Lahos na ha katutnga han gab-i. Nagkauruyon an mga saserdote nga bayaran hi Judas hin 30 ka sinselyo nga silber basi trayduron hi Jesus. Salit ginpangunahan ni Judas an daku nga grupo han punoan nga mga saserdote ngan Pariseo basi bilngon hi Jesus. May upod hira nga usa nga grupo hin armado nga mga sundalo han Roma nga may kumander.

Matin-aw nga han ginpabaya ni Jesus hi Judas ha panihapon han Paskua, diniretso hi Judas ha punoan nga mga saserdote. (Juan 13:27) Gintirok nira an ira mga opisyal pati an usa nga grupo han mga sundalo. Posible nga gindara anay hira ni Judas ha kwarto diin ginsaurog ni Jesus ngan han iya mga apostol an Paskua. Katapos tinabok hira ha Walog han Kidron ngan nagtipakadto ha hardin. Labot han ira mga armas, nagdara liwat hira hin mga lampara ngan sulô. Determinado hira nga mabilngan hi Jesus.

Samtang ginpapangunahan ni Judas ini nga grupo ha pagsagka ha Bukid han mga Olibo, sigurado hiya kon diin mabibilngan hi Jesus. Han naglabay nga semana, han hi Jesus ngan an mga apostol nagbalik-balik ha Betania ngan Jerusalem, kasagaran nga nahapit hira ha hardin han Getsemani. Pero gab-i na yana, ngan posible nga nalalandongan hi Jesus han mga kahoy han olibo didto ha hardin. Salit paonan-o hiya makikilala han mga sundalo, nga bangin waray pa makakita ha iya? Basi buligan hira, maghahatag hi Judas hin tigaman. Hiya nagsiring: “An akon harokan, amo ito hiya; arestoha niyo hiya ngan dad-a nga gwardyado hin maopay.”—Marcos 14:44.

Samtang nag-uuna hi Judas ha grupo tipakadto ha hardin, nakita niya hi Jesus nga kaupod an mga apostol ngan diniretso hiya kan Jesus. Hi Judas nagsiring: “Maopay nga gab-i, Rabbi!” ngan ginharokan niya hi Jesus. Nagpakiana hi Jesus: “Kay ano nga aanhi ka?” (Mateo 26:49, 50) Ginbaton ni Jesus an iya kalugaringon nga pakiana, ha pagsiring: “Judas, gintatraydoran mo ba an Anak han tawo pinaagi hin harok?” (Lucas 22:48) Diri na gud interesado hi Jesus kan Judas!

Katapos, kinadto hi Jesus ha dapit nga nalalamragan han mga sulô ngan lampara ngan nagpakiana: “Hin-o an iyo ginbibiling?” Binaton an mga kaupod ni Judas: “Hi Jesus nga Nazareno.” Waray kahadlok nga nagsiring hi Jesus: “Ako an iyo ginbibiling.” (Juan 18:4, 5) Tungod kay diri maaram ha mahitatabo, nagkatutumba hira.

Imbes nga salingabuton ni Jesus an higayon nga makapalagiw, nagpakiana utro hiya kon hin-o an ira ginbibiling. Han nagsiring hira utro, “Hi Jesus nga Nazareno,” kalmado nga nagyakan hi Jesus: “Ginsidngan ko na kamo nga ako an iyo ginbibiling. Salit kon ako an iyo ginbibiling, palakta hira.” Bisan hiton makuri gud nga sitwasyon, nahinumdoman ni Jesus an iya ginyakan nga waray bisan usa ha ira nga mawawara. (Juan 6:39; 17:12) Napanalipdan ni Jesus an iya matinumanon nga mga apostol ngan waray bisan usa ha ira an nawara “labot la han anak han kabungkagan,” hi Judas. (Juan 18:7-9) Salit naghangyo hiya nga palakton an iya maunungon nga mga sumurunod.

Han nahirani na an mga sundalo kan Jesus, nasantop han mga apostol kon ano an nahitatabo. Salit nagpakiana hira: “Ginoo, maninigbas ba kami pinaagi hin espada?” (Lucas 22:49) Antes pa bumaton hi Jesus, ginhulbot ni Pedro an usa han duha nga espada nga dara han mga apostol ngan gintigbas hi Malco, usa nga uripon han hitaas nga saserdote, salit napalong an iya too nga talinga.

Ginkaptan ni Jesus an talinga ni Malco basi tambalon an samad. Katapos nagtutdo hiya hin importante nga leksyon. Iya ginsugo hi Pedro: “Itakob an imo espada kay an ngatanan nga nagamit hin espada, mamamatay pinaagi hin espada.” Andam hi Jesus magpaaresto, kay nagsiring hiya: “Paonan-o matutuman an Kasuratan nga kinahanglan mahitabo ini ha sugad nga paagi?” (Mateo 26:52, 54) Hiya nagdugang: “Diri gud ba ako mainom ha kopa nga iginhatag ha akon han Amay?” (Juan 18:11) Nauyon hi Jesus ha kaburut-on han Dios para ha iya, bisan pa kon kinahanglan hiya mamatay.

Ginsidngan ni Jesus an mga tawo: “Kinanhi ba kamo basi arestuhon ako nga baga hin kawatan, nga nagdara pa kamo hin mga espada ngan mga ibaralbag? Kada adlaw nagliliningkod ako ha templo basi magtutdo pero waray ako niyo arestoha. Kondi nahitatabo ini ngatanan basi matuman an ginsurat han mga propeta.”—Mateo 26:55, 56.

Gin-aresto hi Jesus han mga sundalo, han kumander, ngan han mga punoan han mga Judio ngan gin-gapos hiya. Han makita ini han mga apostol, nanmalagiw hira. Kondi may “batan-on nga lalaki”—posible an disipulo nga hi Marcos—nga inupod ha mga tawo basi sundan hi Jesus. (Marcos 14:51) Pero nakilal-an hiya han mga tawo ngan nagsari hira pagdakop ha iya, salit nahukasan hiya hin bado han pinalagiw hiya.