Ona ko te lasi o tena alofa ki ana apositolo, ne fakatoka ei ne Iesu a latou a koi tuai o fano a ia keatea. Ne kilo aka ana mata ki te lagi kae ‵talo atu ki tena Tamana: “Te Tamana, ko oko mai te itula. Faka‵malu tau tama ko te mea ke faka‵malu koe ne tau tama, e pelā eiloa mo te tukuatuga ne koe ki a ia a te pule i luga i tino katoa, ko te mea ke mafai o tuku atu ne ia a te ola se-gata-mai ki a latou katoa kolā ko oti ne tuku atu ne koe ki a ia.”—Ioane 17:1, 2.

E manino i ei, me ne iloa ne Iesu i te ‵toe mea tāua ko te tukuatuga o vikiga ki te Atua. Kae ko oko eiloa i te fakamafanafana loto a te fakamoemoega ne taku atu ne Iesu—ko te ola se-gata-mai! A te mauaga o “te pule i luga i tino katoa,” e mafai ei ne Iesu o tuku mai a mea aoga mai tena taulaga togiola ki tino katoa. Kae ne nai tino fua ka fakamanuia. Kaia ne nai tino fua? Ona ko te mea ka tuku atu ne Iesu a mea aoga mai tena taulaga ki tino fua kolā e gasue‵sue e ‵tusa mo nisi mea kolā ne taku mai ne Iesu: “Tenei te uiga o te ola se-gata-mai, ke iloa tonu ne latou a koe, ko te Atua tonu e tokotasi, penā foki loa mo te tino telā ne uga mai ne koe, ko Iesu Keliso.”—Ioane 17:3.

E ‵tau o iloa ‵lei ne se tino a te Tamana mo te Tama, mai te mauaga o se fesokotakiga pili mo lāua. E ‵tau o ‵pau ana lagonaga mo lagonaga o lāua e uiga ki mea valevale. E se gata i ei, e ‵tau o taumafai a ia ke fakaakoako atu ki lā uiga sē fakanafagina i ana faifaiga ki nisi tino. Kae e ‵tau o iloa ne ia me i te mauaga ne tino o te ola se-gata-mai e tulaga lua tena tāua ki te faka‵maluga o te Atua. Ne toe fai atu nei ne Iesu a te matua tenei:

“Ko oti ne faka‵malu ne au a koe i te lalolagi, me ne fakaoti ne au a te galuega telā ne tuku mai ne koe ke fai ne au. Tela la, e te Tamana, ke faka‵malu ne koe au i ou tafa e pelā eiloa mo te ‵malu telā ne maua ne au i ou tafa kae koi tuai o faite te lalolagi.” (Ioane 17:4, 5) Ao, ne fakamolemole atu a Iesu ke toe fakafoki atu ki a ia a te ‵malu faka-te-lagi e auala i te toetuga.

Kae ne seki puli eiloa i a Iesu a mea ko oti ne fai ne ia i tena galuega. Ne ‵talo atu a ia: “Ko oti ne fakaasi atu ne au tou igoa ki a latou kolā ne tuku mai ne koe ki a au mai te lalolagi. Ko ou tino latou, kae ne tuku mai ne koe latou ki a au, kae ne tausi latou ki au muna.” (Ioane 17:6) Ne uke atu a mea ne fai ne Iesu i tena galuega i lō te fakailoa atu fua o te igoa o te Atua, ko Ieova. Ne fesoasoani atu a ia ki ana apositolo ke iloa ne latou a te mea e fakaata mai i te igoa—ko uiga o te Atua mo ana faifaiga ki tino.

Ne iloa ne te kau apositolo a Ieova, te tulaga o tena Tama, mo mea ne akoako atu ne Iesu. Ne fai atu a Iesu mo te loto maulalo: “Ko oti ne tuku atu ne au ki a latou a muna kolā ne tuku mai ne koe ki a au, kae ne talia ne latou kae ko iloa foki ne latou mo te mautinoa i a au ne vau e pelā me ko tou sui, kae ko tali‵tonu latou i a au ne uga mai ne koe.”—Ioane 17:8.

Ne taku atu ei ne Iesu a te ‵kese i te va o ana soko mo tino o te lalolagi: “E fakatagi atu au e uiga mō latou; e se fakatagi atu au mō te lalolagi, kae mō latou kolā ko oti ne tuku mai ne koe ki a au, me i a latou ko ou tino . . . Te Tamana Tapu, ke tausi ne koe latou ona ko tou igoa telā ko oti ne tuku mai ne koe ki a au, ko te mea ke tasi latou e pelā mo tāua e tasi. . . . Ne puipui ne au latou, kae seai se tino i a latou ne fakaseai kae na ko te tama o te fakamaseiga,” ko Iuta te Isikaliota, telā ko fanatu i tena auala ke fakatogafiti ne ia a Iesu.”—Ioane 17:9-12.

“Ne takalia‵lia te lalolagi ki a latou,” ne faka‵soko atu te ‵talo a Iesu. “Au e se fakatagi atu ki a koe, ke ave latou keatea mai te lalolagi, kae ke tausi ne koe latou ona ko te tino masei. A latou e se ne vaega o te lalolagi, e pelā eiloa mo au e sē se vaega o te lalolagi.” (Ioane 17:14-16) E ‵nofo atu a apositolo mo nisi soko i te lalolagi, ko tino kolā e pule atu ki ei a Satani, kae e ‵tau o ‵vae keatea latou mai i ei mo mea ma‵sei i ei. E pefea la?

E ‵tau o tumau latou i te ‵ma, kae ‵vae keatea ke  tavini atu ki te Atua, mai te fakagalue aka ne latou a muna‵tonu i Tusitusiga faka-Epelu mo muna‵tonu kolā ko oti ne akoako mai ne Iesu. Ne ‵talo atu a Iesu: “Ke fakatapu latou e auala i te munatonu; a tau muna ko te munatonu.” (Ioane 17:17) E seki leva, kae ne tusi ne nisi apositolo a tusi mai lalo i te takitakiga a te Atua kolā ne fai mo vaega o “te munatonu” telā e mafai o fesoasoani ki te faka‵maluga o se tino.

Kae ka isi ne nisi tino kolā ka talia ne latou a “te munatonu.” Ne seki ‵talo atu Iesu “mō latou fua konei [tino kolā ne ‵nofo atu i konā], kae e pelā foki mo latou kolā e fakatuanaki mai ki a [ia] e auala i olotou pati.” Se a te mea ne fakamolemole atu a Iesu e uiga ki ei mō latou? “Ko te mea ke tasi katoa latou, e pelā eiloa mo koe, te Tamana e ‵kau fakatasi mo au, kae ko au e ‵kau fakatasi mo koe, kae ke ‵kau fakatasi foki latou mo tāua.” (Ioane 17:20, 21) A Iesu mo tena Tamana e sē se tino e tokotasi. E tasi lāua me e lotoma‵lie fakatasi lāua i mea katoa. Ne ‵talo atu a Iesu ke tasi foki penei ana soko.

Mai mua malie o te taimi tenei, ne fai atu a Iesu ki a Petelu mo nisi tino me ka fanatu a ia i tena auala ke fakatoka se koga mō latou, telā e fakauiga ki se koga i te lagi. (Ioane 14:2, 3) Ne toe taku atu ei ne Iesu a te manatu tenā i te ‵talo: “Te Tamana, au e manako ke ‵nofo a latou kolā ko oti ne tuku mai ne koe ki a au i te koga e nofo au i ei, ko te mea ke lavea ne latou toku ‵malu telā ne tuku mai ne koe ki a au, me i a koe ne alofa mai ki a au kae koi tuai o faite te lalolagi.” (Ioane 17:24) Ne mautinoa eiloa i a ia a te mea tenā—kae koi tuai o fai ne Atamu mo Eva lā tama‵liki—me ne alofa eiloa te Atua ki tena Tama fagasele e tokotasi, telā ko Iesu Keliso.

I te fakaotiga o tena ‵talo, ne toe faka‵mafa atu ne Iesu a te igoa o tena Tamana mo te alofa o te Atua ki te kau apositolo mo nisi tino kolā ka talia ne latou a “te munatonu,” ana muna: “Ko oti ne fakailoa atu ne au tou igoa ki a latou kae ka toe fakailoa atu ne au, ko te mea ke maua ne latou te alofa telā ne alofa mai ei koe ki a au kae ko au ke ‵kau fakatasi foki mo latou.”—Ioane 17:26.