Jesusqa apostolninkunata anchata kuyaspanmi pasakuptin ama hukmanyarunankupaq tukuymanta willarqa. Chaymantapas hanaq pachata qawarispanmi taytanta mañakurqa: ‘Taytáy, churikitayá hatunchay churikipas qamta hatunchasunaykipaq, llapallan runakunapa respetasqan kananpaqmi churikita churarqanki chaynapi runakunaman wiñay kawsayta qunanpaq’, nispa (Juan 17:1, 2).

Jesusqa riqsikurqam imamantapas aswan allinqa taytanta hatunchay kasqanta. Ichaqa rimarqataqmi runakunaqa wiñaypaq kawsakuyta atinankumantapas. Jesusqa “llapallan runakunapa respetasqan” kananpaqmi churasqa karqa, chaymi payqa atinman wiñay kawsayta paykunaman quyta. Ichaqa wakillanmi wiñay kawsaytaqa chaskinanku karqa. Paykunamantam Jesus nirqa: “Wiñay kawsayqa kanqa sapallan chiqap Dios kasqaykita riqsiqkunapaqmi hinaspa kachamusqayki Jesucristotapas riqsiqkunapaqmi”, nispa (Juan 17:3).

Pipas wiñaypaq kawsakuyta munaspanqa Jehova Diosmantawan Jesusmantam allinta yachanan, hinaspapas paykunawanmi kuyachikunan. Chaymantapas paykunapa munasqanman hinam kawsakunan, kallpanchakunantaqmi paykunata qatipakunanpaq hinaspa hukkunawan allinlla kawsakunanpaqpas. Riqsikunanmi wiñay kawsayta haypanamantaqa Diosta hatunchay aswan allin kasqanta. Jesusqa hinallam chaymanta rimarqa.

Nirqam: “Ñuqam kay pachapi hatuncharqayki, tukurunitaqmi ruwanaypaq kamachiwasqaykitapas. Chayraykuyá taytalláy, hatunchaykuway manaraq runakuna kachkaptin ladoykipi hatunchawasqaykiman hina”, nispa (Juan 17:4, 5). Jesusqa taytantam mañakurqa kawsariykachinanpaq, chaynapi hanaq pachapi kaqmanta hatunchasqa kananpaq.

Jesusqa Diosmanta willakuspan hukkunata yanapasqanmantapas nirqam: “Kay pachapi runakunamanta akllaspayki quwasqayki runakunamanmi sutikita riqsichirqani. Paykunaqa qampam karqa hinaptinmi quykuwarqanki, palabraykitapas kasukunkum”, nispa (Juan 17:6). Jesusqa manam Diospa sutin Jehova kasqallanmantachu willakurqa, yachachirqataqmi imayna kasqanmantapas. Apostolninkunamanqa allintam yachachirqa Diosqa imayna sunquyuq kasqanmanta chaynataq runakunata imaynata yanapasqanmantapas.

Apostolkunaqa allintam yacharurqaku Jehova Diosmanta, Jesusmanta hinaspa imakuna yachachisqanmantapas. Chaymi Jesusqa mana hatun tukuspan nirqa: “Yacharunkuqa niwasqaykikunata paykunaman nisqayraykum, chaymi nisqaykunata chaskikurqaku hinaspam qampa rantikipi hamusqayta chiqaptapuni yacharunku, creerunkutaqmi qampuni kachamuwasqaykitapas”, nispa (Juan 17:8).

Jesusqa yacharqam qatiqninkunaqa wakin runakuna hina mana kasqankumanta, chaymi nirqa: “Mañakuniqa manam llapa runakunapaqchu aswanqa quwasqaykikunapaqmi paykuna qampa kasqanrayku [...]. Qamqa chuyam kanki taytalláy, paykunatayá cuidaykuy quwasqayki sutikirayku, chaynapi ñuqanchik hina paykunapas huklla kanankupaq. [...] Paykunataqa amparaykurqanim. Paykunamantaqa manam mayqinninkupas chinkachisqachu kanqaku, aswanqa hukllam”, nispa. Hukllamanta rimaspanqa traicionaqnin Judas Iscariotemantam rimachkarqa (Juan 17:9-12).

Jesusqa nirqaraqmi: “Paykunatam kay pachapi runakuna chiqninku”, nispa. Nirqataqmi: “Mañakuykiqa manam kay pachapi runakunamanta sapaqchanaykipaqchu, aswanqa satanasmanta harkaykunaykipaqmi. Ñuqaqa manam kay pachapi runakuna hinachu kani, chaynam paykunapas  mana kay pachapi runakuna hinachu kanku”, nispa (Juan 17:14-16). Apostolkunawan Jesuspa wakin qatiqninkunaqa manam satanaspa munaychakusqan runakuna hinachu kananku karqa. ¿Imataq chaypaqqa yanapanan karqa?

Diospa munayninta ruwanankupaq kawsakuyninkupi chuya kayninkum. Chaypaqqa Genesismanta Malaquiaskama Diospa palabranta chaynataq Jesuspa yachachisqankunatam kasukunanku karqa. Chaypaqmi taytanta mañakuspan Jesus nirqa: “Chiqap kaqwanyá chuyanchay, palabraykiqa chiqapmi”, nispa (Juan 17:17). Chay ‘chiqap palabraqa’ hinallaraqmi yapakunan karqa qipakunaman wakin apostolkuna Mateomanta Apocalipsiskama wakinta qillqasqankuwan, chaypas runakunatam chuya kanankupaq yanapanan karqa.

Manam 11 apostolkunallachu “chiqap” kaqmantaqa yachananku karqa. Chaymi Jesus nirqa: “Ñuqaqa mañakuyki manam paykunallapaqchu aswanqa paykuna willakuptinku ñuqapi iñiqkunapaqwanmi”, nispa. ¿Imayna kanankupaqmi mañakurqa? Nirqam: ‘Mañakuykiqa llapallanku huklla kanankupaqmi. Qampas taytáy ñuqawanmi huklla kanki chaynataq ñuqapas qanwan huklla kani, chaynayá paykunapas ñuqanchikwan huklla kachunku’, nispa (Juan 17:20, 21). Jesusqa manam taytan hina kikin Dios kasqanmantachu rimachkarqa, aswanqa imatapas ruwanankupaq huk sunqulla kasqankumantam. Chaymi mañakurqa qatiqninkunapas chayna huk sunqulla kanankupaq.

Jesusqa Pedromanwan wakin apostolkunamanmi nirqaña paykunapaq sitiota allichamuq hanaq pachaman rinanmanta (Juan 14:2, 3). Chaymi chaymantapas rimaspan nirqa: “Taytalláy, munanim quwasqayki runakuna maymi kasqaypi ñuqawan kanankuta, quwasqayki kanchariyniyta qawanankupaq, qamqariki manaraq runakuna rikurimuchkaptinmi kuyawarqanki”, nispa (Juan 17:24). Chaywanqa nichkarqa Adanwan Evapas manaraq churi-wawayuq kachkaptinku churin Jesusta Jehova Dios kuyasqanmantam.

Jesusqa mañakuyta tukunanpaqmi kaqmanta rimarqa taytanpa sutinmanta, Diospa kuyasqan apostolkunamanta chaynataq qipakunamanpas Diosta kuyaq runakunamanta. Nirqam: “Ñuqaqa sutikitam riqsichirqani, riqsichisaqtaqmi kanpas kuyawasqaykiman hina paykunapas hukkunata kuyanankupaq hinaspa ñuqapas paykunawan huklla kanaypaq”, nispa (Juan 17:26).