Yesu akumishile kulomba navaposetolo jenyi vakushishika. Omu “vakumishile kwimba myaso yakwalisa Kalunga, valovokele nakuya kuPili yaMilive.” (Mako 14:26) Vayile kumilemba yaNgetesemane kumututuko kuze Yesu azangilenga kuya.

Omu vahetele kuchihela kanechi chamwaza kuze kwapwile mitondo yamilive, Yesu asezele vaposetolo jenyi 8 munyima. Pamo avasezele kwakamwihi nawingililo wamilemba, mwomwo avalwezele ngwenyi: “Twamenu hano, shimbu nanguya kuze nakulomba.” Oloze ayile navaposetolo vatatu, vaPetulu, naYakova, naYowano mukachi kamilemba. Alyonyingile chikuma mumuchima wenyi, kaha alwezele vaze vaposetolo jenyi vatatu ngwenyi: “Nguli nakulyonyinga chikuma kwijiva kufwa kaha. Salenu hano, tonenunga nayami hamwe.”—Mateu 26:36-38.

Navakiko avasele chachindende hanyima, kaha ayile halutwe, “afukamine chameso hamavu nakuputuka kulomba.” Vyuma muka alombele kuli Kalunga halwola kanelu apwile nakulyonyinga? Alombele ngwenyi: “Ove Tata, vyuma vyosena vyapwa vyavyashi kuli ove. Fumisa lupasa kanelu kuli ami. Oloze keshi omu munayi kusaka chamiko, shina omu munayi kusaka chove.” (Mako 14:35, 36) Uno mazu kana alumbunukila mulihi? Kutala apwile nakusaka kulitwamina kuzata mulimo wenyi wakupwa Muka-kusokola tahi? Nduma.

Omu Yesu apwile mwilu, amwene vatu vaze vayanjishilenga chikuma nakuvajiha kuli vaLoma. Omu apwile hano hamavu, apwile mutu nge yetu uze ahashile kwivwa kukola, ngocho kevwile kuwaha havyuma vyavipi vyapwile nakumuvandaminako. Chuma chachilemu chikumanyi shina apwile nakulyonyinga mwomwo atachikijile ngwenyi navamujiha mujila yayipi kwijiva nge chihwanga, kaha chuma kana chinahase kuneha katombo halijina lyaIse. Kwasalile katando kakandende nakumusukika hachitondo kwijiva nge mutu uze nasaula Kalunga.

Omu Yesu alombele halwola lwalusuku, ahilukile, kaha awanyine vaposetolo jenyi vatatu vaze asezele, vali mutulo. Alwezele Petulu ngwenyi: “Uno munahono kutona ola yimwe nayami hamweko nyi? Tonenunga, lombenunga lika kuchina namwingila mucheseko.” Yesu atachikijile ngwenyi navaposetolo jenyi vazeyele, kaha nawa wapwile ufuku chikuma. Ngocho ambile ngwenyi: “Shipilitu yinasake vene, oloze mujimba unazeye.”—Mateu 26:40, 41.

Kaha Yesu ayile kamuchivali nakulomba kuli Kalunga ngwenyi afumise “lupasa” luze kumeso enyi. Omu akindulukile, awanyine cheka vaze vaposetolo vatatu vali mutulo, okunyi vatelele kulomba mangana vahone kwingila mucheseko. Ngocho omu Yesu ahanjikile navo, vakiko “kavapwile namazu eka akumukumbululako.” (Mako 14:40) Yesu ayile kamuchitatu, kaha akafukamine hamambuli enyi nakulomba.

Yesu alizakaminyine chikuma mwomwo atachikijile ngwenyi navamujiha nge hichihwanga, kahechi nachineha katombo halijina lyaIse. Yehova evwile kulomba chaMwanenyi, ngocho atumine kangelo ayenga nakumukolezeza. Chipwe ngocho, Yesu kalitwaminyine kulomba kuli Iseko, oloze atwalileho lika “kulomba chikuma.” Kulyonyinga kana chaswezele  chikuma. Owo ukalu amwene Yesu ocho kutohwa vayaya! Kuyoya chenyi chahaya myaka yosena nachize chavatu vamufwelelele chapwile muponde. Ngocho ‘mavule enyi apwile nge mamata amanyinga aze apwile nakusotoka hamavu.’—Luka 22:44.

Omu Yesu akindulukile cheka kamuchitatu kuli vaposetolo jenyi, avawanyine vali mutulo. Ambile ngwenyi: “Shimbu yakufwana ngana yino enu munasavala nakunoka! Talenu! Ola yinapandama kwakamwihi mangana Mwanamutu vamuhane mumavoko avaka-shili. Katukenu, tuyenu. Talenu! Muka-kungusolola napandama kwakamwihi.”—Mateu 26:45, 46.