Hi Jesus ngan an mga apostol tibaya na ha kwarto ha igbaw diin hira nagsaurog han panihapon ha Paskua. Damu an iginsagdon ni Jesus ha ira, ngan nagdugang pa hiya: “Ginyayakan ko ini ha iyo basi diri kamo mahipakdol.” Kay ano nga angayan gud ini nga pahamangno? Ginsidngan niya hira: “Paiiwason kamo han mga tawo tikang ha sinagoga. Ha pagkamatuod, maabot an oras nga an nagpapatay ha iyo maghuhunahuna nga nagbubuhat hiya hin sagrado nga pag-alagad ha Dios.”—Juan 16:1, 2.

Bangin nabaraka hito an mga apostol. Bisan kon nagsumat hi Jesus ha naglabay nga masisina ha ira an kalibotan, waray hiya direkta nga magsiring nga papatayon hira. Kay ano? Nagsiring hiya: “Waray ko ini isumat ha iyo tungod kay kaupod pa ako niyo.” (Juan 16:4) Yana ginpapahamangnoan niya hira antes hiya bumaya. Makakabulig ini ha ira nga diri mahipakdol ha urhi.

Hi Jesus nagpadayon: “Tikadto ako ha nagsugo ha akon, pero waray ha iyo napakiana ha akon, ‘Makain ka?’” Temprano hito nga gab-i, nagpakiana hira kon diin hiya makadto. (Juan 13:36; 14:5; 16:5) Pero yana, tungod kay nahadlok hira ha iya ginsiring mahitungod han pagtimaraot, nasubo hira hinduro. Salit waray na hira magpakiana pa mahitungod han himaya nga naghuhulat ha iya o kon ano an magigin epekto hito ha tinuod nga mga magsiringba. Naobserbaran ito ni Jesus, salit hiya nagsiring: “Tungod kay iginsumat ko ini ha iyo, napuno hin kasubo an iyo kasingkasing.”—Juan 16:6.

Katapos hi Jesus nagsaysay: “Para ha iyo kaopayan an akon pagbaya. Kay kon diri ako bumaya, diri gud makanhi ha iyo an parabulig; kondi kon bumaya ako, pakakanhion ko ito ha iyo.” (Juan 16:7) Pinaagi la ha pagkamatay ngan pagkadto ni Jesus ha langit makakarawat han mga disipulo an baraan nga espiritu, nga iya ipapadara sugad nga parabulig ha iya katawohan ha bisan diin nga dapit han tuna.

An baraan nga espiritu ‘magpapakita ha kalibotan kon ano an sala, kon ano an matadong, ngan kon ano an paghukom han Dios.’ (Juan 16:8) Oo, ibubuhayhag an kapakyas han kalibotan nga magpakita hin pagtoo ha Anak han Dios. An pagsaka ni Jesus ha langit maghahatag hin makakombinse nga pamatuod han iya pagkamatadong ngan magpapakita kon kay ano nga takos gud bungkagon hi Satanas, “an magmarando hini nga kalibotan.”—Juan 16:11.

Hi Jesus nagpadayon: “Damu pa an akon igsisiring ha iyo, pero diri kamo makakasabot hito yana.” Kon ibubo na niya an baraan nga espiritu, gigiyahan hira hito nga masabtan hin “bug-os an kamatuoran,” ngan mahihimo nira nga magkinabuhi uyon hito nga kamatuoran.—Juan 16:12, 13.

Waray masabti han mga apostol an dugang nga ginsiring ni Jesus: “Diri mag-iiha diri na ako niyo makikita, ngan diri liwat mag-iiha makikita ako niyo.” Nagpinakianahay hira kon ano an iya karuyag sidngon. Nasantop ni Jesus nga karuyag nira magpakiana ha iya mahitungod hini, salit nagsaysay hiya: “Ha pagkamatuod susumatan ko kamo, Magtatangis kamo ngan magngunguyngoy, pero an kalibotan magrarayhak; masusubo gud kamo, pero an iyo kasubo magigin kalipay.” (Juan 16:16, 20) Han ginpatay hi Jesus kinabuwasan han kulop, nagkalipay an mga lider han relihiyon, pero an mga disipulo nasubo hinduro. Katapos an ira kasubo nasaliwnan hin kalipay han ginbanhaw hi Jesus! Nagpadayon pa gud an ira kalipay han iya iginbubo ha ira an baraan nga espiritu han Dios.

Igintanding ni Jesus an kahimtang han mga apostol ha usa nga babaye nga nagbabati, ha pagsiring: “Kon nanganganak an babaye, naabat hiya hin kaul-ol; pero katapos manganak, diri na hiya nahinunumdom han kasakit tungod ha kalipay nga natawo na an iya anak.” Gindasig ni Jesus an iya mga apostol: “Nasusubo liwat kamo yana, pero makikigkita utro ako ha iyo ngan magrarayhak kamo, ngan waray makakakuha han iyo kalipay.”—Juan 16:21, 22.

Tubtob hito nga takna, waray pa gud maghangyo an mga apostol pinaagi ha ngaran ni Jesus. Hiya nagsiring: “Hito nga adlaw mangangaro kamo ha Amay ha akon ngaran.” Kay ano nga kinahanglan nira ito buhaton? Diri man tungod kay nadiri an Amay ha pagbaton ha ira. Ngani, hi Jesus nagsiring: “Pinalangga kamo han Amay, tungod kay pinalangga niyo ako . . . sugad nga representante han Amay.”—Juan 16:26, 27.

Posible nga tungod han makaparig-on nga mga pulong ni Jesus, an mga apostol may pagsarig nga nagsiring: “Tungod hini, natoo kami nga tikang ka ha Dios.” Diri mag-iiha masasarihan an ira pagtoo hito. Ha pagkamatuod, iginhulagway ni Jesus kon ano an hirani na mahitabo: “Kitaa! Hirani na gud umabot an oras nga magbuburublag kamo kay an tagsa ha iyo mauli ha iyo kalugaringon nga balay ngan babayaan niyo ako nga nag-uusahan.” Pero ginpasarig niya hira: “Iginsusumat ko ini ha iyo basi pinaagi ha akon magkaada kamo kamurayawan. Ha kalibotan may kasakitan kamo, pero magmaisugon kamo! Gindaog ko an kalibotan.” (Juan 16:30-33) Diri man kay papabay-an hira ni Jesus. Nakakasiguro hiya nga pariho ha iya, madadaog liwat nira an kalibotan pinaagi han ira matinumanon nga pagtuman ha kaburut-on han Dios. Mahihimo nira ito bisan pa han mga pagsari ni Satanas ngan han iya kalibotan nga wad-on an ira integridad.