Ko toka eiloa a Iesu mo te kau apositolo ke tiakina a te potu tafa ki luga telā ne fai ei a te ‵kaiga o te Paseka. Mai tua o te tukuatuga o fakamalosiga ke fakaeteete, ne toe fai atu a Iesu: “Ne faipati atu ne au a mea konei ki a koutou ke mo a ma pa‵ku koutou.” Kaia ne fetaui ‵lei ei a pati konā? Ne fai atu a ia ki a latou: “Ka faka‵tea koutou ne tino mai te sunako. E tonu, ka oko mai te itula ka mafau‵fau aka ei a tino katoa kolā e tamate ne latou koutou me ko oti ne ofo atu ne latou se taviniga tapu ki te Atua.”—Ioane 16:1, 2.

Ne mafai eiloa o fakamanavase atu a te mea tenā ki te kau apositolo. E tiga eiloa ne fai atu muamua a Iesu me ka takalia‵lia a te lalolagi ki a latou, ne seki fai ‵tonu atu a ia me ka tamate foki latou. Kaia? “Ne seki faipati atu muamua ne au a mea konei ki a koutou me i a au ne ‵nofo mo koutou,” ko ana muna. (Ioane 16:4) Nei la, ko fakatokatoka faka‵lei ne ia latou a koi tuai o fano a ia keatea. E mafai o fesoasoani atu a te mea tenei ke puipui ei latou mai te loto vāivāi fakamuli.

Ne toe fai mai a Iesu: “Kae nei la au ka fano ki te Tino telā ne uga mai ne ia au; kae e seai eiloa se tino i a koutou ne fesili mai ki a au, ‘A koe e fano ki fea?’” Ne fesili atu eiloa latou mai mua malie o te fakaafiafi tenā me tefea te koga e fano a ia ki ei. (Ioane 13:36; 14:5; 16:5) Kae nei la, ona ko te mea ko pole‵pole latou i ana pati e uiga ki fakasauaga, ne galo atu ei te lotou fanoa‵noa. Telā ne seki toe fesili atu ei latou e uiga ki te ‵malu telā e faka‵tali mai ki a ia io me se a te uiga o te mea tenā mō tino tapuaki ‵tonu. Ne fai atu a Iesu: “Kae ona ko te mea ne faipati atu ne au a mea konei ki a koutou ko fanoa‵noa ei otou loto.”—Ioane 16:6.

Ne toe fakamatala atu a Iesu: “Au e fano keatea mō te ‵lei o koutou. Me kafai e se fano au keatea, ka se mafai eiloa o fanaifo ki a koutou a te fesoasoani. Kae kafai e fano au, ko uga mai ei ne au ki a koutou.” (Ioane 16:7) Ne mafai fua o maua ne ana soko a te agaga tapu, māfai e mate kae fanatu a Iesu ki te lagi, telā ka uga mai ne ia e pelā me se fesoasoani ki ana tino i so se koga o te lalolagi.

Ka tuku atu ne te agaga tapu “se fakamaoniga mautinoa ki te lalolagi e uiga ki te agasala, te amiotonu, mo te faiga o fakamasinoga.” (Ioane 16:8) Ao, ka fakaasi faka‵sau atu a te fakatamala o te lalolagi o fakaasi atu te fakatuanaki ki te Tama a te Atua. A te fanakaga o Iesu ki te lagi, e tuku mai i ei a fakamaoniga mautinoa o tena amiotonu mo te pogai ka maua ei ne Satani, “te pule o te lalolagi tenei,” a te fakasalaga ‵mafa.—Ioane 16:11.

Ne toe fai mai a Iesu: “E uke a mea koi fia fai atu ne au ki a koutou, kae e se mafai o malamalama koutou i ei i te taimi nei.” Kafai ko ‵ligi ifo ne ia te agaga tapu, ka takitaki atu ei latou ke malamalama i “mea ‵tonu katoa,” kae ka mafai ei o ola latou e ‵tusa mo te mea tonu tenā.—Ioane 16:12, 13.

Ne ‵segi a te kau apositolo i nisi fakamatalaga konei a Iesu: “E se leva nei ko se toe lavea ei au ne koutou, kae e se leva foki ka toe lavea ne koutou au.” Ne fakatau fesilisili latou me se a te mea ne fakauiga a ia ki ei. Ne iloa ne Iesu me e fia fesili atu latou ki a ia e uiga ki te mea tenei, telā ne fakamatala atu ei ne ia: “Au e fai ‵tonu atu ki a koutou, a koutou ka ‵tagi kae ‵tagi mautuutu, kae ko te lalolagi ka fia‵fia; ka fanoa‵noa koutou kae ka ‵fuli te otou fanoa‵noa ki te fiafia.” (Ioane 16:16, 20) I te taimi ne tamate ei a Iesu, i te fakaafiafi o te suā aso, ne fia‵fia a takitaki lotu, kae ne fanoa‵noa a soko. Kae ne ‵fuli te lotou fanoanoa ki te fiafia i te taimi ne toe fakatu aka ei a Iesu! Kae ne tumau eiloa te lotou fia‵fia i te taimi ne ‵ligi ifo ei ki luga i a latou a te agaga tapu o te Atua.

Mai te fakatusaga te tulaga o te kau apositolo ki te logo‵mae o te fafine i te taimi ko pili ei o fanau, ne fai mai a Iesu: “Kafai ko fanau se fafine, e fanoanoa a ia me ko oko mai tena itula, kae kafai ko oti ne fanau mai ne ia te tamaliki, ko puli ei i a ia te logo‵mae ona ko te fiafia me ko oti ne fanau mai se tino ki te lalolagi.” Ne fakamalosi atu a Iesu ki ana apositolo, penei: “E penā foki koutou, ko fanoa‵noa nei koutou; kae ka toe lavea ne au koutou ko ‵fonu otou loto i te fiafia, kae e seai se tino ka ave ne ia keatea te otou fiafia.”—Ioane 16:21, 22.

Ke oko mai eiloa ki te taimi tenā, ne seki fai atu eiloa ne te kau apositolo se fakamolemole i te igoa o  Iesu. Ne toe fai atu a ia: “I te aso tenā ka fakatagi atu koutou ki te Tamana i toku igoa.” Kaia e ‵tau ei o fai latou penā? E se fai penā ona ko te tuai o tali mai a te Tamana. A te ‵tonuga loa, ne fai mai a Iesu: “Me e alofa eiloa te Tamana ki a koutou, ona ko koutou ne a‵lofa mai ki a au, . . . e pelā me ko te sui o te Atua.”—Ioane 16:26, 27.

A pati fakamalosi a Iesu ki te kau apositolo, ne fai ei ke fai mai latou mo te loto tali‵tonu, penei: “Ona ko te mea tenei ko tali‵tonu ei matou i a koe ne vau mai te Atua.” E seki leva kae ka tofotofo aka ei te loto talitonu tenā. A te ‵tonuga loa, ne fakamatala atu ne Iesu a mea ka ‵tupu i aso mai mua: “Kiloke! Ka oko mai te itula, e tonu, ko oti eiloa ne oko mai, kae ka mafuta valevale koutou taki tokotasi ki otou fale kae ka tiaki ne koutou au ke nofo tokotasi i konei.” Kae ne fakatalitonu atu a ia ki a latou: “Ne faipati atu ne au a mea konei ki a koutou ko te mea ke maua ne koutou a te filemu e auala i a au. Ka maua ne koutou a fakalavelave i te lalolagi nei, kae ke loto ‵toa! Ko oti ne fakatakavale ne au te lalolagi nei.” (Ioane 16:30-33) E se fakauiga i ei me ko tiakina ne Iesu a latou. E pelā mo ia, e mautinoa eiloa i a ia me ka fakatakavale foki ne latou a te lalolagi, e auala i te fakataunuga ne latou a te loto o te Atua, faitalia a taumafaiga a Satani mo tena lalolagi ke fakamasei te lotou fakamaoni.