Oti atura ta Iesu pure e ta ˈna mau aposetolo haapao maitai. I muri iho i to ratou himeneraa no te arue i te Atua, haere atura ratou i te mouˈa Oliveta. (Mareko 14:26) Ua haere ratou i te pae hitia o te râ i te hoê ô parauhia Getesemane, ua matau Iesu i te haere i ǒ.

I to ratou iho â taeraa i teie ô tumu olive au maitai, vaiiho maira Iesu e vaˈu o te mau aposetolo peneiaˈe i te tomoraa. Na ô atura oia: “A parahi na outou i ǒ nei, e haere au i ǒ aˈe e pure ai.” Rave atura oia ia Petero, Iakobo e Ioane na muri ia ˈna, e haere atura ratou i roto atu â i te ô. Haamata ihora oia i te horuhoru roa e parau atura: “E oto iti rahi to ˈu. A parahi na outou i ǒ nei e a ara e o vau atoa.”—Mataio 26:36-38.

Faaatea rii atura Iesu, “topa turi ihora e pure atura i te Atua.” Eaha ta ˈna i parau i te Atua i teie taime faufaa? Ua pure oia: “To ˈu Metua, e tia ia oe te mau mea atoa, a hopoi ê atu na i teie auˈa. Teie râ, ia tupu to hinaaro eiaha to ˈu.” (Mareko 14:35, 36) Te auraa anei e te otohe ra o ˈna i te amoraa i ta ˈna hopoia e hoo mai i te huitaata? E ere.

Mai te raˈi mai, ua ite Iesu i te mauiui iti rahi o te feia tei haapohehia e te mau faehau Roma. I te fenua, o ˈna te ahoaho ra e te mauiui ra. Aita ïa oia e tiai ru ra i tera huru pohe. Te mea mauiui roa ˈˈe no ˈna, te faainoraa ïa to ˈna pohe mai te hoê taata ohipa ino i te iˈoa o to ˈna Metua. I roto tau hora, e patitihia o ˈna i nia i te hoê pou mai te hoê taata tei faaino i te Atua.

I muri iho i to ˈna pure-maoro-raa, hoˈi maira Iesu i na aposetolo e ite ihora e te taoto ra ratou. Na ô atura oia ia Petero: “Aita iho â ïa i tia ia outou ia ara hoê noa ˈˈe hora e o vau atoa? A vai ara e a tamau i te pure ia ore outou ia hema.” Ua taa ia Iesu e te hepohepo atoa ra na aposetolo, e e maororaa po. Na ô faahou atura oia: “E hinaaro iho â te aau, te tino râ, mea paruparu ïa.”—Mataio 26:40, 41.

Haere faahou atura Iesu e pure e ani aˈera i te Atua ia hopoi ê i “teie auˈa.” I to ˈna hoˈiraa mai, ite faahou ihora oia e te taoto ra na aposetolo i te hoê taime mea faufaa hoi ia pure ratou ia ore ratou ia hema. I to Iesu paraparauraa ia ratou, aita ratou “i ite eaha te parau atu.” (Mareko 14:40) Haere faahou atura Iesu, te toru ïa o te taime, e tuturi ihora no te pure.

Te haapeapea roa ra Iesu ia faainohia te iˈoa o to ˈna Metua i to ˈna pohe mai te hoê taata ohipa ino. Te faaroo ra râ Iehova i te mau pure a ta ˈna Tamaiti e tono maira i te hoê melahi e faaitoito ia ˈna. Aita Iesu i faaea i te taparuparu i to ˈna Metua, “tamau noa ˈtura [râ] oia i te pure ma te uˈana ˈtu â.” E hepohepo iti rahi to ˈna. E hopoia teimaha hoi ta ˈna tei taaihia i to ˈna iho ora e to te taata atoa e tiaturi i te Atua. Inaha, “riro atura to ˈna hou mai te toto e topata ra i raro i te repo.”—Luka 22:44.

I to Iesu hoˈiraa mai i ta ˈna na aposetolo i te toru o te taime, te taoto faahou ra ratou. Na ô  atura oia: “I te hoê taime mai teie outou e taoto ai e e haamâha ˈi i to outou rohirohi! Inaha, ua fatata hoi te hora e tuuhia ˈi te Tamaiti a te taata nei i te rima o te feia rave hara. A tia, mai haere anaˈe. A hiˈo, te fatata mai ra te taata e tuu ia ˈu i to ˈu mau enemi.”—Mataio 26:45, 46.