Yésus a nji ve’ele jeñe na a solé Pilate na a ne fo’o njôô. Ve, Éjôé jé é nji bo ji Rome a yiane ko woñ. Yésus a jô na: “Éjôé é ne énjam é nji bo ji ya si ndône mu. Nge Éjôé jam é too ji ya si ndône mu, ve nge bebo bisaé ya éjôé jam ba ye wosan na me bo te veban e mo Bejuif. E nde ñhe Éjôé jam é nji bo ji ya bi ne va.” (Jean 18:36, Mfefé Nkôñelan) Ôwé, Yésus a bili fo’o Éjôé, ve é nji bo ji ya si ndône mu.

Pilate a nji jô’é ajô te nalé. Nde a beta sili na: “Ye ô ne njô bôt?” Yésus a liti Pilate na émien a te su’ulane ve mbamba éyalan a jô’ô na: “[Womiene le wo jô na] me ne njô bôt. Ajô te me nga bialé de, nde fe me nga zu si nyô, nde me aye kañete bôt benya mejôô. Môt ase a ne zôsô, nnye a ye wô’ô mejôô mam.”​—Jean 18:37.

E koone Yésus a tatéya jô Thomas na: “Ma me ne zen, me ne fe benya mejôô a ényiñ.” Éyoñe ji, Pilate fe a nga yeme na, nsôñane Yésus a bili éyoñ ba te lôme nye si va ô ne na a kañete bôt “benya mejôô,” e dañe dañ benya mejôô ya Éjôé jé. Yésus a bili ngule nkômbane ya ke ôsu a su’u benya mejôô bete, ja’a da sili na a wu. Ane Pilate a sili nye na: “Jé é ne benya mejôô?” Ve a nji kômbô bi éyalan. E mise mé, abim a wô’ôya le da yian asu na a tyi’i môt ate ajô.​—Jean 14:6; 18:38.

Pilate a bulane be jama bôt a yange nye nseñ. Yésus a yiane bo nye fefel éyoñ a jô bemie beprêtre a bôte ba be be be né na: “Me nji yene jam da yiane mekua e be môte nyô.” Mbôle ba wô’ô ntyi’an ajô te sañ, nde ba yeme ngu a jô na: “A ngômelane bôt a ñye’elan a ke a ye’ele e Judée ase, ataté Galilée vôm a nga taté a kui va.”​—Luc 23:4, 5, Mfefé Nkôñelan.

Pilate a vembe fo’o éyoñ a yen ane Bejuif ba vebe ze na ba wôé Yésus. Nté bemie beprêtre a betebe ôsu bevok ba ke ôsu a yôtan, Pilate a sili Yésus na: “Ye ô nji wôk ane ba bo’olô wo?” (Matthieu 27:13, Mfefé Nkôñelan) Yésus a nji fet. Nde Pilate a kame na Yésus a tabe évô a bibôta bite bise.

Bejuif ba jô na Yésus a nga ‘taté Galilée.’ Nde bifia bite bia bo na Pilate a jô émien na, Yésus a ne mone Galiléen. Nalé a ve nye fane ya na a sa’ale be’e ajô Yésus nlô. Hérode Antipas (mone Hérode le Grand) a jôé e Galilée, a fe na, a ne e Jérusalem asu abô’ô Pâque. Nde Pilate a lôme Yésus be Hérode. A ne fo’o Hérode Antipas ate nnye a nga tyi’i nlô Jean Baptiste. Mvuse ya valé, éyoñ a nga wô’ô na Yésus a bo mesimba, Hérode a nga ko woñe na, ye Yésus a nji bo Jean a keya wômô miñwuane le?​—Luc 9:7-9.

Hérode a ne meva’a éyoñe ji, amu a zu yene Yésus. A nji bo mevak amu a kômbô kamane Yésus nge jeñe na a yeme nge mejô ba bôté nye me ne été nge momo. Hérode a bili fo’o ve nkômbane ya “yene nye a bo’ étua jam éziñ.” (Luc 23:8) Ve jame da, Yésus a nji fo’o volô Hérode na a jalé nkômbane wé. Nya ajôô a ne na, éyoñe Hérode a sili nye minsili a nji kuli ja’a ve éfia jia. Mbôle jam é biya nye, Hérode ba bezimbi bé ba “biasé” Yésus. (Luc 23:11) Nde ba jalé nye étôto’o ngômesan a kpwe’ele nye. Mvuse ya valé, Hérode a beta lôme Yésus be Pilate. Hérode ba Pilate be mbe be siñan, ve éyoñe ji, be nto benya bemvôé.

Éyoñe Yésus a beta so, Pilate a loone bemie beprêtre a betebe ôsu ya Bejuif, a jama bôt a jô be na: “Me maneya fombô nye mi to, me nji yene môte nyô mbia be mam mi abo’olô nye: nalé fe Hérode a nji yene nye jam abé: amu a  bulaneya bia nye; tama yenan a nji bo ajô a yiane wu de. Ajô te me aye bibi nye, a jô’é nye a ke.”​—Luc 23:14-16.

Pilate a ne ôjeja’a ya suu Yésus, amu a yene na, beprêtre ba te bi nye fo’o ve amu ba bo nye éviele. Nté Pilate a jeñe na a suu Yésus, jam afe da beta bo bo na Pilate a tu’a beta kômbô suu Yésus. Nté a too éto ya tyi’i mejô, ane minga wé a lôme na, be zu nye kate foé nyi: “Te bo môt ate jôm, a ne zôsô; amu me ate yem mbia be mam abui biyeyeme den [bia yiane so yôp] amu nye.”​—Matthieu 27:19.

Aval avé Pilate a ne suu môt a nji bi mekua nyi, avale da sili na a bo?