Артыг ҝеҹәјарысыны кечиб. Каһинләр Иса Мәсиһи әлә вермәјин мүгабилиндә Јәһуда Искәрјута отуз ҝүмүш пул вермәји сөз вермишдиләр. Јәһуда Искәрјут бөјүк каһинләри вә фәрисиләри Иса Мәсиһин јанына апарыр. Онлар силаһланмыш Рома әсҝәрләриндән вә сәркәрдәдән ибарәт бөјүк издиһамын мүшајиәти илә ҝедирләр.

Пасха бајрамында Иса Мәсиһ Јәһуданы отагдан чыхаранда, ҝөрүнүр, о, бирбаша бөјүк каһинләрин јанына ҝетмишди (Јәһја 13:27). Онлар да дәрһал өз кешикчиләрини вә бир дәстә әсҝәр топламышдылар. Јәһуда, ола билсин, әввәлҹә онлары Иса пејғәмбәрин һәвариләри илә Пасханы гејд етдији евә ҝәтирир. Амма онлары орада тапмајыб Гидрон вадисини кечиб баға тәрәф јолланырлар. Әлләриндән силаһдан әлавә чыраг вә мәшәл ҝөтүрүбләр. Бәли, онлар Иса Мәсиһи тутмаға гәти гәрарлыдырлар.

Јәһуда издиһамы Зејтун дағына апарыр, о, Иса Мәсиһин һарада олдуғуну чох ҝөзәл билир. Кечән һәфтә боју Мәсиһ һәвариләрилә Бејтанијјәјә вә Јерусәлимә ҝедиб-ҝәләндә тез-тез Ҝетсемани бағында ајаг сахлајырды. Амма инди зүлмәт гаранлыгдыр, Иса Мәсиһ исә јәгин зејтун ағаҹларынын көлҝәсиндәдир. Бәс онда Иса Мәсиһи һеч вахт ҝөрмәјән әсҝәрләр ону неҹә таныјаҹаглар? Буна ҝөрә дә Јәһуда онлара ишарә верәҹәјини дејир: «Кими өпсәм, Иса одур. Ону тутун вә нәзарәт алтында апарын» (Марк 14:44).

Јәһуда издиһамла бирҝә Ҝетсемани бағына ҝирир. О, Иса Мәсиһи һәвариләри илә ҝөрүб она тәрәф ирәлиләјир. Јәһуда: «Салам, Рабби!» — дејиб ону нәвазишлә өпүр. Мәсиһ она ҹаваб верир: «Сән бурада нә ҝәзирсән?» (Мәтта 26:49, 50). Сонра суалына өзү ҹаваб верир: «Јәһуда, инсан Оғлуну өпүшлә сатырсан?» (Лука 22:48). Амма артыг бу хәјанәткарла данышмаға дәјмәз!

Иса Мәсиһ мәшәлләрин вә чырагларын ишығында габаға чыхыб издиһамдан сорушур: «Кими ахтарырсыныз?» Издиһамдан бир нәфәр дејир: «Нәсрани Исаны». Иса Мәсиһ ҹәсарәтлә: «Мәнәм», — дејир (Јәһја 18:4, 5). Нә олаҹағыны билмәјән адамлар јерә јыхылырлар.

Бу фүрсәтдән истифадә едәрәк гачыб гаранлыгда ҝизләнмәк әвәзинә, Иса Мәсиһ онлардан кими ахтардыгларыны јенә сорушур. Онлар бу дәфә дә «нәсрани Исаны» дејәндә о, тәмкинлә сөјләјир: «Ахы сизә дедим ки, мәнәм. Әҝәр мәни ахтарырсынызса, бунлары бурахын». Һәтта белә бир һәлледиҹи мәгамда да Иса Мәсиһ унутмур ки, о, һеч бирини итирмәмәлидир (Јәһја 6:39; 17:12). Иса Мәсиһ садиг һәвариләрини горујуб вә һәлака ҝедән адамдан, Јәһуда Искәрјутдан башга һеч бирини итирмәјиб (Јәһја 18:7—9). Буна ҝөрә дә инди о, садиг давамчыларынын бурахмаларыны истәјир.

Әсҝәрләр ајаға галхыб Иса Мәсиһин үстүнә ҝәлирләр. Һәвариләр ишин нә јердә олдуғуну ҝөрүб ондан сорушурлар: «Аға, гылынҹлары ишә салаг?» (Лука 22:49). Иса Мәсиһ ҹаваб вермәјә маҹал тапмамыш Бутрус өзләри илә ҝәтирдикләри ики гылынҹдан бирини чәкиб баш каһинин нөкәри Мәлкин сағ гулағыны кәсир.

Иса пејғәмбәр исә Мәлкин гулағына тохунуб ону сағалдыр. Сонра ваҹиб нәсиһәт верәрәк Бутруса әмр едир: «Гылынҹыны гајтар гој гынына. Гылынҹ ҝөтүрән һәр кәс гылынҹдан өләҹәк». Иса Мәсиһин нөвбәти сөзләриндән ҝөрмәк олар ки, о һәбс олунмаға һазырдыр: «Бәс онда Мүгәддәс Јазылар неҹә јеринә јетәр? Ахы орада јазылыб ки, һәр шеј мәһз бу ҹүр олмалыдыр» (Мәтта 26:52, 54). Сонра сөзүнә әлавә едир: «Мәҝәр Атамын мәнә вердији ҹамы ичмәмәлијәм?» (Јәһја 18:11). Бәли, Иса Мәсиһ Аллаһын онунла бағлы нијјәтинә, һәтта һәјаты баһасына олса белә табе олур.

 Мәсиһ издиһама дејир: «Мәҝәр мән гулдурам ки, мәни тутмаг үчүн үстүмә гылынҹ вә дәјәнәклә ҝәлмисиниз? Һәр ҝүн мәбәддә отуруб вәз едәндә мәни һәбс етмирдиниз. Лакин бүтүн бунлар пејғәмбәрләрин сөзләри јеринә јетсин дејә, баш верир» (Мәтта 26:55, 56).

Әсҝәрләр, сәркәрдә вә јәһудиләрин кешикчиләри Мәсиһи тутуб әл-голуну бағлајырлар. Буну ҝөрән һәвариләр ону гојуб гачырлар. Лакин издиһамын арасында бир ҹаван оғлан (еһтимал ки, шаҝирд Марк) Иса Мәсиһин далынҹа ҝетмәк үчүн орада галыр (Марк 14:51). Амма ҹамаат бу ҹаван оғланы таныјыр вә ону тутмаг истәјир. Буна ҝөрә дә о, кәтан палтарыны гојуб гачыр.