Jesu le baapostola ba gagwe ba itokišeleditše go tloga phapošing ya ka godimo moo ba bego ba jela Paseka gona. Ka ge a ba neile temošo e lekanego, Jesu o oketša ka gore: “Ke le boditše dilo tše gore le se ke la kgopša.” Ke ka baka la’ng temošo e bjalo e be e nyakega? O ba botša gore: “Batho ba tla le raka sinagogeng. Ge e le gabotse, nako e a tla ge yo mongwe le yo mongwe yo a le bolayago a tlago go nagana gore o diretše Modimo tirelo e kgethwa.”—Johane 16:1, 2.

Ditaba tšeo e ka ba tše di tshwenyago baapostola. Gaešita le ge pejana Jesu a ile a bolela gore lefase le be le tla ba hloya, o be a se a ba botša ka go lebanya gore ba tla bolawa. Ke ka baka la’ng a se a ba botša? O re: “Ga se ka le botša dilo tše mathomong, gobane ke be ke na le lena.” (Johane 16:4) Bjale o ba lemoša pele a ka sepela. Se se ka ba thuša gore ka morago ba efoge go kgopša.

Jesu o tšwela pele ka gore: “Ke ya go yo a nthomilego, fela ga go le o tee wa lena yo a mpotšišago gore: ‘O ya kae?’” Pejana mantšiboeng ao ba be ba mmotšišitše mabapi le moo a yago gona. (Johane 13:36; 14:5; 16:5) Eupša bjale, ka ge ba tšhošitšwe ke seo a se boletšego mabapi le tlaišo, ba aparetšwe ke manyami. Ka go re’alo ba palelwa ke go botšiša gape mabapi le letago leo a tlago go le hwetša goba gore seo se tla bolela eng go barapedi ba therešo. Jesu o re: “Ka ge ke le boditše dilo tše, dipelo tša lena di tletše manyami.”—Johane 16:6.

Ke moka Jesu o hlalosa ka gore: “Go holega lena ge ke tloga. Gobane ge e ba ke sa tloge, mothuši a ka se tle go lena le gatee; eupša ge e ba ke tloga, ke tla mo roma go lena.” (Johane 16:7) Ke feela ge Jesu a ka hwa le go ya legodimong moo barutiwa ba gagwe ba ka amogelago moya o mokgethwa, wo a ka o romelago e le mothuši wa batho ba gagwe lefaseng ka moka.

Moya o mokgethwa “o tla nea lefase bohlatse bjo bo kgodišago mabapi le sebe, toko le kahlolo.” (Johane 16:8) Ee, go palelwa ga lefase ke go dumela go Morwa wa Modimo go tla pepentšhwa. Go rotogela ga Jesu legodimong e tla ba bohlatse bjo bo kgodišago bja go loka ga gagwe le go bontšha lebaka leo ka lona Sathane, e lego “mmuši wa lefase le,” a swanelwago ke kahlolo e šoro.—Johane 16:11.

Jesu o tšwela pele ka gore: “Ke sa na le dilo tše dintši tšeo nka le botšago tšona, eupša ga le kgone go di rwala ga bjale.” Ge a ba tšhollela moya o mokgethwa, wona o tla ba hlahla go kwešiša ‘therešo ka moka,’ gomme ba tla kgona go phela ka therešo yeo.—Johane 16:12, 13.

Baapostola ba makatšwa ke seo Jesu a tšwelago pele a se bolela, ge a re: “Go se go ye kae, le ka se sa mpona, le gona go se go ye kae le tla buša le mpona.” Ba botšišana gore o ra go re’ng. Jesu o lemoga gore ba nyaka go mmotšiša ka se, ka gona o hlalosa ka gore: “Ruriruri ke re go lena: Le tla lla le go golola, eupša lefase le tla thaba; le tla ba bohlokong, eupša bohloko bja lena bo tla fetoga lethabo.” (Johane 16:16, 20) Ge Jesu a bolawa thapameng e latelago, baetapele ba bodumedi ba a thaba, eupša barutiwa ba kwa bohloko. Ke moka bohloko bja bona bo fetoga lethabo ge Jesu a tsošwa bahung! Ba tšwela pele ba thaba ge a tšhollela moya o mokgethwa wa Modimo godimo ga bona.

Ge Jesu a bapiša boemo bja baapostola le bja mosadi yo a šokwago, o re: “Mosadi ge a belega o kwa bohloko gobane nako ya gagwe e fihlile; eupša ge a belege ngwana, ga a sa hlwa a gopola tlaišego ka baka la go thabela gore motho o belegwe lefaseng.” Jesu o kgothatša baapostola ba gagwe, o re: “Le lena gona bjale ekwang bohloko; eupša ke tla buša ke le bona gomme dipelo tša lena di tla thaba, le gona ga go yo a ka le amogago lethabo la lena.”—Johane 16:21, 22.

Go fihlela nakong ye, baapostola ga se ba ka ba kgopela dilo thapelong ka leina la Jesu. Bjale Jesu o re: “Letšatšing leo le tla kgopela dilo go Tate ka leina la ka.” Ke ka baka la’ng ba swanetše go dira bjalo? Ga se ka gobane Tate ga a nyake go ba araba. Ge e le gabotse, Jesu o re: “Tate ka noši o a le rata ka ge lena le nthatile . . . ke le moemedi wa Tate.”—Johane 16:26, 27.

Mantšu a Jesu a kgothatšago ao a a boditšego baapostola a ka ba a ba matlafaditše gore ba bolele ba kgodišegile, ba re: “Ka baka le re dumela gore o tšwa go Modimo.” Kgauswinyane kgodišego yeo ya bona e tla lekwa. Ge e le gabotse, Jesu o hlalosa seo se letšego ka pele o re: “Bonang! Nako e a tla, e bile e fihlile, yeo ka yona le tlago go gašanywa gomme yo mongwe le yo mongwe a ya ntlong ya gagwe. Le tla ntlogela ke nnoši.” Lega go le bjalo o ba kgonthišetša ka gore: “Ke le boditše dilo tše gore ka nna le be le khutšo. Mo lefaseng le a tlaišega, eupša betang dipelo! Ke fentše lefase.” (Johane 16:30-33) Aowa, ga se gore Jesu o a ba lahla. O kgodišegile gore le bona ba ka fenya lefase go swana le yena, ka gore ba phethagatše thato ya Modimo ka potego go sa šetšwe maiteko a Sathane le a lefase la gagwe a go ba dira gore ba se botege.