No to ˈna here rahi i ta ˈna mau aposetolo, ua faaineine Iesu ia ratou no to ˈna revaraa e piri mai ra. Hiˈo aˈera oia i nia i te raˈi e pure atura i to ˈna Metua: “A faahanahana i to tamaiti ia faahanahana hoi to tamaiti ia oe. Inaha ua horoa oe i to tamaiti i te mana i nia i te taata atoa, ia horoa ˈtu hoi oia i te ora mure ore i te feia atoa ta oe i horoa na ˈna.”—Ioane 17:1, 2.

Ua taa maitai ia Iesu e o te faahanahanaraa i te Atua te mea faufaa roa ˈˈe. E tiaturiraa mahanahana râ ta Iesu e faahiti ra, te ora mure ore! Tei ia Iesu ra “te mana i nia i te taata atoa,” e nehenehe ïa te huitaata e fanaˈo i te mau maitai o te hoo. Tera râ, vetahi noa te haamaitaihia. No te aha? O te feia noa te ora ra ia au i ta Iesu i parau i muri iho te fanaˈo i te mau maitai o te hoo: “No te fanaˈo i te ora mure ore, ia ite ïa ratou ia oe te Atua mau hoê roa e i ta oe i tono mai o Iesu Mesia e tia ˈi.”—Ioane 17:3.

Mea titauhia ia ite maitai te hoê taata i te Metua e te Tamaiti, a piri roa ˈtu ai oia ia raua. Ia haroˈaroˈa atoa ia ˈna eaha ta raua e rave i roto i tera e tera tupuraa. Ia tutava atoa oia i te pee i to raua mau huru maitatai hau ê i roto i to ˈna mau taairaa e vetahi ê. Ia taa atoa ia ˈna mea faufaa aˈe te faahanahanaraa i te Atua i te fanaˈoraa i te ora mure ore. Faahiti faahou atura Iesu i taua tumu parau ra:

“Ua faahanahana vau ia oe i te fenua nei e ua faaoti au i te ohipa ta oe i horoa mai ia rave au. I teie nei, to ˈu Metua, a faahanahana mai ia ˈu i pihai iho ia oe i te hanahana ta ˈu i fanaˈo na i pihai iho ia oe hou te huitaata i fanauhia mai ai.” (Ioane 17:4, 5) Te ani ra Iesu i to ˈna Metua ia fanaˈo faahou oia i to ˈna hanahana i te raˈi na roto i te tia-faahou-raa.

Aita râ i moˈe ia Iesu ta ˈna i rave i te roaraa o ta ˈna taviniraa. Parau atura oia: “Ua faaite au i to iˈoa i te mau pǐpǐ ta oe i horoa mai no ˈu no roto mai i teie nei ao. No oe ratou e ua horoa mai oe ia ratou no ˈu e te haapao ra ratou i ta oe parau.” (Ioane 17:6) Aita noa Iesu i faahiti i te iˈoa o te Atua, Iehova, i roto i ta ˈna taviniraa. Ua tauturu atoa oia i ta ˈna mau aposetolo ia ite eaha tei taaihia i taua iˈoa ra: te mau huru maitatai o te Atua e ta ˈna huru raveraa i te taata.

Ite atura te mau aposetolo o vai Iehova e eaha te hopoia a ta ˈna Tamaiti e ta ˈna mau haapiiraa. Parau atura Iesu ma te haehaa: “Inaha i to ˈu faaiteraa ia ratou i ta oe i parau mai, ua farii ratou e ite papu atura e no ǒ mai au ia oe ra, a tiaturi atoa ˈi e na oe i tono mai ia ˈu.”—Ioane 17:8.

Faaite atura Iesu i te taa-ê-raa i rotopu i ta ˈna mau pǐpǐ e to te ao nei: “Aita vau e pure nei no to te ao, no te mau pǐpǐ râ ta oe i horoa mai. No oe hoi ratou . . . To ˈu Metua moˈa, paruru na oe ia ratou no to iˈoa ta oe i horoa mai no ˈu, ia hoê hoi ratou mai ia tâua. . . . Ua paruru vau ia ratou e aita ratou i mou, hoê anaˈe râ te taata o te haamouhia,” o Iuda Isakariota, o te haere ra e tuu ia Iesu i to ˈna mau enemi.—Ioane 17:9-12.

Na ô faahou atura Iesu: “Ua hae râ teie nei ao ia ratou . . . Aita vau e pure nei ia oe ia hopoi ê ia ratou i teie nei ao, ia paruru râ ia ratou i te varua ino. E ere ratou no teie nei ao, mai ia ˈu nei e ere no teie nei ao.” (Ioane 17:14-16) To roto te mau aposetolo e te tahi atu mau pǐpǐ i teie nei ao, te huitaata faaterehia e Satani, ia faaatea ê râ ratou i teie nei ao e ta ˈna mau peu ino. E nafea?

Ia moˈa noa ratou, ia taa ê ratou no te tavini i te Atua ma te faaohipa i te pue parau mau i roto i te mau Papai Hebera e ta Iesu mau haapiiraa. Ani atura Iesu: “A haamoˈa na ia ratou maoti te parau mau. E parau mau ta oe parau.” (Ioane 17:17) I muri aˈe, e papai vetahi mau aposetolo  i te tahi mau buka i raro aˈe i te aratairaa a te varua o te Atua o te amuihia i roto i “te parau mau” o te haamoˈa i te hoê taata.

E farii râ te tahi atu mau taata i “te parau mau.” Aita Iesu “e pure nei no [na 11 aposetolo] noa, no te feia atoa râ e tiaturi ia ˈ[na] no ta ratou haapiiraa.” Eaha ta Iesu i ani no ratou paatoa? “Ia hoê hoi ratou mai ia tâua to ˈu Metua, e ia hoê atoa ratou ia tâua.” (Ioane 17:20, 21) Ua hoê Iesu e te Metua, ua tu hoi to raua manaˈo no nia i te mau mea atoa. Te pure ra Iesu ia hoê atoa ta ˈna mau pǐpǐ.

I muri iho, parau atura Iesu ia Petero e te tahi atu e te reva ra oia e faaineine i te tahi vahi no ratou, oia hoi i te raˈi. (Ioane 14:2, 3) Ta Iesu ïa i haamanaˈo i roto i ta ˈna pure: “To ˈu Metua, te hinaaro nei au e i te vahi to reira vau, to reira atoa te mau pǐpǐ ta oe i horoa mai, ia ite hoi ratou i to ˈu hanahana ta oe i horoa mai no to here ia ˈu hou te omuaraa mai â o teie nei ao.” (Ioane 17:24) Ua haapapu oia e, na mua roa ˈˈe Adamu e o Eva a tamariihia ˈi, mea here na te Atua i ta ˈna Tamaiti otahi, tei riro o Iesu Mesia.

I te faaotiraa Iesu i ta ˈna pure, ua haapapu faahou oia i te faufaaraa o te iˈoa o to ˈna Metua e te here o te Atua i te mau aposetolo e te feia atoa e farii i “te parau mau,” a na ô ai: “Ua faaite au i to iˈoa ia ratou e e faaite â vau, ia here hoi ratou ia vetahi ê mai ia oe e here atoa nei ia ˈu e ia hoê matou.”—Ioane 17:26.