Yesu ofokuele sambu kiandi kumosi ye ntumwa zandi za kwikizi. I bosi, “bayimbidi e nkunga, bele kuna Mongo a Olive.” (Maku 14:26) Bele kuna este, muna mpatu ya Ngetesemane, kuna Yesu kekwendanga nkumbu miayingi.

Vava bafinamene mpatu yayi yambote yazala ye nti mia olive, Yesu osisidi ntumwa zandi nana kunima. Nanga vana mwelo a mpatu kabasisidi, ubavovese vo: “Nuvuanda vava ekolo nkwenda kuna, yasamba.” Yesu onete Petelo, Yakobo yo Yoane, bakotele muna mpatu. Omwene ntantu yo tokana kikilu, ubavovese vo: “Omono nkendalele kikilu yavana mfwa. Nukala vava, nwayingila yame.”—Matai 26:36-38.

Yesu ubavavukidi fiakete, “ofukamene vana ntoto, osambidi.” Adieyi o Yesu kalombele kwa Nzambi muna ntangwa yayi yampasi? Osambidi, oku vo: “E Tata, mambu mawonso malendakana kwa ngeye; unkatwila e kopo diadi. Kansi, ke una nzolele ko, una ozolele kaka ongeye.” (Maku 14:35, 36) Adieyi o Yesu kazolele vova? Nga kazolele diaka kala Mvuluzi ko e? Nkatu.

Vava Yesu kakala kuna zulu wamona una o wantu bamweswa e mpasi yo vondwa kwa makesa ma Roma. Wau kezidi ova ntoto, yo bakula e mpasi za wantu, kazolele ko vo yandi kibeni kamona e mpasi zazi muna nitu andi. Kansi e ngindu zandi zitokanene kwayingi mu kuma kia mfwa ina kefwa nga kimpumbulu, kadi ilenda twasa luvezo muna nkumbu a Se diandi. Ke kolo ko, omanikwa vana nti vika sia vo Nzambi katiangwini.

Wau kafokwele sambu kiandi, Yesu ovutukidi kwa ntumwa zandi, ubawene kuna tulu. Ovovese Petelo vo: “Nga ke nulendi yingila yame kana ola mosi ko e? Nuyingila yo kwamanana samba kimana nwalembi bwa muna lutonto.” Yesu ozeye wo mpe vo ntumwa zandi mu tokana bena, kansi ke balendi vanga diambu ko. Yesu ovovele diaka vo: “O mwanda uzolele, kansi e nitu yatovoka.”—Matai 26:40, 41.

Yesu wele samba diaka mu nkumbu anzole, olombele Nzambi kakatula e “kopo diadi.” Vava kavutukidi, owene diaka ntumwa zandi balele kwau, vana fulu kia samba kimana balembi bwa muna lutonto. O Yesu wau kevovananga yau, ‘ke bazeye edi bekumvutula ko.’ (Maku 14:40) Yesu wele diaka mu nkumbu yantatu, ofukamene kasamba.

Yesu otokanene e mfwa ina kefwa ye luvezo itwasa muna nkumbu a Se diandi. Yave owidi e sambu kia Mwan’andi. Otumini mbasi keza kumika Yesu. Kana una vo i wau, Yesu kayambwidi samba kwa Se diandi ko, “osiamanene o samba.” E ngindu zandi zitokanene diaka kwayingi. Yesu zitu diampwena kena diau muna mavembo! E zingu kiandi kia mvu ya mvu ye kia ulolo wa minkwikizi mu vonza kina. Dianu vo, ‘e kiufuta kiandi kikitukidi nga matonsi ma menga mebetomokanga va ntoto.’—Luka 22:44.

O vava kavutukidi kwa ntumwa zandi mu nkumbu wantatu, ubawene diaka balele kwau. Ubavovese vo: “Nulele kweno yo vunda mu ntangwa nze yayi! E ntangwa ifinamene, o Mwan’a muntu oyekolwa vana moko ma asumuki. Nutelama, twenda kweto. Ndiona okungiekola ofinamene.”—Matai 26:45, 46.