Ua sauni nei Iesu ma ona aposetolo e tuua le potu i luga, lea sa faia ai le taumafataga o le Paseka. Ina ua uma ona avatu e Iesu iā i latou le tele o apoapoaʻiga, ona ia toe faapea atu lea: “Ua ou tautala atu i nei mea iā te outou, ina neʻi paʻuʻū outou i le agasala.” Aiseā ua talafeagai ai lea lapataʻiga? Ua ia fetalai atu: “E tuliesea outou e tagata mai i le sunako. O le mea moni, e oo mai le aso e manatu ai so o se tasi na fasiotia outou, ua ia faia se auaunaga paia i le Atua.”—Ioane 16:1, 2.

Atonu ua faapopoleina le ʻauaposetolo i na faamatalaga. E ui lava sa faapea atu Iesu i se taimi muamua o le a ʻinoʻino le lalolagi iā i latou, ae e leʻi fetalai tuusaʻo atu o ia o le a fasiotia i latou. Aiseā? Ua ia faapea atu: “Ou te leʻi taʻuina atu muamua nei mea iā te outou, auā sa ou faatasi pea ma outou.” (Ioane 16:4) E tusa o lea ua muaʻi lapataʻia e Iesu ona aposetolo a o leʻi tuua e ia i latou. E ono fesoasoani le lapataʻiga ua taʻua e Iesu, ina ia nofosauni ai le ʻauaposetolo, ma aua ai neʻi tautevateva i se taimi mulimuli ane.

Ua toe faaauau le faamatalaga a Iesu: “Ou te alu atu iā te ia na auina mai aʻu, ae e leʻi fesili mai se tasi o outou iā te aʻu, ʻO fea a e alu i ai?’” Muamua atu i lea lava afiafipō, sa fesili ai le ʻauaposetolo iā Iesu po o fea o le a alu i ai. (Ioane 13:36; 14:5; 16:5) Ae o le taimi lenei, ua lofitūina i latou i le faanoanoa, ona o le atuatuvale i le fetalaiga a Iesu e faatatau i sauāga. O lea, ua lē fesili ai le ʻauaposetolo e faatatau i le mamalu o le a mauaina e Iesu, ma po o le ā foʻi le uiga o lenā mea mo tagata tapuaʻi moni. Ua fetalai atu Iesu: “Ona ua ou taʻu atu nei mea iā te outou, ua mafatia ai o outou loto.”—Ioane 16:6.

Ua faapea atu Iesu: “E aogā iā te outou loʻu alu ese. Auā afai ou te lē alu ese, e lē oo mai le fesoasoani iā te outou. Ae afai ou te alu ese, ona ou auina mai lea o ia iā te outou.” (Ioane 16:7) E faatoʻā maua e soo o Iesu le agaga paia pe a maliu o ia ma afio aʻe i le lagi, ona mafai lea ona ia auina mai le agaga paia o se fesoasoani i ona tagata i so o se vaipanoa o le lalolagi.

O le a aumaia e le agaga paia “se faamaoniga manino i le lalolagi e faatatau i le agasala, le amiotonu, ma le faamasinoga.” (Ioane 16:8) O le mea moni, o le a faaalialia i lumāmea le lē taulau o le lalolagi e faaalia le faatuatua i le Alo o le Atua. O le afio aʻe o Iesu i le lagi, o le a avatu ai se faamaoniga manino o lona amiotonu, ma faaalia ai le māfuaaga ua alagatatau ai ona faasalaina Satani “le pule o lenei lalolagi.”—Ioane 16:11.

Ua faaauau le fetalaiga a Iesu: “E tele mea ou te fia taʻu atu iā te outou, ae e lē mafai ona outou malamalama i na mea uma i le taimi nei.” Pe a liligiina ifo e Iesu le agaga paia i ona soo, ona taʻitaʻia ai lea o i latou “i upu moni uma,” ma o le a latou ola ai e tusa ma lenā upu moni.—Ioane 16:12, 13.

Ua lē malamalama le ʻauaposetolo i le fetalaiga lenei a Iesu: “E toeitiiti ona outou lē toe vāai mai lea iā te aʻu, ae e toeitiiti foʻi ona outou vāai mai lea iā te aʻu.” Ua fesili le tasi i le isi po o le ā le uiga o nei upu. Ua silafia e Iesu o loo latou mananaʻo e fesili atu i le uiga o lenā faamatalaga. O lea ua ia fetalai atu ai: “E moni, e moni, ou te fai atu iā te outou, e tou te fetagisi ma tagituʻi, ae e olioli le lalolagi. E tou te matuā tigā lava, ae e liua lo outou tigā i le olioli.” (Ioane 16:16, 20) E olioli taʻitaʻi lotu ae faanoanoa soo o Iesu, pe a fasiotia o ia i le aoauli o le aso e sosoo ai. Ae pe a toe faatūina Iesu, o le a liua lo latou faanoanoa i le olioli. E faaauau ona latou olioli, pe a liligi ifo e Iesu le agaga paia o le Atua i o latou luga.

Ua faatusatusa nei e Iesu le tulaga faanoanoa o le ʻauaposetolo i tigā o se fafine pe a fanau: “Pe a fanau se fafine, e tigā o ia, auā ua oo mai lona taimi e fanau ai; ae a fanau mai e ia lana tama, e lē toe manatua lona tigā, auā ua ia olioli ina ua fanau mai se tagata i le lalolagi.” Ua faalaeiau atu Iesu i ona aposetolo: “E moni ua outou tigā nei foʻi; ae e tatou te toe feiloaʻi ma e olioli foʻi o outou loto, ma e lē mafai e se tasi ona aveesea lo outou olioli.”—Ioane 16:21, 22.

E oo mai i le taimi lea, e leʻi talosaga atu lava le ʻauaposetolo e ala i le suafa o Iesu. Ua fetalai atu Iesu: “I lenā aso, tou te talosaga atu ai [i le Tamā] i loʻu igoa.” Po o lona uiga e faatalatū le Tamā e tali mai i a latou talosaga? O le mea moni ua fetalai Iesu e faapea: ʻE alofa faapelepele le Tamā iā te outou, ona ua outou alolofa faapelepele mai iā te aʻu e fai ma sui o le Tamā.’—Ioane 16:26, 27.

Atonu o upu faalaeiau a Iesu ua faamalosia ai le ʻauaposetolo e faapea atu: “O le mea lea ua matou talitonu ai, ua e maliu mai i le Atua.” Peitaʻi, e lē o toe umi ona tofotofoina lea o lenā talitonuga maumaututū. Ua faamatala e Iesu le mea o le a tupu: “Faauta! E oo mai le itula ma ua oo mai lava, e taʻitasi outou ma sola i lona lava aiga, ae tuua na o aʻu.” Peitaʻi ua ia faamautinoa atu: “Ua ou fai atu nei mea iā te outou, ina ia outou maua le filemu iā te aʻu. Ua puapuagatia outou i le lalolagi, ae ia lototetele! Ua ou manumalo i le lalolagi.” (Ioane 16:30-33) E lē faapea o le a tuulafoaʻia e Iesu ona aposetolo. Ua ia mautinoa e mafai ona latou manumalo i le lalolagi, e pei ona ia manumalo i le lalolagi. E mafai ona latou faia faapea, e ala i le tumau ma le faamaoni i le faataunuuina o le finagalo o le Atua, e ui i taumafaiga a Satani ma lana lalolagi e gausia lo latou faamaoni.