Te aahiata ra i to Petero parauraa aita oia i ite ia Iesu i te toru o te taime. Ua oti ta te Sunederi haavaraa tano ore e ua hoˈi i ǒ ratou. Ananahi aˈe, poipoi Mahana pae, ruru faahou maira ratou, eita e ore no te faahua haamana i ta ratou haavaraa tano ore ia au i te ture inapo ra. Arataihia maira Iesu ia ratou.

Na ô faahou maira ratou: “O te Mesia oe, faaite mai ïa.” Parau atura Iesu: “Noa ˈtu e e faaite atu vau ia outou, eita iho â outou e tiaturi. Ia ui atoa ˈtu vau ia outou, eita outou e pahono mai.” Faaite atura râ oia ma te taiâ ore e no ˈna tei tohuhia i roto i te Daniela 7:13, e na ô atura: “Mai teie atu nei, e parahi te Tamaiti a te taata nei i te rima atau o te Atua manahope.”—Luka 22:67-69; Mataio 26:63.

Parau onoono faahou maira ratou: “O oe ïa te Tamaiti a te Atua?” Pahono atura Iesu: “Te reira iho â mai ta outou e parau ra.” Tano iho â i to ratou manaˈo ia haapohe ia Iesu no te faainoraa i te Atua. Ui aˈera ratou: “No te aha ïa e imi ai i te tahi atu haapapuraa?” (Luka 22:70, 71; Mareko 14:64) Taamu aˈera ratou i na rima o Iesu e aratai atura ia ˈna i te tavana Roma o Ponotio Pilato.

Ua ite paha Iuda Isakariota ia Iesu i te aratairaahia ia Pilato. I te taaraa ia ˈna e ua faautua-pohe-hia Iesu, tatarahapa e hepohepo roa ihora oia. Aita râ oia i fariu i te Atua ma te tatarahapa mau, ua faahoˈi oia i na 30 moni ario i te mau tahuˈa tiaau, e na ô atura: “Ua hara vau i to ˈu hooraa ˈtu i te toto o te hoê taata hapa ore.” Pahonohia maira ma te aroha ore: “Ohipa oe ïa, e ere i te ohipa na matou!”—Mataio 27:4.

Taora ihora Iuda i na 30 moni ario i roto i te hiero, e rave atura i te tahi atu ohipa ino a tamata ˈi i te haapohe ia ˈna iho ma te tarî ia ˈna. E au ra râ e ua fati te amaa i nia iho to ˈna taamuraa i te taura. Topa ihora oia i nia i te ofai, amaha aˈera to ˈna opu, e purehu atura to ˈna aau i rapae.—Ohipa 1:17, 18.

I te poipoi roa to Iesu aratairaahia i te aorai o  Ponotio Pilato. Aita râ te ati Iuda tei aratai ia ˈna i reira i hinaaro e tomo atu. I manaˈo na ratou e e viivii ratou i te feia e ere i te ati Iuda, a ore atu ai e nehenehe e amu i te maa o te 15 no Nisana, te mahana matamua o te Oroa o te pane hopue ore, tei parauhia Pasa.

Haere maira Pilato i rapaeau e ani maira ia ratou: “Eaha ta outou pariraa i tena taata?” Pahono atura ratou: “Ahiri o ˈna e ere i te taata ohipa ino, eita ïa matou e tuu ia ˈna ia oe ra.” I manaˈo na paha Pilato e te faatere ra ratou ia ˈna na roto i te ravea haavarevare, na ô maira ïa oia: “A rave atu ia ˈna e a haava ˈtu ia au i ta outou ture.” Faaite atura te ati Iuda i ta ratou opuaraa ia pohe Iesu: “Ua opanihia matou ia haapohe i te taata.”—Ioane 18:29-31.

Ia haapohe hoi ratou ia Iesu i te oroa Pasa, e tupu ïa te faahuehueraa. O te faatereraa Roma anaˈe te nehenehe e haapohe i te taata orure hau. Ia nehenehe te ati Iuda e turai ia Pilato ia faautua pohe ia Iesu no taua hara ra, e manaˈo ïa te nunaa aita ta tera mau ati Iuda i roto i teie ohipa.

Aita te mau aratai haapaoraa i parau ia Pilato e ua faautua ratou ia Iesu i te faainoraa i te Atua. Ua rau râ ta ratou mau pariraa haavare ia Iesu: “Ua ite matou i teie taata [1] i te haavareraa i to matou nunaa, [2] i te opaniraa ia aufau i te tute ia Kaisara e [3] i te parauraa e o ˈna te Mesia, te arii.”—Luka 23:2.

Ei tia no Roma, ua haapeapea iho â Pilato i te pariraahia Iesu i te parauraa e e arii o ˈna. Tomo faahou atura Pilato i roto i te aorai, pii maira ia Iesu e ui maira: “O oe te Arii o te ati Iuda?” Te auraa, ‘Ua ofati anei oe i te ture Roma ma te parau e e arii oe, a patoi atu ai ia Kaisara?’ No te ite paha mea rahi anei te parau ta Pilato i faaroo no ˈna, parau atura Iesu: “Na oe noa anei tena parau, aore ra na vetahi ê i parau ia oe?”—Ioane 18:33, 34.

No te faaite e aita oia i ite i te hoê aˈe mea no nia ia Iesu, ua hinaaro râ oia e ite, pahono maira Pilato: “E ere au i te ati Iuda.” Na ô faahou maira oia: “Na to oe iho nunaa e na te mau tahuˈa tiaau i tuu mai ia oe ia ˈu nei. Eaha hoi ta oe i rave?”—Ioane 18:35.

Aita Iesu i tamata i te ape i te tumu parau rahi, to ˈna tiaraa arii. Pahono atura iho â oia i te tavana Pilato a maere roa ˈtu ai oia.