu kana atela wahombesele vaposetolo jenyi. Numba tuhu hakavanga Yesu avalwezele ngwenyi kaye nakakavahunga, oloze kavalwezele hatoma ngwenyi navakavajihako. Mwomwo ika? Ambile ngwenyi: “Hakavanga kangwamilwezele vyumeviko, mwomwo ngunapunga nayenu hamwe.” (Yowano 16:4) Ngocho asakile jino kuvahuhumuna shimbu kanda ayenga. Pamo kuvalweza mazu kana chavakafwile vazeneke kuhukana kulutwe.

Yesu atwalileho ngwenyi: “Nguli nakuya kuli Uze angutumine, oloze naumwe wauchi hali enu nangwihula ngwenyi, ‘Uli nakuya kulihi?’” Likumbi vene lize, shimbu kanda kuchitoke, vamuhulishile vatachikize okwo apwile nakuya. (Yowano 13:36; 14:5; 16:5) Oloze halwola kana, vevwile woma havyuma ahanjikile kutalisa kuluyanjisa, kaha ushona wavakwachile. Ngocho kavahashile kumuhulisa vyaupahu uze wapwile nakumuvandamina kulutwe chipwe kusaka kutachikiza mwatalikishile vyuma kana kuli vaka-kulemesa Kalungako. Yesu ambile ngwenyi: “Mwomwo ngunamilweze vyumevi shikaho michima yenu yinazale nachinyengo.”—Yowano 16:6.

Yesu alumbunwine jino ngwenyi: “Kuya chami nachiminganyalisa. Mwomwo kachi nge kangweshi kuyako, kaha muka-kumikafwa keshi kwiza kuli enuko. Oloze kachi nge nanguya, kaha nangukamutuma kuli enu.” (Yowano 16:7) Kuvanga Yesu afwenga numba tumbaji twenyi vakatambule shipilitu yajila yize mwakatuma kupwa muka-kukafwa vatu jenyi vosena hamavu.

Shipilitu yajila nayikahana “unjiho wakukunyula kaye wakuvuluka shili, nawou wakuvuluka kwoloka, nawou nawa wakuvuluka kusopesa.” (Yowano 16:8) Chikupu vene, vaka-kaye vaze vanahono kufwelela MwanaKalunga navakavasolola. Kuya chaYesu mwilu nachikasolola vilinga vyenyi vyakwoloka, nakusolola vyumovyo navakasopesela Satana, “mwangana wakano kaye.”—Yowano 16:11.

Yesu atwalileho ngwenyi: “Ami nguchili navyuma vyavivulu vyakuhanjika kuli enu, oloze oholili kamweshi kuhasa kumona omu vyalumbunukilako.” Shipilitu yajila yize mwakatuma nayikavatwaminyina nakuvakafwa vakevwishise “muchano wosena,” kaha navakahasa kutwama kweseka namwaya muchano.—Yowano 16:12, 13.

Vaposetolo valikomokelele omu Yesu avalwezele ngwenyi: “Namuhita katando kakandende, kaha kamweshi kungumona chekako, namukahita katando kakandende nawa, kaha namukangumona.” Valihulishile mwavomwavo vawane mwalumbunukila mazu kana. Yesu atachikijile ngwenyi vasakile kumuhulisa havyuma ahanjikile, ngocho ambile ngwenyi: “Chamuchano vene nangwamba kuli enu ngwami, enu namukalila nakuteta miteto, oloze kaye nakakawahilila. Enu namukalyonyinga, oloze kulyonyinga chenu nachikalumuka kupwa kuwahilila.” (Yowano 16:16, 20) Lyacheleko, Yesu vamujihile namusana, kaha vatwamina vamukwitava vawahililile, oloze tumbaji twenyi valishonene. Omu asangukile Yesu, kulishona chavo chapwile jino hikuwahilila. Kaha kuwahilila chavo chatwalilileho lika omu shipilitu yajila yaKalunga yejile hali vakiko.

Yesu esekesele vyuma navakamona vaposetolo jenyi kupwevo uze ali mumisongo yakusema, ambile ngwenyi: “Pwevo nge ali nakusapuluka, eji kulyonyinganga, mwomwo ola yenyi yinahete lyehi. Oloze nge naseme lyehi mwanenyi, luyando lwenyi keshi kulwanuka chekako mwomwo yakuwahilila hakuwana nge naseme nakuneha mutu mukaye.” Yesu akolezezele vaposetolo jenyi hakwamba ngwenyi: “Nayenu nawa, oholili muli nakulyonyinga, oloze nangukamimona cheka, kaha michima yenu nayikawahilila. Kuwahilila chenu naumwe wauchi mwakamitambulacho.”—Yowano 16:21, 22.

 Vaposetolo kavalombelenga kuzachisa lijina lyaYesuko, kufuma vene halwola vaputukile kumukavangiza. Kaha Yesu ambile ngwenyi: “Halikumbi lize, namukamulomba Tata mulijina lyami.” Mwomwo ika vatelele kulingila ngocho? Keshi nge mwomwo Ise apwile nakuzezama hakuvakumbululako. Yesu ambile ngwenyi: “Tata amizanga, mwomwo munanguzangenga ami, . . . mangana ngwimanyineko Kalunga.”—Yowano 16:26, 27.

Mazu akukolezeza ahanjikile Yesu kuli vaposetolo jenyi avahanyine ngolo, kaha vambile ngwavo: “Tunetavila jino ngwetu ove wafumine kuli Kalunga.” Oloze kukunyuka chavo chapwile hakamwihi nakuchenyeka. Mwomwo Yesu ahanjikile vyuma vyapwile nakwiza kulutwe, ambile ngwenyi: “Ivwenu! Ola yili nakwiza, kaha yineza lyehi chikupu, omu navamimwanga nakuya mutu himutu kwimbo lyenyi, kaha namunguseza uka wami.” Oloze avakolezezele ngwenyi: “Ngunahanjika vyumevi kuli enu mangana mupwenga nakuunda kuhichila muli ami. Muno mukaye namumona luyando, oloze likolezezenu! Ami ngunafungulula lyehi kaye.” (Yowano 16:30-33) Hakuhanjika mazu kana, Yesu kavahumbwileko. Atachikijile ngwenyi tumbaji twenyi navafungulula kaye ngana muze alingile ikiye, hakulinga mwaya muchima waKalunga, numba tuhu Satana nakaye kenyi vasakile kuhokola kulonga chatumbaji.