Thupene la kola ase othi Iesu tune la atre ka ngazo, hna tro sai nyidrë koi Ana. Angeice lo atre huuj ka sisitria ekö, lo Iesu a asesëkötrë itre hene ne hmi. (Luka 2:42, 47) Hnene fe la itre xa nekö i Ana hna hane atre huuje ka sisitria. Ngo enehila, Kaiafa hë, lo föe ne la neköi angeice jajiny.

Iesu e hnine la hnalapa i Ana, nge Kaiafa a isine troa acasine la Hnakootre ka Tru i Angetre Iudra. Ala 71 la itre atren, ene la atre huuje ka sisitria, me itre ka cilëne la hnëqa cili ekö.

Ana a hnyinge jë koi Iesu göne la “itretre drei nyidrë, me itre ini hnei nyidrëti hna hamën.” Sa jë hi Iesu ka hape: “Hnenge pala hi hna cainöje qëmekene la nöjei atr, me hamë ini hnine la sunago me hnine la uma ne hmi. Nge hnë itronyi hi lai hnene la angetre Iudra, matre pëkö ewekë hnenge hna qaja juetrën. Haawe, hnauëne kö la nyipë a hnyinge koi ni? Hnyingëne jë pe kowe la itre hnenge hna inin.”—Ioane 18:19-21.

Ame hnene la ketre atre thup hna xe Iesu me wesitrë nyidrë. Öni angeic: “Aqane sa i eö hi lai kowe la atre huuje ka sisitria?” Ngo atre hi Iesu ka hape, pëkö ngazo i nyidrë, matre öni nyidrë: “Maine ka tria ju la ithanatang, qaja jë hö la ithanatange ka tria; ngo maine ka nyipici hi la hnenge hna qaja, nga eö a xe ni fë nemen?” (Ioane 18:22, 23) Matre Ana a upi Iesu jë koi Kaiafa, tresi angeic.

 Enehila, itre atrene la Hnakootr Ka Tru, ene la atre huuj ka sisitria, me itre qatr ne la nöj, me itretre cinyihan a icasikeu. Angatr a itronyi ngöne la hnalapa i Kaiafa. Nge maine nyipici laka, hna wathebone troa ikootrë la heji ne Paseka, ngo tha cile kö angatr troa kuca la ngazo.

Hetre hnei angatr hë hna mekun, ke thupene la Iesu ase amele Lazaro, hnene lo Hnakootre hna amekötine troa humuthi nyidrë. (Ioane 11:47-53) Nge eue hi lo, hnei itre hene ne hmi hna thele troa xolouthi Iesu, me humuthi nyidrë. (Mataio 26:3, 4) Eje hi, qëmekene troa kootrë Iesu, ase fe hë amekötine troa humuthi nyidrë!

Ase hë itre hene hmi ena la wathebo me icasikeu menu, nge enehila, angatre hmaca kö me itre xa atrene la Hnakootr, a thele la itre ka troa anyipicine thoi, itre ka troa upezö Iesu. Ala nyimu la hnei angatre hna öhn, ngo ka isazikeu la hnei angatre hna qaja. Ame hna traqa pi la lue xan, nge öni nyidro: “Drenge hi eahuni lo angeic a qaja ka hape, ‘Tro ni a thë trije la uma ne hmi hna xup hnei wanakoim, me acil hmaca ngöne la köni drai la ketre, ngo tha hna kuca kö hnei wanakoim.’ ” (Mareko 14:58) Eje hi, ka isazikeu fe la hnei nyidro hna qaja.

Öni Kaiafa koi Iesu: “A pëkö nyine tro eö a sa? Nemene la hnei nyidroti la hna qaja göi eö?” (Mareko 14:60) Tha sa pi kö Iesu koi itre ka anyipicin, ke ka itria hnyawa la hnei angatre hna qaja. Matre hnei Kaiafa, atre huuje ka sisitria, hna thele la ketre aqane troa upezö nyidrë.

Atre hi Kaiafa laka, cane methi angetre Iudra tro ketre a selëne ka hape, Nekö i Akötresie angeic. Eue hi lo, ame lo Iesu a hë Akötresie Kaka, hnei angetre Iudra hna thele troa humuthi nyidrë, ke öni angatr ka hape, Iesu a “aceitunë nyidrë me Akötresie.” (Ioane 5:17, 18; 10:31-39) Matre Kaiafa a xome jë la mekune cili troa tra thethi Iesu. Angeic a musinë Iesu me hape: “Eni a upi eö qëmeke i Akötresie, troa qaja koi huni ka hape, eö la Keriso, Nekö i Akötresie!” (Mataio 26:63) Ngo eje hi laka, ase hë Iesu qaja ka hape, Nekö i Akötresie nyidrë. (Ioane 3:18; 5:25; 11:4) Nge maine tha sa kö nyidrë, tro hë itre atr a mekune ka hape, tha Nekö i Akötresieti kö nyidrë, nge tha nyidrëti kö la Keriso. Matre öni Iesu: “Eni hi; nge tro hë nyipunieti a öhne la Nekö i atr a lapa ngöne la götrane maca ne la Akötresie ka men, me traqa hune la itre iaw ne hnengödrai.”—Mareko 14:62.

Ame hnei Kaiafa hna pi mama me tha zezene la iheetre i angeic, me sue ka hape: “Angeic a qaja angazo Akötresie! Nyine ue hmaca la troa hetre atre anyipicin? Ke nyipunieti hi lai a drei angeic e qaja angazo Akötresie. Nemene fe la mekuna i nyipunie?” Öni angatre jë hi: “Loi e tro angeic a mec.”—Mataio 26:65, 66.

Angatr a nyiqaane hnyimasai Iesu jë, me jei nyidrë. Nge itre xan a xe nyidrë, me hnyijuë nyidrë. Thupene lai, angatr a thunge ju la alameke i nyidrë me xe nyidrë, nge öni angatr: “Öi, perofetane jë! Drei la ka xe eö?” (Luka 22:64) Hane hi la aqane nyipin angatr la Nekö i Akötresie!