Kwapwile kwakamwihi nakucha omu Petulu akanyine Yesu kamuchitatu. Vaka-Sunendeline valimwangile omu vakumishile kusopesa Yesu. Kahomu kwachele lyaChitanu nachimene valikungulwile cheka. Pamo valingile ngocho mangana vasolole unjiho wamakuli wapwileko naufuku usoloke nge wamuchano. Kaha Yesu vamunehele cheka kuli vakiko.

Vaka-zango vambile cheka ngwavo: “Kachi nge ove yove Kulishitu, tulweze.” Yesu avakumbulwile ngwenyi: “Numba nge nangumilweza, kamweshi kwitavilako. Kaha nawa numba nge nangumihula chihula, kamweshi kungukumbululako.” Chipwe ngocho, Yesu ahanjikile kuli vakiko nakumika hakulisolola ivene nge ikiye vavulukile hali Ndanyele 7:13. Ambile ngwenyi: “Kufuma vene oholili Mwanamutu mwatwamanga kulivoko lyachilyo lyaKalunga lyangolo.”—Luka 22:67-69; Mateu 26:63.

Vatwalileho kumuhulisa ngwavo: “Kumana, ove yove MwanaKalunga?” Yesu avakumbulwile ngwenyi: “Enu vavene muli nakwambamo ngwenu yami vene.” Echi chasolokele nge vapwile nakusaka kujiha Yesu hakulyonga ngwavo nasaula Kalunga. Vambile ngwavo: “Nyi ikaze natusakila cheka unjiho weka?” (Luka 22:70, 71; Mako 14:64) Ngocho vakashile Yesu nakumutwala kuli Pondeu Pilatu, Nguvulu wavaLoma.

Atela Yuta Isakalyote amwene Yesu navamutwala kuli Pilatu. Omu Yuta atachikijile ngwenyi Yesu vanamusopesa nakusaka kumujiha, evwile kumuchima kukola nakulishona chikuma. Muchishishisa chakulomba kuli Kalunga amukonekele, Yuta akindulwishile jize jimbongo japalata 30. Kaha alwezele vapilishitu vavakulwane ngwenyi: “Ngwalinganga shili hakusolola mutu wakuzeneka mulonga kuli vaka-kole.” Oloze vakiko vamukumbulwile namazu akumuhulamisa ngwavo: “Owo mulonga weyaze? Owo mulonga wove.”—Mateu 27:4.

Yuta ambilile jize jimbongo japalata 30 mutembele, kaha ayile nakulisukika, ngocho awezeleleko kushili yenyi. Omu Yuta akashile mukole nakusaka kulisukika, uze mutango akashileko mukole wapamukile. Ngocho aholokelele kulilolwa, kaha lijimo lyenyi lyatuvikile.—Vilinga 1:17, 18.

Chapwile chimene omu Yesu vamutwalile kunganda yaPondeu Pilatu. Oloze vaze vaYuleya vamutwalile  kuze kunganda vakanyine kwingila mukachi. Vashinganyekele nge kwingila mukachi muze mwapwile vaka-mafuchi eka nachivalingisa vahone kutoma. Chuma kana kachi chavalingishile vahone kulya Paseka haNyisane 15, likumbi lyakulivanga lyaChiwanyino chaMbolo Yakuzeneka Chimbalwila, lize vamwenenga kupwa nalikiko hilikumbi lyaPaseka.

Pilatu alovokele nakuvahulisa ngwenyi: “Mulonga muka munamuwane nawo ou mutu?” Vamukumbulwile ngwavo: “Nge ou mutu kapwanga muka-kuhengesako, kachi katwamunehele kuli oveko.” Atela Pilatu amwene ngwenyi vali nakumukanjikiza, ngocho avambile ngwenyi: “Mumbatenu enu vavene mumusopese kweseka nomu mwaya jishimbi jenu.” VaYuleya vasolwele vishinganyeka vyavo vyavipi hakwamba ngwavo: “Jishimbi kajatwitavisa kujiha mutuko.”—Yowano 18:29-31.

Kachi nge vajihile Yesu hachiwanyino chaPaseka, kachi chakatwile chizungo muvatu. Ngocho vajinyine ngwavo vaLoma vajihe Yesu mwomwo vakiko vavetavishile kujiha mutu nge nalikange kuchiyulo chalifuchi, kahechi nachilingisa vaYuleya vahone kupwa namulonga kuvatu.

Vatwamina vamukwitava kavalwezele Pilatu ngwavo Yesu vanamusopesa lyehi nakumuhana mulonga wakusaula Kalungako. Ngocho vamuvangijikilile jino milonga yeka, vambile ngwavo: “Ou mutu twamuwananga [1] ali nakulumbula lifuchi lyetu [2] nakukanyisa vatu kutela mitelo kuli Kesale, kaha nawa [3] ngwenyi ikiye Kulishitu, mwangana.”—Luka 23:2.

Pilatu hakupwa muka-kwimanyinako chiyulo chavaLoma, alizakaminyine chikuma omu evwile ngwavo Yesu nalivuluka ngwenyi apwa mwangana. Ngocho Pilatu akindulukile mukachi kanganda, asanyikile Yesu nakumwihula ngwenyi: “Ove yove Mwangana wavaYuleya tahi?” Mujila yikwavo, chili nge amwihwile ngwenyi, ‘Uno unahokola lushimbi lwachiyulo chavaLoma hakulivuluka ngwove umwangana nakulikanga kuli Kesale tahi?’ Pamo Yesu hakusaka atachikize nge Pilatu nevunga vyaikiye, ambile ngwenyi: “Uno evi unahulisa unavishinganyeka ove ivene tahi, nyi veka vakiko vanakulwezevyo?”—Yowano 18:33, 34.

Pilatu asakile kulisolola kuli Yesu nge katachikijile vyuma vimwe hali ikiyeko, oloze jino asakile kuvitachikiza, ngocho amukumbulwile ngwenyi: “Uno ami ngukaYuleya numba?” Atwalileho ngwenyi: “Vaka-muyachi wove navapilishitu vavakulwane vakiko vanakunehe kuli ami. Vyuma muka walinganga?”—Yowano 18:35.

Yesu kachinyine kuhanjika chihande chawangana chize chakatwile vikokojolako. Akumbulwile mujila yize yakomwesele Nguvulu Pilatu.