Busihu butuha busa Pitrosi halatula Jesu lwabulaalu. Ba Kuta ya Sanhedrini bafelize kutalima taba ya Jesu ka kumunenauna mi ki kale bahasana. La Butanu kakusasana, bakopana hape mwendi ka mulelo wa kuitimeza mitala bakeñisa kutula mulao ka kutalima taba busihu. Jesu utiswa fapilaa bona.

Hape ba kuta ye bamubulelela kuli: “Haiba ki wena Kreste, lubulelele.” Jesu ualaba kuli: “Niha nika mibulelela, hamuna kulumela nihanyinyani. Hape niha nika mibuza, hamuna kualaba.” Nihakulicwalo, Jesu ka bundume uizibahaza sina yena yanaapolofitilwe kwa Daniele 7:13. Uli: “Kuzwa cwale, Mwanaa mutu ukaina kwa lizoho la bulyo lelimaata la Mulimu.”—Luka 22:67-69; Mateu 26:63.

Batundamena kumubuza kuli: “Kana ki wena Mwanaa Mulimu nji?” Jesu ualaba kuli: “Mubulezi mina beñi kuli ki na.” Kubonahala kuli taba ye itahisa kuli Jesu abulaiwe bakeñisa mulatu wa kunyefula. Babuza kuli: “Lusatokwelañi lipaki hape?” (Luka 22:70, 71; Mareka 14:64) Ka mukwa ocwalo, batama Jesu ni kumuisa ku mubusisi wa Roma, yena Ponse Pilato.

Mwendi Judasi Isikariota uiponela Jesu inze aisiwa ku Pilato. Judasi halemuha kuli Jesu uatulezwi lifu, wainyaza ni kuikutwa maswabi. Kono kufita kuli asikuluhele ku Mulimu ni kubaka habuniti, uya kwa baprisita babahulu ni kubakutiseza lishekele za silivera ze 30. Judasi ubulelela baprisita babahulu kuli: “Niezize sibi hanibetekile mali asina mulatu.” Kono habamualabi hande, bali: “Cwale luna luezeñi? Zeo ki zahao!”—Mateu 27:4.

Judasi unepela lishekele za silivera ze 30 mwa tempele, mi kihona aekeza kwa bumaswe bwahae ka kulika kuipulaya. Judasi hanze alika kuiponda, mutai kwatamile muhala walobeha. Judasi uwela fa macwe a mwatasi, mi mubili wahae wapazuha fahali.—Likezo 1:17, 18.

Isali kakusasana, Jesu haisiwa kwa ndu ya Ponse Pilato. Kono Majuda babamuisa kwateñi bahana  kukena mwahali. Baanga kuli kuba bukaufi ni batu Balicaba cwalo kuka basilafaza. Kueza cwalo nekuka bapaleliswa kuca sico la Nisani 15, lona lizazi lapili la Mukiti wa Linkwa Zesikaya Mumela, ongiwa kuba kalulo ya nako ya Paseka.

Pilato uzwela kwande ni kubabuza kuli: “Ki taba mañi yemutama mutu yo?” Baalaba kuli: “Kambe mutu yo haki sifosi, nelusike lwamutisa ku wena.” Pilato mwendi uikutwa kuli bamuhapeleza feela, ka mukwa ocwalo, ubabulelela kuli: “Mumuunge mina beñi mi muyo muatula kulikana ni mulao wamina.” Majuda bapatulula mulelo wabona wa bubulai, baalaba kuli: “Mulao hau lulumelezi kuli lubulaye mutu.”—Joani 18:29-31.

Niti ki kuli, haiba babulaya Jesu ka nako ya Paseka, nto yeo ikona kutahisa mufilifili kwa sicaba. Kono haiba batahisa kuli Maroma babulaye Jesu bakeñisa mulatu wa bukwenuheli, ili wo Maroma balumelelizwe kubulaya mutu bakeñisa ona, fo he, Majuda habana kuba ni mulatu fapilaa batu.

Babahulu ba bulapeli hababuleleli Pilato kuli baatulezi kale Jesu lifu bakeñisa kuli ki mukwenuheli. Cwale bamutameleza litaba lisili za buhata bali: “Lufumani mutu yo inze [1] akelusa sicaba saluna, [2] uhanisa batu kulifa mitelo ku Sesare, mi [3] ubulela kuli ki yena Kreste mulena”—Luka 23:2.

Ka kuba muyemeli wa Maroma, Pilato waswanela kuamiwa ki taba ya kuli Jesu uipulela kuli ki mulena. Ka mukwa ocwalo, Pilato ukena hape mwa ndu yahae, ubiza Jesu, mi umubuza kuli: “Kana ki wena Mulena wa Majuda?” Ka mubulelelo omuñwi utalusa kuli, ‘Kana utula mulao wa mubuso ka kuipulela kuli u mulena mwa sibaka sa Sesare?’ Mwendi kuli azibe litaba zataluselizwe Pilato ka zahae, Jesu umubuza kuli: “Kana ki wena muñi yabuza puzo yeo, kamba kunani baba kubulelezi zaka?”—Joani 18:33, 34.

Pilato uicanganisa buniti bwa taba ya mubuza Jesu, kono inze abata kuziba zeñata, ualaba kuli: “Kana unahana kuli ni Mujuda?” Uekeza kuli: “Ki sicaba sahenu ni baprisita babahulu baba kutisize ku na. Kiñi seuezize?”—Joani 18:35.

Jesu haaliki kupicuka taba yeambolwa luli, yona ya bulena. Ulalaba ka nzila yekomokisa hahulu Mubusisi Pilato.