Ke bošego bja matlagosa ge Petro a latola Jesu ka lekga la boraro. Ditho tša lekgotla la Sanhedrine di feditše ka tsheko ya tšona ya bofora e bile di phatlaletše. Ke matlagosa a Labohlano, di kgobokane gape mohlomongwe e le ge di dira gore tsheko ya bošego e bonagale e le yeo e dirilwego go ya ka molao. Jesu o tlišwa pele ga tšona.

Lekgotla le laela gape ka gore: “Ge e ba o le Kriste, re botše.” Jesu o araba ka gore: “Le ge nkabe ke le boditše le be le ka se dumele le gatee. Godimo ga moo, ge nkabe ke le botšišitše le be le ka se arabe le gatee.” Lega go le bjalo, Jesu ka sebete o ba bontšha gore ke yena yoo go boletšwego e sa le pele ka yena go Daniele 7:13. O re: “Go tloga bjale go ya pele, Morwa wa motho o tla ba a dutše ka letsogong la le letona le matla la Modimo.”—Luka 22:67-69; Mateo 26:63.

Ba phegelela ka gore: “Na o ra gore o Morwa wa Modimo?” Jesu o araba ka gore: “Lena ka noši le re ke yena.” Se se bonagala se lokafatša go bolaya ga bona Jesu ka tatofatšo ya thogako. Ba mmotšiša ba re: “Re sa nyakela’ng bohlatse bjo bongwe?” (Luka 22:70, 71; Mareka 14:64) Ka gona ba tlema Jesu gomme ba mo iša go Mmuši wa Moroma e lego Pontio Pilato.

Judase Isikariote a ka ba a lebeletše ge Jesu a išwa go Pilato. Ge Judase a lemoga gore Jesu o ahlotšwe, o ikwa a itshola ka tsela e itšego e bile a itlhoboga. Lega go le bjalo, go e na le gore a boele go Modimo a itshole e le ka kgonthe, o bušetša ditsekana tše 30 tša silifera. Judase o botša baperisita ba bagolo o re: “Ke sentše ge ke be ke eka madi a go loka.” Eupša ba mo araba ka tsela e sehlogo, ba re: “Bjale o re re re’ng? O tla iponela ka noši!”—Mateo 27:4.

Judase o lahlela ditsekana tše 30 tša silifera ka tempeleng gomme a ikokeletša diphošo ka go leka go ipolaya. Ge Judase a leka go iphega, go ka direga gore kala yeo a bofelelago thapo go yona e a robega. Mmele wa gagwe o wela maswikeng a lego kua tlase, moo o phatlogago ka bogare.—Ditiro 1:17, 18.

E sa le ka masa ge Jesu a išwa ntlong ya Pontio Pilato. Eupša Bajuda bao ba mo išago moo ba gana go tsena. Ba nagana gore go kopana le bao e sego Bajuda go tla ba šilafatša. Se se be se tla dira gore ba se swanelege go ja ka Nisani 15, e lego letšatši la mathomo la Monyanya wa Dinkgwa tšeo di sa Omelwago woo o tšewago e le karolo ya sehla sa Paseka.

Pilato o tšwela ka ntle gomme o botšiša Bajuda o re: “Ke eng seo le latofatšago motho yo ka sona?” Ba araba ka gore: “Ge nkabe motho yo e se modiri wa bobe, gona re ka be re se ra mo gafela go wena.” Pilato a ka ba a nagana gore ba leka go mo fekeetša, ka gona o re: “Lena mo tšeeng le mo ahlole go ya ka molao wa lena.” Bajuda ba bontšha gore ba ikemišeditše go bolaya Jesu, gomme ba araba ka gore: “Ga go dumelelwe ke molao gore re bolaye motho.”—Johane 18:29-31.

Ge e le gabotse, ge e ba ba bolaya Jesu monyanyeng wa Paseka, seo se ka tsoša mpherefere setšhabeng. Lega go le bjalo, ge e ba ba ka dira gore Baroma ba bolaye Jesu ka ditatofatšo tša bopolitiki, e lego seo Baroma ba dumeletšwego go se dira, seo se ka dira gore batho ba nagane gore ga se Bajuda ba bolailego Jesu.

Baetapele ba bodumedi ga ba botše Pilato gore ba ahlotše Jesu ka tatofatšo ya thogako. Bjale ba itlhamela ditatofatšo tša maaka, ba re: “Motho yo re hweditše [1] a aroša setšhaba sa rena, [2] a iletša go ntšhetša Kesara makgetho e bile [3] a re yena ka noši ke Kriste, kgoši.”—Luka 23:2.

Ka ge Pilato e le moemedi wa mmušo wa Roma, go a kwagala ge a tshwenyega ka tatofatšo ya go ipolela ga Jesu gore ke kgoši. Ka gona Pilato o tsena gape ka ntlong, o biletša Jesu go yena, gomme o mmotšiša gore: “Na o Kgoši ya Bajuda?” Ka mantšu a mangwe o re: ‘Na o tshetše molao wa mmušo ka go ipolela gore o kgoši ka go lwantšhana le Kesara?’ Mohlomongwe e le ge Jesu a nyaka go tseba seo Pilato a šetšego a se kwele ka yena, o re: “Na o bolela se ka la gago goba ba bangwe ba go boditše ka nna?”—Johane 18:33, 34.

E le go bontšha gore ga a tsebe ditherešo mabapi le Jesu eupša o kganyoga go ithuta ka yena, Pilato o araba ka gore: “Na ke nna Mojuda?” O oketša ka gore: “Setšhaba sa geno le baperisita ba bagolo ba go gafetše nna. O dirile’ng?”—Johane 18:35.

Jesu ga a leke go efoga kgang e bohlokwahlokwa ya mabapi le go ba kgoši. O araba ka tsela yeo go se nago le pelaelo gore e tloga e makatša Mmuši Pilato.