Jesús yéetel u apostoloʼobeʼ éemoʼob teʼ cuarto tuʼux tu jaantoʼob le Pascuaoʼ. Ka tsʼoʼok u yaʼaliktiʼob yaʼab baʼaloʼobeʼ tu yaʼalajtiʼob: «Tsʼoʼok in waʼalikteʼex le baʼaloʼobaʼ utiaʼal maʼ u beetaʼal a tʼóochpajleʼex». ¿Baʼaxten jach maʼalob le baʼax tu yaʼalajtiʼobaʼ? Jesuseʼ ku yaʼalik: «Yaan a tojolchʼintaʼaleʼex teʼ sinagogaoʼ. Yaan tak u kʼuchul u kʼiinileʼ, tuláakal máax kun kíimskeʼexeʼ yaan u tuklik táan u beetik junpʼéel baʼax maʼalob tu táan Dios» (Juan 16:1, 2).

Maʼ xaaneʼ lelaʼ tu beetaj u chiʼichnaktal le apostoloʼoboʼ. Tumen kex tu yaʼalajtiʼob yaan u chʼaʼpachtaʼaloʼobeʼ, mix juntéen u yaʼaltiʼob wa yaan u kíimsaʼaloʼob. ¿Baʼaxten? Letiʼeʼ tu yaʼalaj: «Maʼ tin waʼalajteʼex tu káajbaliʼ tumen tiʼ yanen kaʼach ta wéeteleʼexeʼ» (Juan 16:4). Táanil túun tiʼ u bineʼ tu méekʼoʼob. Lelaʼ le áantoʼob utiaʼal maʼ u beetaʼal u tʼóochpajloʼob tu yoʼolal.

Jesuseʼ seguernaj u yaʼaliktiʼob: «Teneʼ táan in bin tu yiknal le máax túuxtenoʼ, baʼaleʼ mix juntúul tiʼ teʼex ku kʼáatikten: ‹¿Tuʼux ka bin?›». Láayliʼ tiʼ le tarde jeʼeloʼ tsʼoʼok u yáax aʼaliktiʼob tuʼux ku bin (Juan 13:36; 14:5; 16:5). Baʼaleʼ tumen táan u tuukuloʼob tiʼ le úuchik u yaʼalik yaan u chʼaʼpachtaʼaloʼoboʼ, maas táan u tuukuloʼob chéen tiʼ letiʼob. Le oʼolal maʼ tu kʼáatoʼob mix baʼal yoʼolal le nojbeʼenil ken u kʼamoʼ wa baʼax u kʼáat u yaʼal tiʼ tuláakal le máaxoʼob adorartik Diosoʼ. Jesuseʼ tu yaʼalajtiʼob: «Tumen tsʼoʼok in waʼalikteʼex le baʼaloʼobaʼ tsʼoʼok u chuʼupul a puksiʼikʼaleʼex yéetel yaayaj óolal» (Juan 16:6).

Le oʼolal tu yaʼalajtiʼob: «Teneʼ táan in bin utiaʼal a wutsileʼex. Tumen wa maʼ in bineʼ, le kiliʼich muukʼ kun áantkeʼexoʼ junpuliʼ maʼ kun taal ta wiknaleʼex; baʼaleʼ wa kin bineʼ yaan in túuxtikteʼex» (Juan 16:7). Chéen wa ku kíimil Jesús yéetel wa ku kaʼa kuxtal utiaʼal u bin teʼ kaʼanoʼ, jeʼel u páajtal u túuxtik le kiliʼich muukʼ utiaʼal áantik le disipuloʼob jeʼel tuʼuxak ka yanakoʼob way Luʼumaʼ.

Le kiliʼich muukʼoʼ «yaan u yeʼesik tiʼ tuláakal máak baʼax jach tu jaajil le kʼebanoʼ, le justiciaoʼ yéetel le juicio ken u taas Diosoʼ» (Juan 16:8). Jach beyoʼ, yaan u chíikpajal le yóokʼol kaabaʼ maʼ tu tsʼáaj u fe tiʼ u Hijo Diosiʼ. Le ken xiʼik teʼ kaʼanoʼ yaan u yeʼesik u «justicia» yéetel yaan u chíikbesik baʼaxten Satanás, «u gobernanteil le yóokʼol kaabaʼ», ku náajmatik ka u kʼam le juiciooʼ (Juan 16:11).

Jesuseʼ seguernaj u yaʼalik: «Yaʼab baʼaloʼob ku bineltik in waʼalikteʼex, baʼaleʼ maʼ tu páajtal a naʼatkeʼex beoraaʼ». Le ken u tsʼáa le kiliʼich muukʼ tu yóokʼoloʼoboʼ yaan u naʼatkoʼob «tuláakal u jaajil» yéetel yaan u páajtal u kuxtaloʼob jeʼex u kaʼansik le jaajoʼ (Juan 16:12, 13).

Le apostoloʼoboʼ jaʼakʼ u yóoloʼob yoʼolal le baʼax tu yaʼalaj Jesusaʼ: «Ichil junpʼíit kʼiineʼ maʼ ken a wileneʼex, baʼaleʼ maʼ kun xáantaleʼ yaan a kaʼa ilkeneʼex». Ka joʼopʼ u paklan kʼáatkoʼob tu baatsiloʼob baʼax u kʼáat u yaʼale. Letiʼ túuneʼ tu tsolajtiʼob: «Jach tu jaajil kin waʼalikteʼex: Teʼexeʼ yaan a wokʼoleʼex yéetel yaan a wáakameʼex, baʼaleʼ le yóokʼol kaaboʼ yaan u kiʼimaktal u yóol; teʼexeʼ yaan u yaatal a wóoleʼex, baʼaleʼ a yaj óolaleʼexeʼ yaan u suʼutul kiʼimak óolalil» (Juan 16:16, 20). Le ka kíim Jesús tu tardeil uláakʼ kʼiinoʼ, kiʼimakchaj u yóol u nuuktakil le judíoʼoboʼ, baʼaleʼ le disipuloʼoboʼ joʼopʼ u yokʼoloʼob. Baʼaleʼ kaʼa kiʼimakchaj u yóoloʼob le ka kaʼa kuxlajoʼ. Tsʼoʼoleʼ seguernaj u kiʼimaktal u yóoloʼob le ka tsʼaʼab u kiliʼich muukʼ Dios tu yóokʼoloʼob.

Jesuseʼ tu ketaj le bix yanil le apostoloʼob yéetel juntúul koʼolel taʼaytak u síijil u chaambaloʼ. Tu yaʼalajtiʼob: «Juntúul koʼoleleʼ, le ken kʼuchuk u kʼiinil u síijil u chaambaleʼ, ku sen muʼyaj; baʼaleʼ ken tsʼoʼokok u síijsikeʼ, ku tuʼubultiʼ le bukaʼaj muʼyajnajikoʼ, tumen kiʼimak u yóol tsʼoʼok u síijil juntúul chan xiʼipal way yóokʼol kaabeʼ». Utiaʼal túun u líiʼsik u yóol le apostoloʼoboʼ, tu yaʼalajtiʼob: «Teʼex  xaneʼ, yaachajaʼan a wóoleʼex beoraaʼ; baʼaleʼ yaan in kaʼa ilkeʼex yéetel yaan u kiʼimaktal u yóol a puksiʼikʼaleʼex; le kiʼimak óolalaʼ mix máak kun luʼsikteʼex» (Juan 16:21, 22).

Desde teʼ kʼiinoʼob jeʼeloʼ, le apostoloʼoboʼ mix juntéen u kʼáatoʼob wa baʼax tu kʼaabaʼ Jesús. Baʼaleʼ beoraaʼ ku yaʼaliktiʼob: «Teʼ kʼiin jeʼeloʼ teʼexeʼ yaan baʼax ken a kʼáateʼex tiʼ le Taata tin kʼaabaʼoʼ». ¿Baʼaxten yaan u kʼáatkoʼob? Maʼ tumen wa maʼ taak u yuʼubaʼaloʼob tumen le Taataoʼ. Jesuseʼ ku yaʼalik: «Le Taataoʼ u yaabiltmeʼex úuchik a yaabiltikeneʼex yéetel úuchik a creertikeʼex taalen tʼaan tu kʼaabaʼ le Taataoʼ» (Juan 16:26, 27).

Le baʼaxoʼob tu yaʼalaj Jesús tiʼ u apostoloʼob utiaʼal u líiʼsik u yóoloʼoboʼ, le beet u yaʼalikoʼob: «K-creertik tiʼ Dios a taal». Lelaʼ maʼ kun xáantal ken ilaʼak wa jaaj. Le oʼolal Jesuseʼ tu yaʼalajtiʼob: «¡Ileʼex! Yaan u taal u kʼiinil, u jaajileʼ tsʼoʼok u kʼuchul, tuʼux yaan a kʼiʼitbesaʼaleʼex yéetel yaan a suuteʼex ta wotocheʼex, yéetel yaan a pʼatkeneʼex tin juunal; baʼaleʼ maʼ tin juunal yaneniʼ». Baʼaleʼ tu yaʼalajtiʼob: «Teneʼ tsʼoʼok in waʼalikteʼex le baʼaloʼobaʼ utiaʼal ka yanakteʼex jeetsʼelil tin woʼolal. Teʼ yóokʼol kaabaʼ teʼexeʼ táan a muʼyajeʼex, baʼaleʼ ¡líikʼik a wóoleʼex!, teneʼ tsʼoʼok in tsʼáanchaʼatik yóokʼol kaab» (Juan 16:30-33). Maʼ táan u pʼaʼatloʼob tumen Jesusiʼ. Letiʼeʼ u yojel yaan xan u páajtal u tsʼáanchaʼatikoʼob le yóokʼol kaab jeʼex letiʼoʼ, tumen yaan u chúukpajal u yóoloʼob u beetoʼob baʼax uts tu tʼaan Dios kex chʼaʼpachtaʼakoʼob tumen Satanás bey xan u kʼasaʼan yóokʼol kaab.