Hinigugma gud ni Jesus an iya mga apostol, salit igin-andam niya hira para han iya hirani na nga pagbaya. Hinangad hiya ha langit ngan nag-ampo ha iya Amay: “Himayaa an imo anak, basi himayaon ka han imo anak, kay sugad la nga gintagan mo hiya hin awtoridad ha ngatanan nga tawo, mahatagan unta niya hin kinabuhi nga waray kataposan hira ngatanan nga imo iginhatag ha iya.”—Juan 17:1, 2.

Matin-aw nga ginkikilala ni Jesus nga an paghimaya ha Dios an pinakaimportante. Pero nakakaliaw gud an paglaom nga gin-unabi ni Jesus—kinabuhi nga waray kataposan! Tungod kay may-ada na hiya “awtoridad ha ngatanan nga tawo,” maihahatag niya ha ngatanan an kapulsanan han iya lukat. Pero pipira la an bibendisyonan. Kay ano? Kay an tatagan ni Jesus han kapulsanan han iya lukat amo la adton mga nagios uyon han iya sunod nga gin-unabi: “Nangangahulogan ini hin kinabuhi nga waray kataposan, an ira pagkilala ha imo, an amo la nga totoo nga Dios, ngan ha imo ginsugo, hi Jesu-Kristo.”—Juan 17:3.

Kinahanglan makilala gud han usa an Amay ngan an Anak, ngan magin duok ha ira. Kinahanglan nga magkaada hiya han ira panhunahuna. Dugang pa, kinahanglan mangalimbasog hiya ha pagsubad han ira waray kapariho nga mga kalidad ha pagtratar ha iba. Ngan kinahanglan niya masabtan nga an pakakarawat hin kinabuhi nga waray kataposan ikaduha la ha paghimaya ha Dios. Yana, ginhisgotan utro ito ni Jesus:

“Ginhimaya ko ikaw ha tuna ngan gintapos ko an buruhaton nga imo iginsugo ha akon. Salit yana Amay, himayaa ako kaupod mo sugad han paghimaya mo ha akon han kaupod mo pa ako antes magtikang an kalibotan.” (Juan 17:4, 5) Oo, naghangyo hi Jesus nga makabalik ha iya himaya ha langit pinaagi han pagkabanhaw.

Pero waray hingalimti ni Jesus an iya mga nahimo ha iya pagministeryo. Hiya nag-ampo: “Iginpahayag ko an imo ngaran ha mga tawo nga iginhatag mo ha akon tikang ha kalibotan. Imo hira, ngan iginhatag mo hira ha akon, ngan gintutuman nira an imo pulong.” (Juan 17:6) Labaw pa ha paggamit ha ngaran han Dios nga Jehova an ginbuhat ni Jesus ha iya ministeryo. Iya ginbuligan an iya mga apostol nga hibaroan kon ano an ginrirepresentaran hito nga ngaran—an mga kalidad han Dios ngan an iya pagtratar ha mga tawo.

Nakilala han mga apostol hi Jehova, hinbaroan an papel han iya Anak ngan an mga igintutdo ni Jesus. Mapainubsanon nga nagsiring hi Jesus: “Iginsumat ko ha ira an imo iginsumat ha akon. Ginkarawat nira ito ngan nahibaro gud hira nga kinanhi ako sugad nga imo representante. Tinoo hira nga ginsugo mo ako.”—Juan 17:8.

Katapos, ginkilala ni Jesus an kaibahan han iya mga sumurunod ngan han mga tawo ha kalibotan ha kabug-osan, hiya nagsiring: “Naghahangyo ako, diri para ha kalibotan, kondi para ha ira nga iginhatag mo ha akon, kay imo hira. . . . Baraan nga Amay, alayon panalipdi hira tungod han imo ngaran nga iginhatag mo ha akon, basi magin usa hira sugad nga kita uusa. . . . Ginhirotan ko hira, ngan waray bisan usa ha ira nga nawara labot la han anak han kabungkagan,” nga amo hi Judas Iscariote, nga magtatraydor kan Jesus.—Juan 17:9-12.

Hi Jesus nagpadayon pag-ampo: “Nasisina ha ira an kalibotan . . . Naghahangyo ako nga diri mo hira kuhaon ha kalibotan, kondi nga panalipdan mo hira tikang ha usa nga maraot. Diri hira kanan kalibotan, sugad la nga ako diri kanan kalibotan.” (Juan 17:14-16) An mga apostol ngan an iba nga disipulo aanhi ha kalibotan, an sosiedad han katawohan nga ginmamandoan ni Satanas, pero kinahanglan hira magpabilin nga bulag hito ngan ha karaotan hito. Paonan-o?

Kinahanglan nira magpabilin nga baraan, iginlain para ha pag-alagad ha Dios, pinaagi ha pag-aplikar han mga kamatuoran ha Hebreo nga Kasuratan ngan han mga kamatuoran nga igintutdo mismo ni Jesus. Hi Jesus nag-ampo: “Baraana hira pinaagi han kamatuoran; an imo pulong kamatuoran.” (Juan 17:17) Ha urhi, an pipira nga apostol gigiyahan ha pagsurat hin mga libro nga magigin bahin liwat han “kamatuoran” nga makakabulig basi magin baraan an usa.

Pero paglabay han panahon, may iba nga makarawat han “kamatuoran.” Salit hi Jesus nag-ampo “diri la para ha ira [an mga nakadto], kondi para liwat ha mga natoo ha [iya] pinaagi han ira pulong.” Ano an ginhangyo ni Jesus para ha ira ngatanan? Nga “hira ngatanan magin usa, sugad nga ikaw, Amay, kahiusa ko ngan ako kahiusa mo, basi hira magin kahiusa liwat naton, ngan tumoo an kalibotan nga ginsugo mo ako.” (Juan 17:20, 21) Hi Jesus ngan an iya Amay diri literal nga uusa nga persona. Uusa hira kay nagkakauyon hira ha ngatanan nga butang. Nag-ampo hi Jesus nga an iya mga sumurunod magin usa liwat.

Diri pa la maiha antes hini, ginsidngan ni Jesus hi Pedro ngan an iba pa nga mabaya hiya basi mag-andam hin lugar para ha ira, karuyag sidngon lugar ha langit. (Juan 14:2, 3) Gin-unabi utro ito ni Jesus ha pag-ampo: “Amay, karuyag ko nga kon hain ako, kaupod ko liwat hira nga iginhatag mo ha akon, basi makita nira an himaya nga iginhatag mo ha akon tungod kay hinigugma mo ako antes pa han tinikangan han kalibotan.” (Juan 17:24) Salit ginpamatud-an niya nga hadto pa—antes pa magkaanak hira Adan ngan Eva—hinigugma na han Dios an iya bugtong nga Anak, nga nagin hi Jesu-Kristo.

Ha pagtapos han iya pag-ampo, ginpabug-atan utro ni Jesus an ngaran han iya Amay ngan an gugma han Dios ha mga apostol ngan ha iba nga makarawat han “kamatuoran,” ha pagsiring: “Iginpakilala ko ha ira an imo ngaran ngan padayon nga igpapakilala ko ito, basi magpakita hira hin gugma sugad han paghigugma mo ha akon ngan basi magin kahiusa ako nira.”—Juan 17:26.