Njalan a édo’o nye’an asu minlômane mié, Yésus a kômesane be asu nkeane wé ô nto étua bebé. A bete mise mé yôp a ye’elan Ésa wé na: “Wumulu’u mone wôé, nyô mone ki a wumulu wo, aval ô nga ve nye ngule ya jôô bôte, e nde te bôte bese, ô nga ve nye a ve be ényiñe ya melu mese.”​—Jean 17:1, 2, Mfefé Nkôñelan.

Ôwé, Yésus a yemelane na, e ve Zambe duma a ne jame da dañe mfi. Ve za avale mbamba ndi nleme Yésus a ve di: ényiñe ya melu mese! Éyoñ a maneya nyoñe “ngule ya jôô bôte,” Yésus a ne bo na môt ase a yene mfi ya ntañ wé. Ve da, fo’o ve abime bôt éziñe nde da ye yen ébotan. Amu jé fo’o ve abime bôt éziñ? Amu na, fo’o ve bôte ba tôñe mejô ma mbe ba ye bu’ubane ntañ: “Ényiñe ya melu mese ki é ne na bôt be yeme wo na wo étam ô ne nya Zambee, be yeme fe nyô ô nga lôm, nye a ne Krist Yésus.”​—Jean 17:3, Mfefé Nkôñelan.

Môt a yiane kôme tu’a yem Ésa ba Mon bebaane, a bi fe mbamba élat a be. A yiane wô’ôtan mam ane be. Nde fe, a yiane ve ngule na a vu abeñe mefulu dap éyoñ a bili ajô a bôte bevok. A yiane fe wô’ô na ényiñe ya melu mese bôte ba ye bi é tii a duma a ve Zambe. Yésus a beta kobô ajô te, a jô’ô na:

“Me nga ve wo duma e si nyô, amu me maneya sondô ésaé ô nga ve me na me bo. Ve éyoñe jina ki, a Tat, womien wumulu’u ma a duma me nga tame bi be wo valé si nyô é ngenan te bo.” (Jean 17:4, 5, Mfefé Nkôñelan) Ôwé, Yésus a ye’elane na a beta bi duma dé ya yôp a zene ya ñwômane miñwuan.

Ve da, Yésus a nji vuane mam a nga bo ésaé nkañete jé. A ye’elane na: “Me nga bo na e bôt ô nga ve ma e si ndône mu be yeme jôé dôé. Be mbe émbôé, e nde ô nga ve me be, ane be nga ba’ale ajô dôé.” (Jean 17:6, Mfefé Nkôñelan) Yésus a nji su’u ve na a tot éyôlé Zambe, Yéhôva, éyoñ a mbe a kañete’e. A nga volô fe minlômane mié na, mi kôme yeme jôm éyôlé éte ja tinan, mefulu me Zambe a aval a nyoñe ngab a bôt.

Minlômane mia kui na mi kôme yeme Yéhôva, ésaé Mone wé, a mame Yésus a nga jô. Yésus a suu émiene si, a jô’ô na: “Mejô ô nga kalane ma, me nga kalane be me, ane be fe be nga nyoñe me a yeme bebela na mamien me nga so be wo, a be nga buni fe na wo fo’o ô nga lôme ma.”​—Jean 17:8, Mfefé Nkôñelan.

Yésus a bo fe na be yemelane nsela’ane a ne zañe bôte ba tôñe nye a émo minlañ ése éyoñ a jô na: “Ma ye’elan asu dap, me nji ye’elan asu si ndôn, fo’o ve asu bôt ô nga ve ma, amu be ne émbôé . . . A Tate ô ne mfufup, ba’ale be a jôé dôé, di ô nga ve ma, nde be bo jôme jia aval ane bia wo bi né. . . . Me nga kamane be, a wua éziñe ya be be a nji jañ [a ne ô vaa] ve mone ya njañ,” ba loone na, Judas Iscariot, nyô a nga zu na a koñe Yésus.​—Jean 17:9-12, Mfefé Nkôñelan.

Yésus a ke ôsu a ye’elane na: “Si nyô é nga wô’ô be biko. Me nji ye’elane wo na ô vaa be e si ndôn, ve na ô ba’ale be amu mbia môt a ne. Be nji bo bôte ya si ndôn, avale fe mamien me nji bo môte ya si ndôn.” (Jean 17:14-16, Mfefé Nkôñelan) Minlôman a beyé’é befe be ne si ndôn Satan a jôé, ve ba yiane kandan a je a mbia mimboone y’été. Aval avé?

Ba yiane ba’ale bebiene mfuban, ntoban asu nya ékaña’a, be wulu’u ane benya mejôô be nga tilibane nkobô Hébreu be né, a benya mejôô Yésus émien a nga ye’ele. Yésus a ye’elane na: “Tune be a benya mejôô. Mejô  môé me ne [benya mejôô].” (Jean 17:17, Mfefé Nkôñelan) Ane éyoñe ja lôt, minlômane mia ye tili mimfufube mintilan mia ye fe bo ngabe jia ya “benya mejôô” be ne volô na be tune môt.

Ve ane éyoñe ja lôt, bôte bevo’o ba ye kañese “benya mejôô.” Yésus a ye’elan éyoñe ji sa ke “ve asu bana étam [e bôte be ne valé], a ye’elane fe asu ba bese ba ye buni [nye] amu mejô map.” Jé Yésus a ja’é asu be bese? “Na bese ba yiane bo jôme jia, aval ane wo, a Tat, ô ne jôme jia a ma, a ma fe jôme jia a wo, na be fe ba yiane bo jôme jia a bia.” (Jean 17:20, 21, MN) Yésus ba Ésa wé be nji fo’o bo môte wua. Be ne jôme jia mfa’a wuna na, ba wô’ane mame mese. Yésus a ye’elane na, bôte ba tôñe nye be’ fe be bu’uban a élat éte.

Ôbe nté mvus, Yésus a nga jô Pierre a bôte bevo’o na a nga ke zene jé asu na a ke kômesane be bito, a kobô’ô ajô bito e yôp été. (Jean 14:2, 3) Yésus a beta ye’elan asu jam ete a jô’ô na: “A Tat, ba ô nga ve ma, ma yi na e vôm me too be’ fe be tabe valé bia be be, ane ba ye yen étôto’o jam mamien, nje ô nga ve ma, amu ô nga nye’e ma si nyô e ngenan te boban.” (Jean 17:24, Mfefé Nkôñelan) Nde ñhe a yemete na ayap éyoñ, ôsusua na Adam ba Ève ba biaé bon, Zambe a nga nye’e atyi’i Mone dé, nyô a nga su’ulane bo Yésus Krist.

Éyoñ a suu meye’elane mé, Yésus a beta ngôné éyôlé Ésa wé a nye’ane Zambe a bili asu minlôman a asu bôte bevo’o ba ye kañese “benya mejôô,” a jô’ô na: “Me nga mane bo na be yeme jôé dôé, a ma ye ke ôsu a bo na be yeme de, nalé ate nye’an ô nga nye’e ma wo ye tabe be be a mamiene fe e be be.”​—Jean 17:26, Mfefé Nkôñelan.