Te faarue ra Iesu e ta ˈna mau aposetolo i te piha i nia i reira ratou i amu ai i te Pasa. Mea rahi ta Iesu faaararaa ia ratou, na ô faahou atura oia: “Ua parau atu vau i teie mau mea ia ore outou e taiva.” No te aha mea tano ai teie parau? Na ô atura oia: “E tiavaruhia outou i rapae i te sunago. Inaha, ua fatata te taime e manaˈo ai te feia o te haapohe ia outou e te pûpû ra ratou i i te hoê taviniraa moˈa i te Atua.”—Ioane 16:1, 2.

Ua peapea paha te mau aposetolo i teie parau. Ua parau aˈenei Iesu e e hae teie nei ao ia ratou, aita râ oia i parau roa ˈtu e e haapohehia ratou. No te aha? Na ô atura oia: “Aita vau i parau atu i teie mau mea i te omuaraa, no te mea i pihai iho na vau ia outou.” (Ioane 16:4) I teie nei, te faaara ra oia ia ratou hou a reva ˈi ia ore ratou ia taiva i muri aˈe.

Parau faahou atura Iesu: “Te haere nei au i tei tono mai ia ˈu, e aore roa râ hoê o outou e ui mai e te haere nei au ihea.” I taua noa po ra, ua ui aˈenei ratou ia ˈna e te haere ra oia ihea. (Ioane 13:36; 14:5; 16:5) I te faaiteraa râ oia e e hamani-ino-hia ratou, taiâ e oto ihora ratou. Aita ˈtura ïa ratou i uiui atu â ia ˈna no nia i te hanahana ta ˈna e fanaˈo e te auraa o te reira no te feia e haamori mau ra i te Atua. Na ô atura Iesu: “No to ˈu parauraa ˈtu i teie mau mea i oto ai to outou aau.”—Ioane 16:6.

Faataa ˈtura Iesu: “No to outou hoi maitai e haere ai au. Ia ore hoi au e haere, e ore te tauturu e tae mai ia outou ra. Ia haere râ vau, e tono mai au i taua tauturu ra ia outou ra.” (Ioane 16:7) Na roto noa i to Iesu pohe e haereraa i te raˈi e fanaˈo ai ta ˈna mau pǐpǐ na te mau vahi atoa o te fenua i te varua moˈa, ta ˈna e tono mai ei tauturu.

“E faaite roa [te varua moˈa] i to te ao eaha te hara, eaha te parau-tia e eaha te haavaraa no ǒ mai i te Atua.” (Ioane 16:8) E faaitehia iho â e aita teie nei ao e faatupu ra i te faaroo i te Tamaiti a te Atua. E haapapu to Iesu revaraa i te raˈi i to ˈna huru parau-tia a itehia ˈtu ai no te aha mea tano ai ia faautuahia Satani “te arii o teie nei ao.”—Ioane 16:11.

Na ô faahou atura Iesu: “Mea rahi â ta ˈu e parau ia outou, eita râ e taa ia outou i teie nei.” Ia ninii oia i te varua moˈa i nia ia ratou e taa roa ˈi ia ratou “te parau mau,” a nehenehe atu ai e ora ia au i te reira.—Ioane 16:12, 13.

Maere ihora te mau aposetolo i ta Iesu i parau i muri iho: “E maa taime â e ore outou e ite faahou mai ia ˈu, e e maa taime â e ite mai outou ia ˈu.” Ui aˈera te tahi i te tahi eaha te auraa. Taa ihora ia Iesu e hinaaro ratou e ite atu â, e faataa ˈtura: “E parau mau ta ˈu e parau atu: E taˈi e e auê outou, e oaoa râ to te ao. E oto outou, e riro râ to outou oto ei oaoa.” (Ioane 16:16, 20) I te haapoheraahia Iesu ananahi aˈe i te taperaa mahana, oaoa ihora te mau aratai haapaoraa, oto ihora râ te mau pǐpǐ. Ua riro râ to ratou oto ei oaoa i te faatiaraahia mai Iesu! Ua oaoa atu â ratou i to ˈna niniiraa i te varua moˈa o te Atua i nia ia ratou.

Faaau atura Iesu i te tupuraa o te mau aposetolo i to te hoê vahine e roohia ra e te mauiui fanau: “E mauiui te hoê vahine i te taime e fanau ai oia. Ua fanau anaˈe râ oia i ta ˈna aiû iti, eita oia e haamanaˈo faahou i to ˈna mauiui no to ˈna oaoa e e taata tei fanauhia mai i te ao nei.” Faaitoito atura Iesu i ta ˈna mau aposetolo: “Outou atoa ïa, te oto nei outou i teie nei. Tera râ, e ite faahou vau ia outou e e oaoa to outou aau, e aore e taata e rave ê atu i to outou oaoa.”—Ioane 16:21, 22.

Tae roa i taua taime ra, aita te mau aposetolo i pure aˈenei ma te iˈoa o Iesu. Parau ihora oia:  “I taua mahana ra, e pure outou i te Metua ma to ˈu iˈoa.” No te aha? E ere no te mea eita te Metua e hinaaro e pahono. Parau atura râ Iesu: “Mea here hoi na te Metua ia outou, no te mea mea here na outou ia ˈu e ua tiaturi e no ǒ mai au i te Metua.”—Ioane 16:26, 27.

No ta Iesu mau parau faaitoito i parau roa ˈtu ai te mau aposetolo: “No reira matou e tiaturi ai e no ǒ mai oe i te Atua.” Fatata râ to ratou tiaturiraa i te tamatahia. Faataa ˈtura Iesu eaha te tupu: “Inaha, ua fatata te taime e ua fatata roa hoi, e horo ai outou pauroa i to outou iho fare, a faarue mai ai ia ˈu o vau anaˈe.” Haapapu atura râ oia: “Ua parau atu vau i teie mau mea ia outou ia noaa ia outou te hau na roto ia ˈu. E ati to outou i roto i teie nei ao, a faaitoito râ! Ua vî teie nei ao ia ˈu.” (Ioane 16:30-33) Aita roa ˈtu Iesu e faarue ra ia ratou. Ua papu ia ˈna e nehenehe e vî ia ratou atoa teie nei ao mai ia ˈna, ia haapao maite ratou i te hinaaro o te Atua noa ˈtu te mau tamataraa a Satani e ta ˈna ao ia taiva ratou.