Kayarin binalor si Jesus a singa sakey a kriminal, sikatoy inyakar ed si Anas, samay atagey a saserdote sanen saray managbangat diad templo et mankelkelaw ed ugaw nin Jesus. (Lucas 2:42, 47) Arum ed saray anak a lalaki nen Anas et nanlingkor bilang atagey a saserdote, tan natan et say manugang ton si Caifas so walad satan a posisyon.

Legan a wala nid abung nen Anas si Jesus, tinipon nen Caifas so Sanhedrin. Say membro na satan a korte et 71, kaiba lay atagey a saserdote tan arum ni ran datin atagey a saserdote.

Sanen tinepetan nen Anas si Jesus “nipaakar ed saray disipulo to tan nipaakar ed ibabangat to,” onia labat so ebat to: “Diad arap na amin a totoo so pansasalitaan ko. Lanang ak a manbabangat diad sinagoga tan diad templo, a pandaragupan na amin a Judio; tan agak balot nansalita diad maamot. Akin et tetepetan mo ak? Tepetan mo iramay akadngel ed saray imbagak ed sikara.”​—Juan 18:19-21.

Samay sakey ya opisyal a wadman et tinampal toy Jesus tan nampasnokan to, a kuan to: “Ontan so kakaebat mod manunan saserdote?” Balet lapud amta nen Jesus ya anggapoy aliwan ginawa to, inmebat: “No walay imbagak ya aliwa, paneknekan mo itan; balet no duga so imbagak, akin et tinampal mo ak?” (Juan 18:22, 23) Insan impaiyakar nen Anas si Jesus ed manugang ton si Caifas.

 Diad saman et nantitipon la ray membro na Sanhedrin​—say peles ya atagey a saserdote, saray mamatatken, tan saray eskriba. Diad abung nen Caifas so nantitiponan da. Say ontan a panbista diad labi na Paskua et ilegal, balet ag-iya angamper ed sikara pian gawaen so mauges a plano ra.

Nibagan aliwan patas irayan totoo. Sanen pinaoli nen Jesus si Lazaro, denesidi na Sanhedrin a nepeg ya ompatey si Jesus. (Juan 11:47-53) Tan pigaran agew ni labat so apalabas, nantotongtongan na saray lider na relihyon ya erelen tan pateyen si Jesus. (Mateo 26:3, 4) On, anggan agni ginmapoy bista, si Jesus et singa da la senentensiaan ya ompatey!

Saray manunan saserdote tan arum nin membro na Sanhedrin et aglabat nantitipon ya ilegal, noagta nananap met ira na saray testigo a mangiter na palson ebidensya pian walay niyakusa ra ed si Jesus. Dakel so aromog da, balet mankokontraan so testimonya na saraya. Diad kaunoran et walay duaran inmarap a mangibabaga: “Nadngel mi ya ibabaga ton, ‘Igebak iyan templo a ginawa na saray lima, tan diad loob na taloy agew et mangipaalagey ak na sananey ya agginawa na saray lima.’” (Marcos 14:58) Balet anggan sarayan dua et aliwan parehoy ibabaga ra.

Tinepetan nen Caifas si Jesus: “Anggapoy iyebat mo? Antoy nibagam ed akusasyon na sarayan totoo ed sika?” (Marcos 14:60) Anggapon balot so imbaga nen Jesus ed sayan palson akusasyon na saray testigo ya mankontraan so ibabaga ra. Kanian nannonot na sananey nin taktika so Atagey a Saserdoten si Caifas.

Amta nen Caifas ya sensitibo iray Judio no walay siopaman a mangibabagan sikatoy Anak na Dios. Aminsan, sanen tinawag nen Jesus ya Ama to so Dios, sikatoy labay a pateyen na saray Judio lapud ibabaga ran “ipapara toy sarili to ed Dios.” (Juan 5:17, 18; 10:31-39) Amta nen Caifas itan a liknaan da, kanian masilib ton kinerew ed si Jesus: “Pansambaen ta ka ed arapan na mabilay a Dios ya ibagam ed sikami no kasin sika so Kristo ya Anak na Dios!” (Mateo 26:63) Siempre, bibidbiren nen Jesus a sikato so Anak na Dios. (Juan 3:18; 5:25; 11:4) No agto gawaen itan natan, singa to ibuburi a sikatoy Anak na Dios tan say Kristo. Kanian imbaga nen Jesus: “On, siak; tan nanengneng yoy Anak na too ya akayurong diad kawanan na pakapanyari tan onsabi a walad saray lurem na tawen.”​—Marcos 14:62.

Diad saya et nandrama si Caifas, a pinilat toy kawes to tan inkuan to: “Sikatoy nansalita na panagmudmora! Kaukolan tayo ni kasi arum a testigo? Nadngel yo la natan so impanmudmora to. Antoy nikuan yo?” Imbaga na Sanhedrin so aliwan makatunongan a desisyon: “Sikatoy manepeg ya ompatey.”​—Mateo 26:65, 66.

Insan inelek-elekan day Jesus tan pinoponiti ra. Sikatoy tinatampal na arum tan nilutlutdaan day lupa to. Kayari ran sinakbongay lupa to tan tinatampal, ininsulto ra, a kuan da: “Manpropesiya ka natan! Siopay amoniti ed sika?” (Lucas 22:64) Agaylan impanmaltrato ed mismon Anak na Dios diad ilegal ya impanbista ed labi!