Akaparaan lan onalis si Jesus tan saray apostol ed tagey a kuarto a nanselebraan day Paskua. Kayari to ran binilin, oniay inkuan ni nen Jesus: “Imbagak iraya ed sikayo pian agkayo nigapol.” Akin et duga labat ya pasakbayan to ra? Inkuan tod sikara: “Papawayen kayoy totoo ed sinagoga. Diad tua et onsabi so oras sano isipen na amin a mamatey ed sikayo ya akapanggawa ray sagradon panaglingkor ed Dios.”​—Juan 16:1, 2.

Nayarin agonigon iray apostol ed satan. Anggaman imbaga la nen Jesus a busolen ira na mundo, agto direktan imbagad sikara a pateyen ira. Akin? Inkuan to: “Agko imbaga iraya ed sikayo diad gapo, lapud kaiba yo ak.” (Juan 16:4) Natan et ipaparaan to la ra antis ya onalis. Nayarin ontulong itan ed sikara pian ag-ira nagapol ed arapen.

Inkuan ni nen Jesus: “Onla ak lad samay angibaki ed siak; ingen ta anggapod sikayo so nantepet ed siak, ‘Iner so laen mo?’” Diad saman a labi, antis to yan imbaga, labay dan naamtaan no iner so laen to. (Juan 13:36; 14:5; 16:5) Balet natan, lapud natatakot irad imbaga to ya napasegsegang ira, naermenan iran maong. Kanian agla ra nantepet nipaakar ed gloria a nagamoran to odino no antoy kabaliksan na satan ed saray tuan managdayew. Naimano nen Jesus: “Lapud imbagak iraya ed sikayo, maer-ermen so kapusoan yo.”​—Juan 16:6.

Insan impaliwawa to: “Pankaabigan yoy itaynan ko. Ta no agak ontaynan, ag-onlad sikayo so mananulong; balet no onla ak, sikatoy ibakik ed sikayo.” (Juan 16:7) No ompatey si Jesus tan onlad tawen, insan labat naawat na saray disipulo to so masanton espiritu ya ibaki to bilang mananulong ed totoo to inerman so kawalaan da ed dalin.

Say masanton espiritu so “mangiter ed mundo na makakombinsin paneknek nipaakar ed kasalanan, inkatunong, tan panangukom.” (Juan 16:8) On, napatnagan a say mundo et anggapoy pananisia tod Anak na Dios. Say iyakar nen Jesus ed tawen et mangiter na makakombinsin paneknek nipaakar ed inkatunong to tan ipanengneng na satan no akin a si Satanas, say “manuley na sayan mundo,” et makanepegan na ambelat a panangukom.​—Juan 16:11.

Inkuan ni nen Jesus: “Dakel ni so ibagak ed sikayo, balet agyo ni natalosan iratan natan.” No ikalbo toy masanton espiritu, ontulong itan ed sikara pian natalosan so “amin a katuaan,” tan makapambilay ira unong ed satan a katuaan.​—Juan 16:12, 13.

Imbaga ni nen Jesus: “Diad daiset nin panaon et agyo ak la nanengneng, tan diad daiset met a panaon et nanengneng yo ak lamet.” Ag-iya atalosan na saray apostol kanian nantetepetan ira no antoy labay ton ibaga. Alikas nen Jesus ya labay dan tepetan nipaakar ed saya, kanian impaliwawa to: “Ibagak ed sikayoy tua, onakis tan manugaog kayo, balet manliket so mundo; manermen kayo, balet nasalatay liket so ermen yo.” (Juan 16:16, 20) Nen pinatey si Jesus kasabi ngarem, malikeliket iray lider na relihyon, balet maer-ermen iray disipulo. Ingen ta asalatan na liket so ermen da sanen pinaoli si Jesus! Tan nantultuloy so liket da nen inkalbo toy masanton espiritu na Dios ed sikara.

Inkompara nen Jesus so situasyon na saray apostol ed sakey a biin manpapasakit, a kuan to: “Sano mananak lay sakey a bii, sikatoy maermen lapud asabi lay oras to, balet sano niyanak to lay ugaw, agto la nanonotan so impanirap to lapud gayaga to a niyanak ed mundo so sakey a too.” Pinaseseg nen Jesus iray apostol to: “Maneermen kayo met natan; balet nanengneng ta kayo lamet, tan manliket so kapusoan yo, tan anggapoy makapangekal ed liket yo.”​—Juan 16:21, 22.

Diad saman et agnin balot kinmerew iray apostol diad panamegley na ngaran nen Jesus.  Natan, inkuan to: “Diad satan ya agew et onkerew kayo ed Ama diad ngaran ko.” Akin et ontan so kaukolan dan gawaen? Aliwan lapud ag-ira labay ya ebatan na Ama. Diad tua et imbaga nen Jesus: “Aaroen kayo na Ama, lapud inaro yo ak tan anisia kayo a linma ak dia a mangirepresenta ed Ama.”​—Juan 16:26, 27.

Say makapaseseg iran salita nen Jesus ed saray apostol et nayarin amabiskeg ed sikaran mangibaga: “Lapud saya et manisia kami a nanlapu kad Dios.” Magano lan nasubok itan a papanisiaan da. Deneskribe nen Jesus no antoy nagawa: “Onsabi so oras, diad tua et sinmabi la itan, a balang sakey ed sikayo et ombatik ed abung to tan taynanan yo ak a bukor.” Balet impaseguro tod sikara: “Imbagak iraya ed sikayo pian nawalaan kayoy kareenan ed panamegley ko. Diad mundo et manirap kayo, balet manpakpel kayo! Tinalok so mundo.” (Juan 16:30-33) Talagan ag-ira paulyanan nen Jesus. Sikatoy matalek a sarag dan taloen so mundo, a singa sikato, diad matoor a panumpal da ed linawa na Dios anggaman sasalien nen Satanas tan say mundo to ya deralen so integridad da.