Ua māeʻa ona tatalo Iesu ma ona aposetolo faamaoni. “Ina ua uma ona usu o viiga, ona latou ō atu ai lea i le Mauga o Olive.” (Mareko 14:26) Ua latou agaʻi atu i le itu i sasaʻe i le faatoʻaga e taʻua o Ketesemane, lea e masani ona alu i ai Iesu.

Ua taunuu atu nei Iesu ma ona aposetolo i lea nofoaga matagofie. Ua ia tuua le toʻavalu o i latou, atonu e latalata i le nofoaga e ulu atu ai i le faatoʻaga, auā ua ia faapea atu: “Ia outou nonofo atu i inei, ae seʻi oʻu alu i o ou te tatalo ai.” Ua ave e Iesu ona aposetolo e toʻatolu, o Peteru, Iakopo ma Ioane, ma agaʻi atu i totonu o le faatoʻaga. Ua matuā atuatuvale Iesu, ma ua ia faapea atu iā i latou nei: “Ua ou matuā tigā lava e oo i le oti. Ia outou nonofo i inei ma ia faaauau ona mataala faatasi ma aʻu.”—Mataio 26:36-38.

Ua maliu teisi atu Iesu mai i le mea o loo iai ona aposetolo, ona ia ʻfaapaʻū ai lea i le eleele ma tatalo.’ O le ā o loo ia tatalo atu ai i le Atua i lenei taimi faigatā? Ua tatalo o ia: “Loʻu Tamā e, e te mafaia mea uma, ia aveese lenei ipu mai iā te aʻu. Peitaʻi, e lē o loʻu loto, a o lou finagalo.” (Mareko 14:35, 36) O le ā le uiga o ana upu? Po o lona uiga e lē o toe manaʻo o ia e avea ma Lē e togiolaina tagata? E leai!

A o leʻi afio mai Iesu i le lalolagi, na silasila mai o ia i mafatiaga o isi na fasiotia e tagata Roma. Ae ona o lea ua avea o ia ma tagata, ua mafai ona ia lagona le tigā ma iai faalogona o le tigā alofa. O lea la, e na te lē o tulimataʻia mea o le a tutupu iā te ia. E sili atu i lenā, ua matuā tigā lona finagalo ona o lona maliu e pei o se tagata solitulafono inosia, e ono faalumaina ai le suafa o lona Tamā. Ua toe o ni nai itula, ona faatautauina lea o ia i se laau, ma peiseaʻī ai o ia o sē e upuleaga i le Atua.

Ua uma ona tatalo Iesu mo se taimi umi, ona alu atu ai lea i le mea o loo iai ona aposetolo e toʻatolu. Peitaʻi, ua ia maua atu i latou o loo momoe. Ua fetalai atu Iesu iā Peteru: “Pe e tou te lē mafai ea ona mataala faatasi ma aʻu i se itula e tasi? Ia faaauau ona mataala ma tatalo e lē aunoa, ina ia aua neʻi outou lolo atu i faaosoosoga.” Ua silafia e Iesu o loo feagai foʻi le ʻauaposetolo ma mafatiaga, ma ua leva foʻi le pō. Ua toe fetalai atu o ia: “Ua naunau i ai le loto, a ua vaivai le tino.”—Mataio 26:40, 41.

Ua toe alu Iesu e tatalo i le Atua, ina ia aveese “lenei ipu” mai iā te ia. Ua toe foʻi mai o ia, ma maua mai ona aposetolo e toʻatolu ua toe momoe foʻi. Ae sa tatau ona latou tatalo ina ia aua neʻi o latou lolo atu i faaosoosoga. Ina ua fetalai atu Iesu iā i latou, “ua latou lē iloa se tali e fai mai iā te ia.” (Mareko 14:40) Ua toe alu foʻi Iesu mo le taimi lona tolu, ma ua ia tootuli ma tatalo.

Ua matuā popole lava Iesu i le faalumaina o le a oo i le suafa o lona Tamā, ona o lona maliu e pei o se tagata solitulafono. Peitaʻi, o loo faafofoga mai Ieova i tatalo a lona Atalii, ma ua ia auina mai se agelu e faamalosia Iesu. E ui i lea, e lē o taofia ai Iesu mai i le faatoga atu i lona Tamā, ae ʻua atili ai ona ia tatalo faatauanau atu pea.’ Ua matuā mafatia lava Iesu, ma ua pei ai o loo ia tauaveina se avega mamafa. E lē gata o loo faalagolago iā te ia lona lava ola e faavavau, ae o le ola e faavavau foʻi o tagata faatuatua. O lona mafatia tele, ʻua sisina ifo ai lona afu e pei o ni ʻaluʻalu toto ua paʻuʻū i le eleele.’—Luka 22:44.

Ua toe foʻi ane Iesu i le mea o loo iai ona aposetolo, ma ua ia toe maua atu foʻi i latou o loo momoe. O lea ua ia fetalai atu ai: “Aiseā ua outou momoe ai ma mālōlō i lenei taimi? Faauta! Ua oo mai le itula e faalataina ai le Atalii o le tagata, ma tuuina atu i tagata agasala. Inā tutū ia i luga ma tatou ō. Faauta! Ua latalata mai lē na te faalataina aʻu.”—Mataio 26:45, 46.