Sani koro chuny otieno osekalo mabor. Jodolo oseyie ni gidhi chulo Judas fedha 30 ma mingli mondo ondhognegigo Yesu. Koro Judas telo ne oganda maduong’ mar jotend-jodolo gi Jo-Farisai ka gimanyo Yesu. Gibiro kaachiel gi kidieny moro mar jolweny mag Rumi kod jatend-lweny margi.

Nenore ni kane Yesu onyiso Judas ni owuog sama nyasi mar Pasaka ne dhi nyime, Judas nodhi achiel kachiel nyaka ir jotend-jodolo. (Johana 13:27) Jotend-jodologo nochoko askechegi kaachiel gi kidieny moro mar jolweny. Nenore ni Judas noterogi mondi nyaka e ot kama Yesu kod jootene ne timoe nyasi mar Pasaka. Sani to koro joma Judas wuothogogi oseng’ado Hoho mar Kidron kendo koro gichomo puodho mar Gethsemane. Jogo oting’o ligengni, teyni, kod rameny ka giramo ni nyaka to giyud Yesu.

Judas tero jogo nyaka e Got Zeituni ka en gadier ni ong’eyo kama Yesu nitieree. E juma motelo ne mano kane Yesu gi jootene ne jodhiga Bethania ka gia Jerusalem kata a Bethania ka gidok Jerusalem, ne giheroga rawo e puoth Gethsemane. Sani to koro piny en otieno, kendo nyalo bedo ni tipo mag yiend zeituni me puodhono miyo fwenyo Yesu ok yot. Kuom mano, ere kaka askeche ma ne pok onenoga Yesu dhi fwenye? Mondo mi gifwenye, Judas biro miyogi ranyisi. Judas wachonegi niya: “Ng’at ma abiro nyodho, mano e en; makeuru kendo utere ka en e bwo arita maber.”​—Mariko 14:44.

Judas tero ogandano nyaka e puodhono kae to bang’ neno Yesu ka nigi jootene, odhi ir Yesu achiel kachiel. Judas moso Yesu niya: “Misawa Rabi!” Kae to Judas nyodhe gi mor. Yesu penje kama: “Omera, ang’o mokeli ka?” (Mathayo 26:49, 50) Yesu dwoko penjono owuon kopenjo ja andhogano kama: “Judas, indhogo Wuod dhano gi nyoth?” (Luka 22:48) Kanyo e kama mbakane kod Judas rumogo.

Yesu koro wuok e lela kama ler mag teyni nyalo menyee. Kae to openjo jogo kama: “En ng’a ma umanyo?” Joma obiro makego dwoko kama: “Yesu ma Ja-Nazareth.” Yesu wachonegi gi chir niya: “An e en.” (Johana 18:4, 5) Nikech jogo ok ogeno neno gima kamano, wachno bwogogi kendo gipodho piny.

Yesu ok ti gi thuolono mondo oring olal e mudho. To kar timo kamano, Yesu penjo jogo kendo ni en ng’ano ma gidwaro. Kane jogo osedwoke kendo ni gimanyo “Yesu ma Ja-Nazareth,” Yesu nodwokogi ka odhil kama: “Asenyisou ni an e en. Omiyo, ka an e ma umanya, weuru jogi mondo odhi.” Kata mana sama weche tekie ahinyani, Yesu paro gima nosewacho motelo ni ok ne odhi lalo kata mana achiel kuom jogo duto ma osemiye. (Johana 6:39; 17:12) Yesu oserito jootene mosechung’ kode motegno kendo onge kata mana achiel kuomgi moselal “mak mana wuod kethruok,” ma en Judas. (Johana 18:7-9) Omiyo, koro okwayo jogo ni giwe jolupnego mondo odhi.

Jolweny chung’ malo kae to gichomo ir Yesu. Ka jootene fwenyo ni kare weche osekethore kamano, gipenjo Yesu kama: “Ruoth, wachadhgi gi ligangla?” (Luka 22:49) Ka Yesu pok odwokogi, Petro wuodho achiel kuom ligengni ariyo ma jootego nigo kanyo, kae to ochadhogo it Malko ma korachwich oko. Malko ne en misumba mar jadolo maduong’.

Yesu mulo it Malko kendo ochange. Kae to ochiwo puonj moro ma dwarore ahinya kochiko Petro niya: “Duok liganglani kare, nimar jogo duto ma tiyo gi ligangla notho tho ligangla.” Yesu ok oluor nikech imake, omiyo olero niya: “Ere kaka Ndiko onego ochop ma nyiso ni nyaka timre e yo ma kama?” (Mathayo 26:52, 54) Kae to omedo kama: “Donge owinjore amadh okombe ma Wuora osemiya?” (Johana 18:11) Yesu riwo lwedo gima Nyasaye dwaro ni otim, kata ka mano dhi miyo nege.

 Yesu penjo joma obiro makego kama: “Ere gimomiyo ubirona ka uting’o ligengni gi arunge ka joma dhi mako jamecho? Pile ka pile najabet e hekalu ka apuonjo, to ok ne umaka. To magi duto osetimore mondo weche ma jonabi nondiko ochop.”​—Mathayo 26:55, 56.

Bang’ mano, kidieny mar askeche kod jatend-jolweny gi askeche mag Jo-Yahudi, mako Yesu kae to gitueye. Ka joote neno mano, giwuok ng’wech. Kata kamano, “ng’at moro ma rawera” dong’ e kind jogo kodwaro luwo Yesu. Nyalo bedo ni rawerano en Mariko japuonjre Yesu. (Mariko 14:51) Jomoko man kanyo fwenyo rawerano kendo gitemo make. Kata kamano, owuok aputh-njiri kendo oweyo lawe mar kitani chien mondo otony.