Hesus i su apòstelnan tabata kla pa sali for di e kamber ariba kaminda nan a selebrá e sena di Pasku Hudiu. Hesus a kaba di spièrta su apòstelnan i a duna nan vários konseho. I el a bisa nan: “Mi a bisa boso e kosnan akí pa boso no trompeká.” Dikon e spièrtamentu akí tabata na su lugá? Hesus a bisa nan: “Nan lo ekspulsá boso for di snoa. De echo, lo yega e ora ku esnan ku mata boso lo kere ku di e forma ei nan ta rindi un sirbishi sagrado na Dios.”—Huan 16:1, 2. 

Loke Hesus a kaba di bisa su apòstelnan lo a laga nan masha preokupá. Anteriormente, el a bisa nan ku mundu lo a odia nan, pero nunka promé el a bisa nan ku nan lo a ser matá. Dikon nò? El a bisa: “Mi no a bisa boso e kosnan akí for di kuminsamentu, pasobra mi tabata huntu ku boso.” (Huan 16:4) Pues, awor ku Hesus tabata bayendo shelu, el a bisa su apòstelnan e kosnan akí pa nan no trompeká despues.

El a sigui bisa: “Mi ta bai serka Esun ku a manda mi; tòg ningun di boso no ta puntra mi: ‘Unda bo ta bai?’” Mas promé, riba e anochi ei, nan a puntra Hesus unda e tabata bai. (Huan 13:36; 14:5; 16:5) Pero awor nan tabata tristu debí na loke el a kaba di bisa nan tokante persekushon; p’esei nan no a puntr’é nada mas. Pues, nan no a puntr’é nada tokante e gloria ku tabata sper’é ni kiko esei lo a nifiká pa berdadero adoradónan di Dios. Hesus a bisa nan: “Komo ku mi a bisa boso e kosnan akí, boso kurason ta yen di tristesa.”—Huan 16:6.

Anto Hesus a splika nan: “Ta kumbiní boso ku mi ta bai. Pasobra si mi no bai, e ayudante lo no bini serka boso; ma si mi bai, lo mi mand’é serka boso.” (Huan 16:7) Hesus mester a muri i bai shelu pa e por a manda spiritu santu, esta, e ayudante, ku lo a yuda su disipelnan unda ku nan ta.

Spiritu santu lo a mustra “mundu bon kla kiko ta piká, kiko ta hustisia i kiko ta e huisio di Dios.” (Huan 16:8) Sí, lo a sali na kla ku mundu no ta pone fe den e Yu di Dios. Ora Hesus lo a bai shelu, hende lo a haña prueba konvinsente ku e tabata i ta un persona hustu i dikon Satanas, “e gobernante di e mundu akí,” meresé un huisio desfaborabel.—Huan 16:11.

Hesus a sigui bisa su apòstelnan: “Mi tin hopi kos mas di bisa boso, ma boso no por komprondé nan aworakí.” Ta despues ku Hesus lo a drama spiritu santu riba nan, esaki lo a yuda nan komprondé “e bèrdat plenamente.” I spiritu santu lo a yuda nan biba di akuerdo ku e bèrdat ei.—Huan 16:12, 13.

E apòstelnan a keda tur konfundí ora Hesus a bisa nan: “Aki poko tempu boso lo no mira mi mas, ma despues di poko tempu atrobe, boso lo mira mi.” Nan tabata puntra otro kiko e tabata ke men. Hesus, kende a komprondé ku su palabranan a lanta algun pregunta serka nan, a bisa nan: “Di bèrdat bèrdat mi ta bisa boso: Boso lo yora i lamentá, ma mundu lo alegrá; boso lo ta masha tristu, ma boso tristesa lo kambia den goso.” (Huan 16:16, 20) Sí, e lidernan religioso lo a alegrá ora nan lo a mata Hesus mas lat riba e dia ei. Pero e disipelnan lo a lamentá; ma nan tristesa lo a bira alegria ora Hesus lo a ser resusitá. I nan lo a keda masha kontentu ora ku Hesus lo a drama Dios su spiritu santu riba nan.

Hesus a kompará e situashon di su apòstelnan ku e situashon di un muhé ku doló di parto. El a bisa: “Ora un muhé ta bai duna lus, e tin doló pasobra su ora a yega; ma despues ku e haña yu, e ta keda asina kontentu ku el a trese un yu na mundu ku e no ta kòrda mas riba tur e sufrimentu ku el a pasa aden.” I Hesus a animá su apòstelnan, bisando: “Asina tambe, aworakí  boso ta tristu; ma lo mi mira boso atrobe i boso kurason lo alegrá, i ningun hende no por kita boso goso for di boso.”—Huan 16:21, 22.

Nunka promé e apòstelnan a hasi un petishon den nòmber di Hesus. Pero awor Hesus a bisa nan: “Riba e dia ei boso lo pidi e Tata den mi nòmber.” Dikon nan mester a hasi esei? Akaso e Tata no tabata ke yuda nan? Nò, al kontrario, Hesus a bisa: “E Tata mes tin kariño pa boso, ya ku boso tin kariño pa mi i ta kere ku mi a bini komo representante di e Tata.”—Huan 16:26, 27.

Hesus su palabranan a animá su apòstelnan i a motivá nan pa bisa ku konvikshon: “Esaki ta pone nos kere ku bo a bini di Dios.” Pero, lo no a dura muchu ku nan konvikshon lo a ser poné na prueba. Siguientemente, Hesus a deskribí loke tabata spera nan. El a bisa nan: “Wak! Lo yega e ora, de echo, e ora a yega kaba, ku kada un di boso lo kore bai su kas i laga mi mi so.” Pero el a trankilisá nan, bisando: “Mi a bisa boso e kosnan akí pa asina boso por tin pas pa medio di mi. Den mundu boso ta pasa tribulashon, ma tene kurashi! Mi a vense mundu.” (Huan 16:30-33) Pues, nunka Hesus lo a bandoná nan. I e tabatin konfiansa ku nan tambe por a vense mundu. Kon nan por a logra esei? Kumpliendo kabalmente ku Dios su boluntat apesar di tur e intentonan di Satanas i su mundu pa kibra nan integridat.