Sesusi nono apositolu mbae, ankho vekahi nokutunda mosapalalo omu valila Opasikwa. Etyi evepopila omalondolo amwe esukisa, Sesusi evepopila ati: “Ame nemupopila ovipuka ovio opo muhalinge onkhali.” Omokonda yatyi ankho esukisila okuvelondola ngotyo? Sesusi wati: “Ovanthu mavekemutaata mondyuo yokufendela. Tyotyili, makuya omuvo umwe ovanthu mavekemuipaa avasoko okuti vekahi nokuumbila Huku.” — Suau 16:1, 2.

Onondaka ombo tyipondola mbatilisile owoma ono apositolu. Namphila Sesusi ankho evepopila-le okuti mavayalwa nouye, mahi kevepopilile okuti mavayalwa alo umwe avaipawa. Omokonda yatyi? Sesusi wati: “Ame hemupopilile ovipuka ovio potete, mokonda ankho ndyikahi no onwe.” (Suau 16:4) Pahe ankho ukahi nokuvelondola, tyina nkhele eheneende. Otyo ankho matyivekuatesako okukoleleya, avahayeke-ko.

Sesusi atualako ati: “Pahe ndyenda ku Una wanthuma; no ngotyo, nawike pu onwe umphula okuti, ‘Wenda-pi?’” Kongulohi motyinthiki otyo, ankho vemupula opi ankho maende nako. (Suau 13:36; 14:5; 16:5) Mahi mokonda vatila owoma etyi evepopila okuti mavamoneswa ononkhumbi, pahe ankho vekahi vala nokusoka kemone mavakala nalio. Moluotyo avehetyivili okumupula vali konthele yomunkhima ankho makakala nao komutwe iya oityi ankho otyo matyietela ovafendi votyotyili. Sesusi ati: “Mokonda nemupopila ovipuka ovio, omitima vienyi vianumana.” — Suau 16:6.

Konyima, Sesusi ahangununa okuti: “Ndyenda na tyimuetele ouwa. Mokonda inkha hiende, omukuatesiko kameya ku onwe, mahi inkha ndyenda mandyimutumu-e.” (Suau 16:7) Ankho ovalongwa va Sesusi mavatambula vala ononkhono mba Huku, putyina Sesusi amaipawa, aende keulu. Ankho membutumu ngomukuatesiko kovanthu va Huku kombanda yohi aiho.

Ononkhono mba Huku ankho ‘mambulekesa umwe nawa ku aveho oityi onkhali, oityi ouviuki, iya ekoyeso patyi litunda ku Huku.’ (Suau 16:8) Ngotyo ovanthu vouye vahakalele nekolelo Momona wa Huku ankho mavaholololwa. Sesusi okuenda keulu ankho matyilekesa nawa ouviuki wae, tupu matyilekesa omokonda yatyi Satanasi, “omutumini wouye uno,” makoyesilwa. — Suau 16:11.

Sesusi atualako okupopia ati: “Ame nkhele ndyina ovipuka ovinyingi ndyihanda okumupopila, mahi pehepano kamamutyivili okuvinoñgonoka.” Putyina ankho amevetumu ononkhono mba Huku, mambuvehongolela, avanoñgonoka “otyili atyiho” iya avetyivili okuendesila omuenyo wavo motyili otyo. — Suau 16:12, 13.

Ono apositolu avanguanguana etyi Sesusi apopia okuti: “Apa katutu onwe kamamumono vali, iya tupu apa katutu onwe mamumono.” Avahimbika okulipula oityi ahanda okupopia. Sesusi etyimono okuti vahanda okumupula konthele yetyi apopia, ahangununa okuti: “Ame ndyimupopila otyili okuti, mamukalila, amukeliyava, mahi ouye maukakala nehambu; onwe mamukeihamenwa unene, mahi omaluihamo enyi maakapiluluka aakala ehambu.” (Suau 16:16, 20) Putyina Sesusi ankho maipawa komakumbi onthiki mailandulako, ononkhalamutwe mbonongeleya ankho mavahambukwa, mahi ovalongwa mavalili. Konyima, okulila kuavo ankho makukala ehambu, tyina Sesusi amatutiliswa! Iya ehambu liavo malitualako alo eveavela ononkhono mba Huku.

Sesusi aeleka onkhalelo omukai makutula eihamenwa, netyi ono apositolu mavakala, ati: “Tyina omukai akutula wihamenwa unene mokonda omuvo wae wehika-po, mahi tyina amakutula omona, kahinangela vali oluihamo, mokonda waeta omona kouye.” Sesusi aavela ondundo ono apositolu mbae, ati: “No onwe pahetyino nkhele mueihamenwa; mahi tyina haa muamamono vali, mamukala nehambu enene momitima vienyi, iya nawike memupolo ehambu lienyi.” — Suau 16:21, 22.

Alo pomuvo opo ono apositolu ankho kavaiti natyike menyina lya Sesusi. Ngwe evepopila ati: “Monthiki oyo onwe mamukaita ku Tate menyina liange.” Omokonda yatyi ankho vesukisila okulinga ngotyo? Ankho hamokonda-ko Tate yae kahande okuveavela etyi vaita. Mahi Sesusi wati: “Tate muene una oluembia no onwe, mokonda onwe muna ohole na ame . . . ame neya menyina lya Huku.” — Suau 16:26, 27.

Mokutala onondaka mba Sesusi mbaavelele ondundo ono apositolu mbae, avapopi okuti: “Onthue tutavela okuti ove watunda ku Huku.” Onthumbi oyo vena, ankho mailolwa. Moluotyo, Sesusi apopi ovipuka ankho mavivemonekela komutwe, ati: “Talei! Oola maihikipo, iya yehikapo-ale, oola mamuyandyaneswa, kese umwe maende keumbo liae muene, amunthyi-po andyike.” Mahi evepameka ati: “Ame nemupopila ovipuka evi, opo onwe mukale nombembwa menyina liange. Mouye onwe mamumono ononkhumbi, mahi kolei omutima! Ame, nafinda ouye.” (Suau 16:30-33) Sesusi ankho kekahi nokuveyeka-po. Ankho una onthumbi yokuti navo mavakala nomutima wakola avafindi ouye ngae, mokufuisapo ehando lya Huku noukuatyili, namphila Satanasi novanthu vouye wae mavaovola okuvelola opo vayekepo oukuatyili wavo.