Lino Jesu abaapostolo bakwe bayanda kuzwa muŋanda yamujulu mobali kulida Pobwe Lyakwiindilila. Naamana kubakulwaizya amajwi manji, Jesu wayungizya kuti: “Ndamwaambila zintu eezyi kutegwa mutalebwi.” Nkaambo nzi majwi aaya aakucenjezya ncaali kweelela? Wabaambila kuti: “Bantu bayoomutanda mucikombelo. Mubwini, ciindi ciyoosika eelyo woonse uumujaya nayakuyeeya kuti wacitila Leza mulimo uusetekene.”—Johane 16:1, 2.

Makani aaya ayelede kuti abakatazya mumoyo baapostolo. Nokuba kuti musyule oomu Jesu wakalibaambilide kuti nyika yakali kuyoobasulaika, tanaakabaambila cacigaminina kuti bakali kuyoojaigwa. Nkaambo nzi? Waamba kuti: “Tiindakamwaambila zintu eezyi kumatalikilo nkaambo ndakalaandinywe.” (Johane 16:4) Lino ulimukubacenjezyela limwi katanaunka. Eeci ciyoobagwasya kutegwa batakalebwi kumbele.

Jesu wazumanana kuti: “Nduunka kuli yooyo wakandituma; pele kunyina akati kanu uundibuzya kuti, ‘Ino uunka kuli?’” Kumangolezya mubuzuba mbubonya oobu balibuzyide kujatikizya nkwaunka. (Johane 13:36; 14:5; 16:5) Pele lino kabapengede mumoyo akaambo kamakani ngaamba kujatikizya kupenzyegwa, bausa kapati. Aboobo baalilwa kumubuzya zimbi kujatikizya bulemu ibumulindila naa ncobuyakwaamba kubakombi bakasimpe. Jesu wati: “Akaambo kakuti ndamwaambila zintu eezyi, myoyo yanu yausa kapati.”—Johane 16:6.

Mpoonya Jesu wapandulula kuti: “Ndilaunka ikutegwa mugwasyigwe. Nkaambo ikuti tiindaunka mugwasyi takabooli kulindinywe pe; pele ikuti naa ndaunka, ndiyoomutuma kulindinywe.” (Johane 16:7) Lilikke buyo kuti Jesu wafwa akuunka kujulu, basikwiiya bakwe nobakonzya kutambula muuya uusalala, ooyo ngwakonzya kutuma kauli mugwasyi kubantu bakwe kufwumbwa nkobabede anyika.

Muuya uusalala ‘uyakupa nyika bumboni busalede kujatikizya cibi, bululami alimwi alubeta.’ (Johane 16:8) Inzya, nyika iyootondezyegwa kuti tiimusyomi Mwana wa Leza. Ikuunka kwa Jesu kujulu buyooba bumboni busalede bwakuti walo mululami alimwi kuyootondezya kaambo Saatani “mweendelezi wanyika eeyi” ncayandika kusubulwa.—Johane 16:11.

Jesu wazumanana kwaamba kuti: “Ndicijisi zintu zinji zyakumwaambila, pele tamukonzyi kuzimvwisya lino.” Aakutila muuya uusalala, muuya ooyo uyoobasololela kuti bakamvwisye “kasimpe koonse,” aboobo bayoocikonzya kupona kweelana akasimpe.—Johane 16:12, 13.

Baapostolo bazyingwa kumvwa majwi aatobela ngaamba Jesu aakuti: “Mukaindi kaniini tamucinoondiboni pe, pele alimwi mukaindi kaniini muyoondibona.” Batalika kubuzyanya kujatikizya ncapandulula. Jesu wazyiba kuti bayanda kumubuzya kujatikizya makani aaya, aboobo wapandulula kuti: “Ncobeni ndimwaambila masimpe kuti, muyoolila akukwiila, pele nyika iyookondwa; muyakuusa, pele kuusa kwanu kuyoosandulwa kuba kukondwa.” (Johane 16:16, 20) Jesu ajaigwa kumazuba mubuzuba mbubonya oobu, basololi babukombi balakondwa, pele basikwiiya balausa. Nokuba boobo, kuusa kwabo kuyoosanduka akuba kukondwa ciindi Jesu aakubusyigwa! Alimwi bayoozumanana kukondwa ciindi aakubatilila muuya uusalala wa Leza.

Kakozyanisya bukkale bwabaapostolo kubukkale bwamukaintu uumyongwa ciindi nayanda kutumbuka, Jesu waamba kuti: “Ciindi mukaintu natumbuka ulausa, nkaambo ciindi cakwe casika, pele naatumbuka mwana, inga tacaayeeyi limbi mapenzi ngaajisi akaambo kakukondwa kwakuti kwazyalwa muntu munyika.” Jesu wakulwaizya baapostolo bakwe, ulaamba: “Andinywe muluuside lino; pele ndiyoomubona alimwi, eelyo myoyo yanu iyookondwa, alimwi kunyina uuyoomunyanga lukkomano lwanu.”—Johane 16:21, 22.

Kusikila aciindi eeci, baapostolo tabanalombede cintu cili coonse muzina lya Jesu. Lino wabaambila kuti: “Mubuzuba oobo muyoolomba kuli  Taata muzina lyangu.” Nkaambo nzi ncobayooyandika kumulomba buya? Takuli akaambo kakuti Taata tayandi kubavwiila. Mubwini, Jesu waamba kuti: “Taata mwini ulamuyanda akaambo kakuti mwali kundiyanda mebo . . . [mbondili] mwiiminizi wa Leza.”—Johane 16:26, 27.

Kweelede kuti majwi aakukulwaizya ngaabaambila Jesu baapostolo abapa kwaamba cakusinizya kuti: “Akaambo kaceeci twasyoma kuti wakazwa kuli Leza.” Lusyomo oolu lulasunkwa lino-lino aawa. Mubwini, Jesu waamba zintu iziyanda kucitika lino-lino, wati: “Amubone! Ciindi cilasika, masimpe casika kale, nomutiimwaikizyanye kuya mwanu-mwanu eelyo mulandisiya ndelikke.” Nokuba boobo, wabakulwaizya kuti: “Ndamwaambila zintu eezyi kutegwa kwiinda mulindime mube aluumuno. Munyika munoojisi mapenzi, pele amube basicamba! Mebo ndaizunda nyika.” (Johane 16:30-33) Masimpe, Jesu tabalekelezyi buya pe. Ulaalusyomo lwakuti abalo balakonzya kwiizunda nyika, mbubonya mbwaaizunda walo, kwiinda mukucita ncayanda Leza cakusyomeka nokuba kuti Saatani anyika yakwe basola kubapa kuleka kusyomeka.