Atraqatre la trenge ihnim i Iesu koi itre aposetolo, matre nyidrëti a hnëkë angatr, ke nyidrëti a tro. Enehila, nyidrëti a gala draië me thithi ka hape: “Atrune jë la nekö i nyipë matre tro la nekö i nyipëti a hane atrunyi nyipë, ke hnei nyipëti hna acili angeic troa mus hune la nöjei atr asë, nge tro angeic a hamëne la mele ka pë pun kowe la itre atr hnei nyipëti hna ahnithe koi angeic.”—Ioane 17:1, 2.

Iesu a amamane laka, nyipiewekë catre kö troa atrunyi Akötresie. Ngo nyidrëti fe a qaja la ketre mejiune ka iakeukawany, ene la mele ka pë pun. Pine laka, “hna acili [Iesu] troa mus hune la nöjei atr asë,” atreine hi Iesu kuca matre tro la nöjei atr, a kepe thangane la huuje i nyidrë. Ngo tha itre atr asë kö. Hnauën? Ke tro hmekuje hi Iesu a amanathithine la itre ka trongëne la hna qaja ka hape: “Ame la aqane troa hetrenyi la mele ka pë pun, tre, tro angatr a atrepengöi nyipë, Akötresie ka cas, memine la hnei nyipëti hna up, Iesu Keriso.”—Ioane 17:3.

Loi e tro sa atrepengöi Kem me Nekön, me hetre imelekeu me nyidro. Nyipiewekë fe tro sa waiewekë tui nyidro. Nge e thupen, tro sa nyitipune la itre thiina i nyidro ngöne la aqane tro sa ce mel me itre xan. Nge loi e tro fe sa atre ka hape, nyipiewekë kö troa atrunyi Akötresie, hune la troa kapa la mele ka pë pun. Öni Iesu:

“Hnenge hna atrunyi nyipë e celë fen, me afenesine la huliwa hnei nyipëti hna ahnithe koi ni. Haawe, enehila Kaka, atrunyi ni jë thei nyipë hnene la lolo ka eje theng, lo ce eni pala kö me nyipë qëmekene troa xupe la fen.” (Ioane 17:4, 5) Eje hi, e mele hmaca ha Iesu, tro hmaca kö nyidrëti a kapa la lolo e hnengödrai.

Ngo tha thëthëhmine kö Iesu la itre huliwa i nyidrë e celë fen. Öni Iesu: “Hnenge hna qaja amamane la ëje i nyipë kowe la itre atr hnei nyipëti hna xome nyipine la fen, me hamë ni. Itre atre i nyipë angatr, nge hnei nyipëti hna ahnithi angatre koi ni, nge hnei angatre hna trongëne la itre trengewekë i nyipë.” (Ioane 17:6) Tha hnei Iesu hmekuje kö hna qaja la ëje i Iehova ngöne la nyidrëti a cainöj. Hnei Iesu fe hna xatua itre aposetolo troa atre la aliene la ëje cili—Itre thiina i Akötresie, me aqane huliwa i Akötresie me itre atr.

Atre hë itre aposetolo la pengöi Iehova, me hnëqa ne la Nekö i nyidrë, me ini hna hamën hnei Iesu. Iesu a ipië me hape: “Hnenge hna qaja koi angatre la itre ewekë hnei nyipëti hna ini ni, ame hnei angatre hna kapa me atrehmekune laka, eni hi la qeneqaja i nyipë, ene pe, mejiune jë hi angatre ka hape, nyipëti la atre upi ni.”—Ioane 17:8.

Iesu a qaja jë laka, isapengöne kö la itretre dreng me itre atr. Öni nyidrë: “Angatre la hnenge hna thithi san ngo tha fene kö, ke itre atr lai hnei nyipëti hna ahnithe koi ni, itre atre i nyipë . . . Kakati fe, Atre Ka Hmitrötr, wai angatre pe kö pine la ëje i nyipë, lo hnei nyipëti hna hamë ni, matre tro angatr a cas tune la aqane casi nyiso. . . . nge hnenge hna thupë angatre hnyawa, matre pëkö ala casi thei angatr ka patr, ngo kolo hmekuje hi lo nekö ne la hnëjin,” ene Iudra Isakariota, lo ka troa salemë Iesu.—Ioane 17:9-12.

Iesu hmaca kö a thith me hape: “Hnei fen hna methinë angatr. Tha eni kö a sipo nyipë troa thepe angatr qaa la fen, ngo tro pe a thupë angatr pine la atre ka ngazo. Tha ketre atre ne fene kö ni, nge tui angatre fe, tha itre atre ne fene kö angatr.” (Ioane 17:14-16) Itre aposetolo me itre xa atre dreng a mel nyipine la fen, lo  hna musinën hnei Satana, ngo nyipiewekë tro angatr a ananyine la fen, me itre huliwa i fen. Ngo troa tune kaa?

Nyipiewekë tro angatr a wië, kösë itre hna amë acon thatraqane la huliwa i Akötresie. Tro angatr a tun, e hnei angatr hna trongëne la itre nyipici hnine la itre Hna Cinyihan Qene Heberu, me itre nyipici hnei Iesu hna hamën. Iesu a thithi me hape: “Ahmitrötrë angatre jë jëne la nyipici; ke trengewekë i nyipë la nyipici.” (Ioane 17:17) Tro ha traqa la ijine tro la itre xa aposetolo a cinyanyi tus jëne la uati hmitrötr, nge tro la itre tusi cili a nyixane “la nyipici,” ka troa xatua itre atr troa wië.

Nge tro fe a traqa la ijine tro la itre xa atr a kapa “la nyipici.” Matre tha Iesu kö “a thithi sai angatr hmekuj, ngo memine fe la itre ka amamane la lapaune i angatr koi [nyidrë] jëne la itre trengewekë i angatr.” Nemene la hnei Iesu hna sipon koi angatr asë? Öni nyidrë: “Tro hë angatr asë a cas, tui nyipë Kaka, ke ce nyipëti pala hi me eni, nge ce eni fe me nyipë, nge matre tro fe angatr a hane casi me nyiso.” (Ioane 17:20, 21) Tha ca atre kö lae Iesu me Keme i nyidrë. Ka casi nyidro, ke nyidroti a ca mekun. Haawe, Iesu a thithi sai itretre dreng, matre tro fe angatr a cas tui nyidro.

Eue hi lo, hnei Iesu hna qaja koi Peteru me itre xan ka hape, nyidrëti a tro troa hnëkë göhnë i angatr e hnengödrai. (Ioane 14:2, 3) Iesu hmaca a qaja la mekune cili ngöne la thith, öni nyidrë: “Kaka, epi troa ce me eni la itre atr hnei nyipëti hna ahnithe koi ni, matre tro angatr a öhne la lolo hnei nyipëti hna hamë ni, ke hnei nyipëti hna pane hnimi ni qëmekene troa ami trepene la fen.” (Ioane 17:24) Nyidrëti lai a anyipicine laka, qaane hë ekö—qëmekene tro Adramu me Eva a hnaho—ka hnime fe hë Akötresie la Nekö Hnimina i nyidrë Ka Cas, lo hna hën e thupen ka hape, Iesu Keriso.

Iesu a nyipune jë la thith, me qaja hmaca la ëjene la Keme i nyidrë, me ihnimi Akötresie koi itre aposetolo, me koi itre ka troa kapa “la nyipici.” Öni nyidrë: “Hnenge hna qaja amamane la ëje i nyipë koi angatr, nge tro pala kö ni a kuca tun, matre tro fe angatr a hane hnime la itre xa atr, tune la aqane hnimi ni hnei nyipë, nge tro fe hë ni a hane casi me angatr.”—Ioane 17:26.