E dingi-dingi kiviokele kala. Anganga batondele vo palata 30 befuta kwa Yuda kimana kayekola Yesu. Dianu vo, Yuda wele kwa mbuta zanganga ye Afarisi ana bevavanga Yesu. Bena kumosi ye buka kia makesa ma Roma yo mfidi au.

Tuzeye wo vo vava Yesu kavaikisa Yuda vitila badia e Nduta, Yuda wayenda kwa mbuta za nganga. (Yoane 13:27) Bakutakese mfumu zau kumosi mpe ye buka ya makesa. Nanga Yuda otekele kubanata muna suku dina Yesu ye ntumwa zandi badila e Nduta. Kansi o wau, e ndonga yayi yawonso iviokele o Ndimb’a Kiderone, bele kuna mpatu a Ngetesemane. Banete nwaninwa, minda ye mini, bele vavi Yesu.

Yuda onete ndonga yayi kuna Mongo a Olive, kadi edi kabenze vo Yesu kwakuna kena. Muna lumingu lwaviokele, vava Yesu ye ntumwa zandi bayendanga kuna Yerusaleme yo vutuka muna Betania, nkumbu miayingi baningamanga muna mpatu a Ngetesemane. Wau vo mu fuku, nanga Yesu ovuenda vana nti a olive muna mpatu. Ozevo, aweyi makesa bezayila Yesu wau kina vo ke basidi monana yandi ko? Yuda sinsu kevanga muna sadisa makesa. Ubavovese vo: “Ndiona mfiba, i yandi yuna; numbaka yo toma kunyingila ekolo nunkunata.”—Maku 14:44.

Yuda okotele muna mpatu kumosi ye ndonga ya wantu, omwene Yesu ye ntumwa zandi. Wele-wele kwa Yesu, ovovele vo: “Kiambote e Rabi!” i bosi, umfibidi. Kansi, Yesu umvovese vo: “E nkwame, nkia kuma winin’ovava?” (Matai 26:49, 50) Yesu ovene mvutu za kiuvu kiandi, ovovele vo: “E Yuda, nga muna mfibu oyekolwele Mwan’a muntu e?” (Luka 22:48) Muna ntangwa yayi, o Yesu ketokanenanga diaka Yuda ko.

Yesu ofinamene wantu basimbidi mini ye minda, ubayuvuidi vo: “Nani nuvavanga?” E ndonga bavutwidi vo: “Yesu wa musi Nazarete.” Ubavovese kuna unkabu wawonso vo: “I mono oyu.” (Yoane 18:4, 5) Wau balembele zaya e diambu divangama, babwidi va ntoto.

Kana una vo mu fuku, Yesu katinini ko, ubayuvuidi diaka kana nani bevavanga. Vava bavutwidi diaka vo, “Yesu wa musi Nazarete,” Yesu ubavovese kuna lembama kwawonso vo: “Inuvovese kala vo i mono oyu. Avo mono nuvavanga, nuyambula awaya benda kwau.” Kana nkutu muna ntangwa yayi yampasi, Yesu osungamene mana kavovelenge vo, kalendi vidisa kana mosi ko. (Yoane 6:39; 17:12) Yesu otomene lunga-lunga ntumwa zandi zakwikizi, kavidisi kana mosi ko “nanga mwan’a lufwasu kaka”—Yuda. (Yoane 18:7-9) I dianu kalombele vo bayambula alongoki andi akwikizi benda kwau.

Makesa batelamene, bayantikidi kwiza kwa Yesu, antumwa babakwidi vo Yesu se kekangwa. Bavovele vo: “E Mfumu, twabasâkila muna nsosolo e?” (Luka 22:49) Vitila Yesu kavana e mvutu, Petelo ovolele mosi muna nsosolo miole bena miau. Osâkidi Maleko, ntaudi a mbut’a nganga, ozengele kutu kwandi.

Yesu osimbidi kutu kwa Maleko, owukidi ko. Yesu olongele diambu diamfunu, okanikini Petelo vo: “Vutula nsosolo aku vana fulu kiandi, kadi awonso bebong’e nsosolo muna nsosolo befwila.” Yesu ozolele vo makesa bankanga, kadi osasidi vo: “Ozevo, aweyi ulunganena e Sono ivovanga vo ediadi difwete vangamena mu mpila yayi?” (Matai 26:52, 54) Ovovele diaka vo: “Nga kilendi nua ko e kopo kampene o Se diame?” (Yoane 18:11) Muna mvovo miami, Yesu otambulwidi vo luzolo lwa Nzambi lwavangama kana nkutu divava vo kafwa.

Yesu oyuvuidi e ndonga vo: “Nwizidi kumbaka ye nsosolo ye bota nze mwivi? E lumbu yawonso yakelenge muna tempelo yo longa, kansi yeno ke numbaki. Mawonso mama mavangamene kimana mana masoneka angunza malungana.”—Matai 26:55, 56.

Buka kia makesa yo mfidi au, ye mfumu za Ayuda bakangidi Yesu muna nsinga. Antumwa wau bamwene wo, batinini kwau. Kansi “toko dimosi,” nanga dilenda kala Maku wa nlongoki, osidi vana vena ndonga kimana kalanda Yesu. (Maku 14:51) E ndonga vava bamwene Maku, bavavidi kunkanga, Maku otinini, e yunga kiandi kia lino kisotokele.