Sesusi wamana elikuambelo alinga nono apositolu mbae. Pahe ‘etyi vamana okuhilivika Huku noviimbo, avaende no Komphunda Yomindyambi.’ (Maluku 14:26) Avaende komphangu imwe itiwa o Getesemani, kuna ankho Sesusi ehole okukala.

Etyi vehika pomphangu oyo ongwa ankho ikahi pokati komiti viomindyambi, Sesusi asipo ono apositolu etyinana. Mokutala vesalele kombundi, mokonda wevepopila okuti: “Pumphamei apa, putyina nkhele ndyikelikuambela.” Sesusi aende vala mokati kohika oyo nono apositolu vetatu — Petulu, na Tiaku, na Suau. Akala tyeihamenwa unene iya apopila ono apositolu vetatu okuti: “Ame neihamenwa unene, mandyinkhi. Kalei apa, tualeiko okukala tyipahi kumwe na ame.” — Mateusi 26:36-38.

Sesusi aende katutu kokule navo, ‘aikila konongolo elipetamena-po, ahimbika okulikuambela.’ Oityi aita ku Huku momuvo oo ankho wepuiya unene? Waita okuti: “Tate, ovipuka aviho ove uvivila. Mphole okopo ei. Mahi ha ngetyi ame ndyihanda, ongetyi ove uhanda.” (Maluku 14:35, 36) Oityi ankho ahanda okupopia? Okuti ankho kahandele vali okukala Omuyovoli? Au, hatyoko!

Sesusi etyi ekahi keulu ankho utyimona tyina ova Loma vamonesa ovanthu ononkhumbi ononene, aveveipaa. Ngotyo, ankho utyii nawa okuti mamoneswa ononkhumbi ononene, aipawa. Mahi ankho tyemusukalalesa vali unene omokonda ankho maipawa ngatyina ondingavivi iya otyo matyipenyesa enyina lya Tate yae. Ankho kuakamba onoola mbehehi opo ayendyeleswe momuti ngatyina apopia omapita Huku.

Etyi Sesusi amana okulikuambela, etyi akondoka avasi ono apositolu vetatu velele. Apopila Petulu ati: “Onwe kamuetyivilile okukala tyipahi kumwe na ame moola ike? Tualeiko okukala tyipahi, tualeiko okulikuambela, opo muhayondyue.” Sesusi ankho utyiete okuti ono apositolu valinga otyiho iya vaponwa. Ayawisako ati: “Tyotyili omunthu uhanda okulinga etyi tyaviuka, mahi olutu lutupu ononkhono.” — Mateusi 26:40, 41.

Pahe Sesusi aende vali otyikando tyavali iya aiti Huku emupole “okopo ei.” Etyi akondoka, avasi vali ono apositolu vetatu velele, ngwe ankho ñgeno vena okulikuambela opo vahayondyue. Sesusi apopi navo, mahi ankho “kavei etyi vemukumbulula.” (Maluku 14:40) Sesusi aende vali otyikando tyatatu, aikila konongolo elikuambela.

Sesusi ankho wasukalala unene mokonda maipawa ngatyina ondingavivi iya otyo ankho matyipenyesa enyina lya Tate yae. Siovaa atehelela etyi Omona wae aita, atumu oandyu aimupameka. Mahi no ngotyo, Sesusi ahayekepo okulikuambela ku Tate yae, atualako ‘okulikuambela vali unene.’ Ankho wasukalala unene. Oo ankho omutengi walema ukahi komapepe a Sesusi! Omuenyo wae, no wovanthu aveho ankho ukahi motyiponga. Moluotyo, “omatukuta ae aakala ngatyina omata ohonde atokela pohi.” — Luka 22:44.

Putyina Sesusi akondoka kono apositolu motyikando tyatatu, evevasi vali velele. Ati: “Mulele, mupululukwa momuvo ngou? Talei! Oola ikahi nokuhika-po, Omona womulume mapakulwa pomavoko ovanthu vokulinga ononkhali. Katukei, tuendei. Talei! Una mamphakula ukahi nokuhika popepi.” — Mateusi 26:45, 46.